الەۋمەتتىك جەلىدە قىز بالانىڭ دورەكى ارەكەتى تۇسكەن بەينە تاراپ كەتتى، دەپ حابارلايدى "ادىرنا" ۇلتتىق پورتالى.
بۇل تۋرالى inbusiness.kz سايتى جاريالادى.
وقيعا شىلدە ايىندا بولعان. ءتۇن ىشىندە جىگىت پەن قىز كوشەدە جۇرگەن. تاراعان بەينەدە بويجەتكەن اكەسىنىڭ قاراساي اۋدانىنىڭ باسشىسى ەكەنىن ايتىپ، ايعايلاي باستاعانىن بايقاۋعا بولادى.
"سەن مەنىڭ اكەمنىڭ كىم ەكەنىن بىلەسىڭ بە؟ قاراساي اۋدانىنىڭ باستىعى. اۋداندىق ىشكى ىستەر باسقارماسى", - دەپ بويجەتكەن ايعايعا باسقان.
الماتى وبلىستىق پوليتسيا دەپارتامەنتى ۆيدەوداعى جايتقا تۇسىنىك بەردى. قىزدىڭ ايتقانىن دا وتىرىك دەگەن تۇجىرىم جاسادى.
"بۇل جاعداي الماتى وبلىسى اۋماعىندا بولعان جوق. سونىمەن قاتار، بەينەجازباداعى قىزدىڭ سوزدەرى شىندىققا جاناسپايدى. ول اۋداندىق پوليتسيا باسقارماسى باستىعىنىڭ قىزى ەمەس، ونىڭ بالالارىنىڭ ەڭ ۇلكەنى نەبارى 7 جاستا", - دەدى الماتى وبلىسى پد بولىم باسشىسى ەرنار سايديلدين.
ال كەيىننەن ۆيدەو الماتى قالاسى كوشەلەرىنىڭ بىرىندە تۇسىرىلگەنى انىقتالدى.
"المالى اۋداندىق پوليتسيا باسقارماسىنىڭ قىزمەتكەرلەرى قۇقىق بۇزۋشىلارعا قر زاڭناماسىنا سايكەس شارا قابىلدادى. ولارعا قاتىستى قوعامدىق ورىندا ماس كۇيىندە ءجۇرۋ جانە تىنىشتىقتى بۇزۋ دەرەكتەرى بويىنشا اكىمشىلىك ماتەريالدار جينالدى. ماس ەر ادام مەديتسينالىق ايىقتىرعىشقا جەتكىزىلدى", - دەپ حابارلادى الماتى پوليتسيا دەپارتامەنتىنىڭ ءباسپاسوز قىزمەتىنەن.
