ەرتەڭ شىمكەنتتە ناۋرىز قايدا وتەدى؟ - شىمكەنت قالاسى اكىمىنىڭ بىرىنشى ورىنباسارى شىڭعىس مۇقان وز فەيسبۋك پاراقشاسىندا ناۋرىز مەرەكەسىنە وراي قالادا قانداي شارالار وتەتىنى تۋرالى اقپارات بەردى، دەپ جازادى "ادىرنا" ۇلتتىق پورتالى.
1. «شىمقالا». عاسىرلىق تاريحى بار كىلەمدەر كورمەسى، شايحانا، ءسۇت ونىمدەرى مەن تاتتىلەردىڭ سان ءتۇرى قويىلادى. مەرەكەلىك كەشتە قازاق ءداستۇرلى مۋزىكاسىنىڭ حاس مايتالماندارى، ەسترادا جۇلدىزدارى – ايگۇل يمانباەۆا، «حازار» ۇلتتىق-فولكلورلىق توبى ت.ب ارتىستەر ونەر كورسەتەدى.
2. ورتالىق ساياباق. شىمكەنتتەگى ەڭ كونە ساياباق قوناقتاردى كوڭىلدى باعدارلامامەن قۋانتۋ داستۇرىنەن اينىعان ەمەس. ەسترادا جۇلدىزدارى، ءازىل-وسپاق تەاترى، ناۋرىز كوجە جانە ينتەراكتيۆتى باعدارلاما ورتالىق ساياباققا كەلۋشىلەردىڭ نازارىنا ۇسىنىلادى.
3. اربات. قالانىڭ سۇيىكتى سەرۋەندەۋ ايماعىندا مەرەكەلىك جارمەڭكە ۇيىمداستىرىلادى. وندا سان ءتۇرلى سۋۆەنيرلەر ۇسىنىلىپ، ءداستۇرلى قازاق اسحاناسى مەن فوتوعا ءتۇسۋ الاڭى جۇمىس ىستەيدى.
4. ءال-فارابي الاڭى. باستى مەرەكەلىك كەش وتەتىن الاڭ. مارجان اراپباەۆا، تۇرار راحيمبەرلين، اقەركە تاجىباەۆا سىندى وتاندىق ەسترادا جۇلدىزدارىنىڭ جاڭا حيت اندەرىنىڭ تۇساۋى كەسىلىپ، حالىق مۋزىكاسى مەن ەتنو-فولكلورلىق تۋىندىلاردىڭ ءتولتۋما ينتەرپرەتاتسياسى سالتانات قۇرىپ، ءدام تاتتىرۋ مەن جان جادىراتار توسىن سىيلار كۇتەدى.
5. دەندرو ساياباق. شىمكەنت – تالانتتى جاستار شاھارى. بۇعان دەندرو ساياباققا ات باسىن بۇراتىن قوناقتاردىڭ كوزى جەتەدى. شىنايى بايقاۋلار، مۋزىكالىق قۇتتىقتاۋلار جانە ينتەراكتيۆتى ەكو-باعدارلاماسى بار.
6. شىمكەنت تسيركى الاڭى. بۇقارالىق الاڭدا قوناقتاردى تسيرك ارتىستەرىنىڭ قاتىسۋىمەن مازمۇندى مۋزىكالىق باعدارلاما، سايگۇلىكپەن سەرۋەندەۋ جانە ينتەراكتيۆتى كوڭىل كوتەرۋ باعدارلاماسى كۇتەدى.
7. مەتاللۋرگتەر ساياباعى. بۇل ناۋرىز-2022 مەرەكەلىك الاڭدارىنىڭ ىشىندەگى وتباسىلىق الاڭ سانالادى. ىشكى ۇيلەسىم، دوس-جاران، وتباسى مەن جاقىنداردىڭ اراسىندا جارقىن ۋاقىت وتكىزۋگە، سونداي- اق جايلىلىق پەن جانعا جايلى اڭگىمە ايتۋدى سۇيەتىندەر ءۇشىن تاپتىرماس ورىن.
8. جەڭىس ساياباعى. شاھاردىڭ ەڭ كىشكەنتاي تۇرعىندارى مەن قالا قوناقتارىنا ارنالعان الاڭ. ناۋرىز مەيرامى بارلىق لوكاتسيادا ساع. 10-00-دا باستالادى.
قاجىمۇقان اتىنداعى ورتالىق ستاديون. كوكتەم – تەك تابيعاتتىڭ جاڭارۋ كەزەڭى عانا ەمەس، سونىمەن قاتار بەلسەندى ءومىر سالتىنا قايتا ورالۋ كەزى. ستاديون ماڭىندا سپورت جارىستارى، ءداستۇرلى سپورت تۇرلەرى بويىنشا تۋرنيرلەر، ەرەكشە جارىستار ۇيىمداستىرىلادى.
"ادىرنا" ۇلتتىق پورتالى
