Kókshetaý qalasynyń mektep basshylary oqýshylardyń ata-analaryn balalardy áleýmettik jeli arqyly ózine tartatyn qaýipti oıyndarǵa nazar salýǵa shaqyrdy, - dep habarlaıdy Tengrinews.kz tilshisi.
"Mundaı oıyndardy uıymdastyrýshylar balalardy jabyq toptarǵa aldap qosyp, ol jerde túrli syltaýmen ólimge soqtyratyn fleshmobqa qatysýǵa shaqyrady", - dep jazypty joldaý avtorlary.
Olar balanyń osyndaı oıynnyń shyrmaýyna ilingenin bildiretin belgilerdi anyqtaǵan:
- Qara tústi kıim tańdaý, ólimmen astasatyn sımvoldary bar bolýy múmkin;
- Syrt kelbetiniń kúrt ózgerýi: samaıyn qyryp tastaý, shashyn tabıǵı emes túske boıaý;
- Uıqynyń buzylýy: maýjyrap júrý nemese uıqynyń joǵalýy;
- Denesinde tilingen izderdiń, kúıýi nemese denege jaraqat salýdyń ózge belgileriniń (tyrtyq, oıyq, tilý, tesý) bolýy;
- Únemi vırtýaldy ómirde júrýi, jeli arqyly hat almasýǵa qatty kóńil bólý (kóbine beıtanys adamdarmen);
- Devaıstaryna qoljetimdiliktiń bolmaýy, kompıýterge qosymsha qupııa sóz ornatý, paraqshany anonım qaraýǵa múmkindik beretin braýzerlerdi qoldaný;
- Mıstıkalyq fılmderge jáne qatygezdik kórsetilgen tustaryna qyzyǵý;
- Ózgeshe sımvoly bar tatý saldyrýǵa degen aıaqasty qulshynys;
- Ata-anasymen qarym-qatynastan qashý jáne kóńil-kúıin jasyrý;
- Jelilerden qaýipti belgilerdiń paıda bolýy: Áleýmettik jelidegi kúızelisti bildiretin jazbalardyń paıda bolýy, óz paraqshasynda ólimge baılanysty túnergen beıneler men dáıeksózderdiń paıda bolýy.
"Sýretterde betin qolmen nemese kıimmen qalqalaý, osyndaı sýretterde suq saýsaǵyn kórsetý, bul ózine qol salýdy meńzeıtin fotosýretter. Medýza, mysyq, kóbelek, edınorog, bıikten, tóbeden túsirilgen sýretter jáne joǵary júzip bara jatqan kıtterdiń beınesi qaýipti esepteledi. Áleýmettik jelidegi paraqshasynda túnergen mýzykany saqtaý, sýııdke beıimdilikti anyq bildiredi. Eger balańyzdan joǵaryda kórsetilgen belgilierdiń bireýin bolsa da baıqap, onyń ólim tobyna múshe bolǵanynan seziktenip júrseńiz, oǵan daýys kóterip, dereý doǵarýdy talap etpeńiz. Kez kelgen kıkiljiń oıyna alǵanyn júzege asyrýǵa ıtermeleýi múmkin. Bastysy birden mektep psıhologyna habarlasyńyz", - dep ótinipti mektep basshylary ata-analardan.
_________________________________________________________________________________________________________________
