Batyrlardy maıdannan aman keltirdi - Muzdybaev qaıta óltirdi - Qazybek Isa

7726
Adyrna.kz Telegram

Amanatqa qııanat jasaǵan mundaı  myńdaǵan Muzdybaev sııaqty ákimderden qutylmaı qaıdaǵy jańarý, Prezıdent myrza!

Respýblıkalyq “Qazaq úni” ulttyq portalyndaǵy belgili jýrnalıst Ómirzaq Aqjigittiń  ashynyp otyryp jazǵan (qany qazaq, jany azattyń shydaýy múmkin emes shynynda) maqalasyndaǵy masqara oqıǵany  oqyp, meniń de qan qysymym kóterildi.

Qane, dári-dármegimizdi iship alyp, qaıta oqyp kóreıik:

“Aqmola oblysy Býrabaı aýdany ákimi Aset Mýzdybaev degeniń aýdan ortalyǵy ýchınsk kentinen Edomskaıa (?) kóshesine Baýyrjan Momyshulynyń, Kommýnıstik kóshesine Rahymjan Qoshqarbaevtyń, Trýdovaıa kóshesine Talǵat Bıgeldınovtiń aty berilýine qarsy shyǵyp, kónbeı qoıypty:

«Onomastıkalyq komıssııanyń oń sheshimine qaramastan bul talqylaý bolmaıdy. Qazir qoǵamdyq-saıası jaǵdaı buǵan múmkindik bermeıdi. Eger kóshe atyn ózgertsek, ol jerge asfalt tóselip, jaryq paıda bola ma? Bul qazir kóteretin másele emes» -dep ottapty”-deıdi maqalada.

Iá, týra osylaı depti ákimiń! Basshysy mundaı bolsa, qosshysy ońsyn ba, qasynda otyrǵan ýchınsk (?) qalasynyń ákimi Erlan Qapparov ta onyń sózin qoshtaı jónelip, “est vajnee dela, chem pereımenovaıne ýlı”dep, aldyna túsip alyp shaýypty…

Bul ne masqara!

Qudaı qazaqtyń qasıetti qas batyrlaryn muzdaı qarýlanǵan qan maıdannan aman keltirdi - Muzdybaev  qaıta óltirdi!.

Qanymyz basymyzǵa shapshyp otyryp,  ataqty úsh batyrdyń árýaǵynan keshirim surap, duǵa jasadyq…

Sonda “Kommýnıstik” degen Keńes ımperııasynyń sarqynshaq uǵymy Ekinshi dúnıejúzilik soǵysta Berlındi qorshaǵan  álemniń 1,5 mıllıon áskeriniń  ishinen janqııarlyq erlik kórsetip, Reıhstagqa tý qadaǵan qaharman Rahymjan Qoshqarbaevtan qadirli me ákim Mýzdybaevqa?!.

Erligi álemge ańyz bolǵan bahadúr Baýyrjannan “Edomskaıa”(?), eki ret Keńes Odaǵynyń Batyry, aqıyq qyran Talǵat Bıgeldınovten “Trýdovaıa” artyq pa, ákim Mýzdybaevqa?!.

“Onomastıkalyq komıssııanyń oń sheshimine qaramastan bul talqylaý bolmaıdy.”-dep jeke dara bılep-tóstep úırengen ákim. Onda bárin ózi sheshse, onomastıkalyq komıssııa oıynshyq bolsa, ony ne úshin qurǵan?!. Sol baıaǵy kózboıashylyq pa?

“Qazir qoǵamdyq-saıası jaǵdaı buǵan múmkindik bermeıdi. Bul qazir kóteretin másele emes”-dep kólgirsıdi ákim.

Qazir saıası jaǵdaı qıyn bolatyndaı nemene, Býrabaıdy jaý shaýyp pa?!.  Qańtardaǵy oqıǵanyń bir ushqyny ǵana jetse, kóleńkesi de tabylmaıdy ǵoı myna ákimniń… 30 jyl ornynan qozǵalmaǵan kóshe  attaryn  qazaqylandyrý qazir kóteretin másele bolmaǵanda, endi taǵy 30 jyl kútý kerek pe?

Meniń tańǵalǵanym, búkil qazaqqa ortaq bul úsh batyrymyzdyń barlyq jerde kóshesi bar da, Býrabaıda nege joq áli? Ákim qatty qorǵap otyrǵan Edomskaıa, Kommýnıstik kósheleri bar da, Erlerimizdiń atynda nege joq? Men bilsem, Rahymjan Qoshqarbaev pen Talǵat Bıgeldınov osy Aqmola óńirinen. Al Baýkeńniń tipti shetelderde de kóshesi bar.

Qashan Býrabaıda qazaqtyń uly tulǵalarynyń aty asqaqtaıdy?

Ulttyq  múddeni qorǵap, kóshe attaryn qazaqylandyrýda qaırat kórsetip, shyryldap júrgeni úshin Býrabaı aýdandyq Mádenıet jáne tilderdi damytý bólimi meńgerýshisi Dına Qasymbaevaǵa rahmet. Ákimniń áıel ǵurly qaýqary joq ekeni usqynynan-aq kórinip turǵany aıanyshty…

“Eger kóshe atyn ózgertsek, ol jerge asfalt tóselip, jaryq paıda bola ma?”-deıdi ákim Mýzdybaev.

Mine, bizdegi aýdan ákimderiniń asfalttan da tómen oılaý deńgeıi!  Asfalt pen jaryq Ulttyq rýhtan qymbat pa sonda?!.

Bundaı, ómiri ulttyq rýh, babalar murasy, dástúr jalǵastyǵy, qasıet pen ósıet, tarıhı tanym  men ótkendi qasterleý, ult ulylaryn ulyqtaý, urpaq sabaqtastyǵy,  Memlekettilik pen Ultshyldyq, Patrıotızm, Eldi, Otandy súıý uǵymdarynan jurdaı paqyr qalaı ákim bolyp, aýdan basqaryp júr?!. Biraq bizde bári bola beretinin 30 jyldan beri kórip kelemiz ǵoı…

Bul basqaryp otyrǵan Býrabaı aýdany  ataqty aıbarly Abylaı hannyń aq ordasy, Táýelsizdik úshin kúresken sońǵy hanymyz Kenesarynyń  kıeli mekeni bolǵanyn bile me eken ózi?!.  Áı, qaıdam!?. Jalpy, sol handardyń ózin biletinine kúmánim bar mynaý masqara bylyǵyna qaraǵanda…

Bálkim, Abylaıdyń túsindegi baqa-shaıanǵa aınalyp ketken, azǵan urpaǵynyń biri  sol Býrabaı baýraıynda júr me eken?!.

Bular tipti,  budan 30 jyl buryn Táýelsizdik alǵanymyzdyń ózin bile me eken?!.

Biraq, tańǵalatyn eshnárse joq! Mundaı Muzdybaevtar myńdap sanalady!

Mine, bizdiń 30 jylǵy Ultsyzdyq ıdeologııamyz!

Mine, bizdiń Táýelsizdiktiń berik tiregi  bolýy tıis Ulttyq ıdeologııadan 30 jyldan beri túk te istelmegeni!

Jıynda otyrǵannyń ishinde bir orys joq, Mýzdybaevtan bastap bári bir aýyz qazaqsha qospaı tek Reseı tilinde sóılep otyr! Mynaý vıdeony kórgender  bul bir Reseı gýbernııasynyń alys ormandy túkpirinde ótip jatqan jıyn eken dep oılap qalatyny anyq…  Tilderi oryssha bolǵanmen, túrleri uqsamaǵasyn kimderge uqsatatynyn kim bilsin…

Bul túrlerimen bul eki ákimniń de Aqmola oblysy ákimi Ermek Marjyqpaevpen de, tipti Prezıdentpen de Reseı tilinde sóılesetini anyq!

Jalpy, mundaı Mýzdybaevtar bizde áli kúnge myńdap sanalatyny ózek órter ókinishti!

Aset Mýzdybaevtyń (tólqujatynda da, qaı jerde de Áset Muzdybaı dep ómiri jazyp kórmegenine bás tigemin) burynǵy “Nur Otan”, qazirgi “Amanat” partııasynyń  múshesi ekeni, jaı múshesi emes aýdandyq fılıalynyń tóraǵasy ekeni  aıdan anyq.

Keshe ǵana partııa atyn “Amanat” degen kıeli uǵymdy bildiretin ataýǵa aýystyryp turyp, QR Prezıdenti Qasym-Jomart Toqaev: “Biz "Amanat" degen ataýǵa toqtadyq. "Amanat" qazaq tilinen aýdarǵanda babalar ósıeti, urpaqqa amanat degen maǵynany bildiredi. Sondyqtan partııanyń "Amanat" dep atalýyn resmı túrde qoldaımyn. Memlekettilik, dástúr jalǵastyǵy, urpaq sabaqtastyǵy degenimiz, mine, osy. Halqymyz eshqashan amanatqa qııanat jasamaǵan. Partııa bul qaǵıdatty berik ustanady», –dep málimdegen edi.

Al Qazaqtyń aty ańyzǵa aınalǵan naǵyz batyrlarynyń atyn kasterleý - Babalar Amanaty!

Erekshe Erlerimizdiń esimderin qadirleý - El Amanaty!

Ulttyq múddemizdi qorǵap, Ulylarymyzdy ulyqtaý - Ult Amanaty!

Endeshe, Aqmola oblysy Býrabaı aýdany ákimi Aset Mýzdybaev óz partııasy atyn alyp otyrǵan Ult Amanatyn  tabanǵa taptap, qazaqty qyzyl qanǵa batyrǵan qyzyl ımperııa partııasynyń atyn saqtap qalyp otyrǵan joq pa?!.

Iaǵnı, Amanatqa qııanat jasap otyrǵan mundaı  myńdaǵan Muzdybaev sııaqty ákimderden qutylmaı qaıdaǵy jańarý, qaıdaǵy “Jańa Qazaqstan”,  qadirli Prezıdent Qasym-Jomart Kemeluly!

Qazybek ISA, QR Parlamenti Májilisi depýtaty

Pikirler