باتىرلاردى مايداننان امان كەلتىردى - مۇزدىباەۆ قايتا ءولتىردى - قازىبەك يسا

7725
Adyrna.kz Telegram

اماناتقا قيانات جاساعان مۇنداي  مىڭداعان مۇزدىباەۆ سياقتى اكىمدەردەن قۇتىلماي قايداعى جاڭارۋ، پرەزيدەنت مىرزا!

رەسپۋبليكالىق “قازاق ءۇنى” ۇلتتىق پورتالىنداعى بەلگىلى جۋرناليست ومىرزاق اقجىگىتتىڭ  اشىنىپ وتىرىپ جازعان (قانى قازاق، جانى ازاتتىڭ شىداۋى مۇمكىن ەمەس شىنىندا) ماقالاسىنداعى ماسقارا وقيعانى  وقىپ، مەنىڭ دە قان قىسىمىم كوتەرىلدى.

قانە، ءدارى-دارمەگىمىزدى ءىشىپ الىپ، قايتا وقىپ كورەيىك:

“اقمولا وبلىسى بۋراباي اۋدانى اكىمى اسەت مۋزدىباەۆ دەگەنىڭ اۋدان ورتالىعى ششۋچينسك كەنتىنەن ەدومسكايا (؟) كوشەسىنە باۋىرجان مومىشۇلىنىڭ، كوممۋنيستىك كوشەسىنە راحىمجان قوشقارباەۆتىڭ، ترۋدوۆايا كوشەسىنە تالعات بيگەلدينوۆتىڭ اتى بەرىلۋىنە قارسى شىعىپ، كونبەي قويىپتى:

«ونوماستيكالىق كوميسسيانىڭ وڭ شەشىمىنە قاراماستان بۇل تالقىلاۋ بولمايدى. قازىر قوعامدىق-ساياسي جاعداي بۇعان مۇمكىندىك بەرمەيدى. ەگەر كوشە اتىن وزگەرتسەك، ول جەرگە اسفالت توسەلىپ، جارىق پايدا بولا ما؟ بۇل قازىر كوتەرەتىن ماسەلە ەمەس» -دەپ وتتاپتى”-دەيدى ماقالادا.

ءيا، تۋرا وسىلاي دەپتى اكىمىڭ! باسشىسى مۇنداي بولسا، قوسشىسى وڭسىن با، قاسىندا وتىرعان ششۋچينسك (؟) قالاسىنىڭ اكىمى ەرلان قاپپاروۆ تا ونىڭ ءسوزىن قوشتاي جونەلىپ، “ەست ۆاجنەە دەلا، چەم پەرەيمەنوۆاينە ۋليتس”دەپ، الدىنا ءتۇسىپ الىپ شاۋىپتى…

بۇل نە ماسقارا!

قۇداي قازاقتىڭ قاسيەتتى قاس باتىرلارىن مۇزداي قارۋلانعان قان مايداننان امان كەلتىردى - مۇزدىباەۆ  قايتا ءولتىردى!.

قانىمىز باسىمىزعا شاپشىپ وتىرىپ،  اتاقتى ءۇش باتىردىڭ ارۋاعىنان كەشىرىم سۇراپ، دۇعا جاسادىق…

سوندا “كوممۋنيستىك” دەگەن كەڭەس يمپەرياسىنىڭ سارقىنشاق ۇعىمى ەكىنشى دۇنيەجۇزىلىك سوعىستا بەرليندى قورشاعان  الەمنىڭ 1,5 ميلليون اسكەرىنىڭ  ىشىنەن جانقيارلىق ەرلىك كورسەتىپ، رەيحستاگقا تۋ قاداعان قاھارمان راحىمجان قوشقارباەۆتان قادىرلى مە اكىم مۋزدىباەۆقا؟!.

ەرلىگى الەمگە اڭىز بولعان ءباھادۇر باۋىرجاننان “ەدومسكايا”(؟), ەكى رەت كەڭەس وداعىنىڭ باتىرى، اقيىق قىران تالعات بيگەلدينوۆتەن “ترۋدوۆايا” ارتىق پا، اكىم مۋزدىباەۆقا؟!.

“ونوماستيكالىق كوميسسيانىڭ وڭ شەشىمىنە قاراماستان بۇل تالقىلاۋ بولمايدى.”-دەپ جەكە دارا بيلەپ-توستەپ ۇيرەنگەن اكىم. وندا ءبارىن ءوزى شەشسە، ونوماستيكالىق كوميسسيا ويىنشىق بولسا، ونى نە ءۇشىن قۇرعان؟!. سول باياعى كوزبوياشىلىق پا؟

“قازىر قوعامدىق-ساياسي جاعداي بۇعان مۇمكىندىك بەرمەيدى. بۇل قازىر كوتەرەتىن ماسەلە ەمەس”-دەپ كولگىرسيدى اكىم.

قازىر ساياسي جاعداي قيىن بولاتىنداي نەمەنە، بۋرابايدى جاۋ شاۋىپ پا؟!.  قاڭتارداعى وقيعانىڭ ءبىر ۇشقىنى عانا جەتسە، كولەڭكەسى دە تابىلمايدى عوي مىنا اكىمنىڭ… 30 جىل ورنىنان قوزعالماعان كوشە  اتتارىن  قازاقىلاندىرۋ قازىر كوتەرەتىن ماسەلە بولماعاندا، ەندى تاعى 30 جىل كۇتۋ كەرەك پە؟

مەنىڭ تاڭعالعانىم، بۇكىل قازاققا ورتاق بۇل ءۇش باتىرىمىزدىڭ بارلىق جەردە كوشەسى بار دا، بۋرابايدا نەگە جوق ءالى؟ اكىم قاتتى قورعاپ وتىرعان ەدومسكايا، كوممۋنيستىك كوشەلەرى بار دا، ەرلەرىمىزدىڭ اتىندا نەگە جوق؟ مەن بىلسەم، راحىمجان قوشقارباەۆ پەن تالعات بيگەلدينوۆ وسى اقمولا وڭىرىنەن. ال باۋكەڭنىڭ ءتىپتى شەتەلدەردە دە كوشەسى بار.

قاشان بۋرابايدا قازاقتىڭ ۇلى تۇلعالارىنىڭ اتى اسقاقتايدى؟

ۇلتتىق  مۇددەنى قورعاپ، كوشە اتتارىن قازاقىلاندىرۋدا قايرات كورسەتىپ، شىرىلداپ جۇرگەنى ءۇشىن بۋراباي اۋداندىق مادەنيەت جانە تىلدەردى دامىتۋ ءبولىمى مەڭگەرۋشىسى دينا قاسىمباەۆاعا راحمەت. اكىمنىڭ ايەل عۇرلى قاۋقارى جوق ەكەنى ۇسقىنىنان-اق كورىنىپ تۇرعانى ايانىشتى…

“ەگەر كوشە اتىن وزگەرتسەك، ول جەرگە اسفالت توسەلىپ، جارىق پايدا بولا ما؟”-دەيدى اكىم مۋزدىباەۆ.

مىنە، بىزدەگى اۋدان اكىمدەرىنىڭ اسفالتتان دا تومەن ويلاۋ دەڭگەيى!  اسفالت پەن جارىق ۇلتتىق رۋحتان قىمبات پا سوندا؟!.

بۇنداي، ءومىرى ۇلتتىق رۋح، بابالار مۇراسى، ءداستۇر جالعاستىعى، قاسيەت پەن وسيەت، تاريحي تانىم  مەن وتكەندى قاستەرلەۋ، ۇلت ۇلىلارىن ۇلىقتاۋ، ۇرپاق ساباقتاستىعى،  مەملەكەتتىلىك پەن ۇلتشىلدىق، پاتريوتيزم، ەلدى، وتاندى ءسۇيۋ ۇعىمدارىنان جۇرداي پاقىر قالاي اكىم بولىپ، اۋدان باسقارىپ ءجۇر؟!. بىراق بىزدە ءبارى بولا بەرەتىنىن 30 جىلدان بەرى كورىپ كەلەمىز عوي…

بۇل باسقارىپ وتىرعان بۋراباي اۋدانى  اتاقتى ايبارلى ابىلاي حاننىڭ اق ورداسى، تاۋەلسىزدىك ءۇشىن كۇرەسكەن سوڭعى حانىمىز كەنەسارىنىڭ  كيەلى مەكەنى بولعانىن بىلە مە ەكەن ءوزى؟!.  ءاي، قايدام!؟. جالپى، سول حانداردىڭ ءوزىن بىلەتىنىنە كۇمانىم بار مىناۋ ماسقارا بىلىعىنا قاراعاندا…

بالكىم، ابىلايدىڭ تۇسىندەگى باقا-شايانعا اينالىپ كەتكەن، ازعان ۇرپاعىنىڭ ءبىرى  سول بۋراباي باۋرايىندا ءجۇر مە ەكەن؟!.

بۇلار ءتىپتى،  بۇدان 30 جىل بۇرىن تاۋەلسىزدىك العانىمىزدىڭ ءوزىن بىلە مە ەكەن؟!.

بىراق، تاڭعالاتىن ەشنارسە جوق! مۇنداي مۇزدىباەۆتار مىڭداپ سانالادى!

مىنە، ءبىزدىڭ 30 جىلعى ۇلتسىزدىق يدەولوگيامىز!

مىنە، ءبىزدىڭ تاۋەلسىزدىكتىڭ بەرىك تىرەگى  بولۋى ءتيىس ۇلتتىق يدەولوگيادان 30 جىلدان بەرى تۇك تە ىستەلمەگەنى!

جيىندا وتىرعاننىڭ ىشىندە ءبىر ورىس جوق، مۋزدىباەۆتان باستاپ ءبارى ءبىر اۋىز قازاقشا قوسپاي تەك رەسەي تىلىندە سويلەپ وتىر! مىناۋ ۆيدەونى كورگەندەر  بۇل ءبىر رەسەي گۋبەرنياسىنىڭ الىس ورماندى تۇكپىرىندە ءوتىپ جاتقان جيىن ەكەن دەپ ويلاپ قالاتىنى انىق…  تىلدەرى ورىسشا بولعانمەن، تۇرلەرى ۇقساماعاسىن كىمدەرگە ۇقساتاتىنىن كىم ءبىلسىن…

بۇل تۇرلەرىمەن بۇل ەكى اكىمنىڭ دە اقمولا وبلىسى اكىمى ەرمەك مارجىقپاەۆپەن دە، ءتىپتى پرەزيدەنتپەن دە رەسەي تىلىندە سويلەسەتىنى انىق!

جالپى، مۇنداي مۋزدىباەۆتار بىزدە ءالى كۇنگە مىڭداپ سانالاتىنى وزەك ورتەر وكىنىشتى!

اسەت مۋزدىباەۆتىڭ (تولقۇجاتىندا دا، قاي جەردە دە اسەت مۇزدىباي دەپ ءومىرى جازىپ كورمەگەنىنە ءباس تىگەمىن) بۇرىنعى “نۇر وتان”، قازىرگى “امانات” پارتياسىنىڭ  مۇشەسى ەكەنى، جاي مۇشەسى ەمەس اۋداندىق فيليالىنىڭ توراعاسى ەكەنى  ايدان انىق.

كەشە عانا پارتيا اتىن “امانات” دەگەن كيەلى ۇعىمدى بىلدىرەتىن اتاۋعا اۋىستىرىپ تۇرىپ، قر پرەزيدەنتى قاسىم-جومارت توقاەۆ: ء“بىز "امانات" دەگەن اتاۋعا توقتادىق. "امانات" قازاق تىلىنەن اۋدارعاندا بابالار وسيەتى، ۇرپاققا امانات دەگەن ماعىنانى بىلدىرەدى. سوندىقتان پارتيانىڭ "امانات" دەپ اتالۋىن رەسمي تۇردە قولدايمىن. مەملەكەتتىلىك، ءداستۇر جالعاستىعى، ۇرپاق ساباقتاستىعى دەگەنىمىز، مىنە، وسى. حالقىمىز ەشقاشان اماناتقا قيانات جاساماعان. پارتيا بۇل قاعيداتتى بەرىك ۇستانادى»، –دەپ مالىمدەگەن ەدى.

ال قازاقتىڭ اتى اڭىزعا اينالعان ناعىز باتىرلارىنىڭ اتىن كاستەرلەۋ - بابالار اماناتى!

ەرەكشە ەرلەرىمىزدىڭ ەسىمدەرىن قادىرلەۋ - ەل اماناتى!

ۇلتتىق مۇددەمىزدى قورعاپ، ۇلىلارىمىزدى ۇلىقتاۋ - ۇلت اماناتى!

ەندەشە، اقمولا وبلىسى بۋراباي اۋدانى اكىمى اسەت مۋزدىباەۆ ءوز پارتياسى اتىن الىپ وتىرعان ۇلت اماناتىن  تابانعا تاپتاپ، قازاقتى قىزىل قانعا باتىرعان قىزىل يمپەريا پارتياسىنىڭ اتىن ساقتاپ قالىپ وتىرعان جوق پا؟!.

ياعني، اماناتقا قيانات جاساپ وتىرعان مۇنداي  مىڭداعان مۇزدىباەۆ سياقتى اكىمدەردەن قۇتىلماي قايداعى جاڭارۋ، قايداعى “جاڭا قازاقستان”،  قادىرلى پرەزيدەنت قاسىم-جومارت كەمەلۇلى!

قازىبەك يسا، قر پارلامەنتى ءماجىلىسى دەپۋتاتى

پىكىرلەر