Qyzylorda oblysy Aral aýdanynda turatyn Renat Jetkergenov áskerge saý ketip, úıine esi aýysyp kelgen. Bul týraly “Adyrna” ulttyq portaly Astana telearnasyna silteme jasap habarlaıdy.
Renattyń áskerdegi dosy batyldyq tanytyp, shyn máninde áskerde ne bolǵanyn aıtyp berdi.
Qazirgi tańda Renattyń áskerden osyndaı kúıde kelýine baılanysty qylmystyq is qozǵalyp, tergeý amaldary júrip jatyr.
QR Qorǵanys mınıstrligi 19 jastaǵy jigit áskerde zorlyq-zombylyq kórdi degenmen kelispeıdi. Basynda oqıǵaǵa qatysty pikir bildirýden at-tondaryn alyp qashqan áskerıler endi jaǵdaıdy túsindirip berdi.
Eske salsaq, buǵan deıin Renattyń jaqyndary uldarynyń áskerden esinen aljasyp qaıtqanyn aıtyp, dabyl qaqqan.
Áskerden qaıtýyna 8 kún qalǵanda Renatty tórt áskerı ákep tastaǵan. Áskerılerdiń biri Amangeldi Kópjannyń aıtýynsha, Renattyń kıimi bútin bolǵan, aıaǵyna yńǵaıly bolý úshin jazdyq aıaq-kıim kıgen. Sebebi, buǵan deıin onyń jaqyndary Renatty kórgende ony tanymaı qalǵandaryn aıtqan.
Áskerıdiń aıtýynsha, ákesi Renattyń densaýlyǵy týraly bilmegen. Ony kútip alýǵa aǵasy kelgen.
– Ol jerde sol kisiniń aǵasy boldy Baqtııar degen. Sol kisi aıtady da: «bir áýlıe bar dep. Men sol áýlıeden qońyraý shalyp suradym. Sender ony qamaǵansyńdar, urǵansyńdar, sosyn esinen aljastyryp jibergensińder» deıdi. Uryp jibersek ol jerge baryp ne qylamyz? – dedi dıvızıon komandıriniń TJIJ boıynsha orynbasary Amangeldi Kópjan.
Aqtaý qalasyndaǵy 25/744 Teńiz jaıaý áskerleri bóliminiń qyzmetkerleri «balany urmadyq» deıdi. Tipti ony dáleldeý úshin ony medıınalyq tekserýge alyp baraıyq dep usynys ta jasaǵan. Biraq Renattyń jaqyndary oǵan qulaq aspaı, olardy suraq astyna alǵan.
Buǵan deıin jigittiń áskerge qabyldanǵan kezinde densaýlyǵy jaqsy bolǵany aıtylǵan. Onyń áskerge qalaı qabyldanǵany týraly aýdandyq qorǵanys isteri jónindegi bólimniń basshysy aıtyp berdi.
«Oblystyq komıssııanyń qorytyndysy boıynsha «A» belgisimen, ıaǵnı jaramdy bolyp ótti. Birinshi satydaǵy jaramdy bala. Psıhologııalyq testileýden de jaqsy ótken» deıdi Qyzylorda oblysy Aral aýdandyq qorǵanys isteri jónindegi bólim basshysy Baýyrjan Qýatov.
Áskerı bólim qyzmetkerleri men Qorǵanys mınıstrligi ne dese de Renattyń áskerde birge bolǵan qarýlas dosy múlde basqasha málimdeme aıtty. Onyń aıtýynsha, Renat áskerden úıge qaıtýǵa bir apta qalǵanda komandırlermen sózge kelisip qalǵan. Keıin múlde kórinbeı ketip, tek qaıtatyn kezde paıda bolǵan.
– Sózge kelip qalǵan kúnnen bastap Renatty alyp ketti bólimniń syrtyndaǵy kazarmaǵa. Sodan bastap Renatty bir apta kórmedik. Poıyzda kórgen kezde Renat basqa jaǵdaıda boldy. Baıaǵy bir jyl qyzmet ketken Renat joq. Túri basqa, tanymaı qaldyq ony, – deıdi Renattyń áskerdegi joldasy Bekarys Tańatarov.
Týystarynyń aıtýynsha, áskerde ony 8 kún boıy qınaǵan. Ony tipti «esi aýysqan» Renattyń ózi de abaısyzda aıtyp qalǵan. Qulaǵyn tesip, «áıel etip alamyz» degen kórinedi.
Bul jaǵdaıdy estigen 19 jastaǵy jigittiń ata-anasy tıisti organdarǵa shaǵym túsirgen. Qazir tergeý amaldary júrip jatyr.
«Qylmystyq is aıasynda tıisti saraptamalar júrgizilip Renat Jetkergenovtyń týystarynyń barlyq tujyrymdary muqııat tekseriledi. Sondaı-aq tergeýdiń tolyqtyǵy men obektıvtiligin qamtamasyz etýge baǵyttalǵan basqa da tergeý is-sharalary júrgiziletin bolady» dep málimdedi QR QK áskerı polıııa basqarmasy basshysynyń orynbasary Beken Shyntileýov.
Eske salsaq, buǵan deıin Qyzylorda oblysynda áskerden kelgen 19 jastaǵy jigittiń esi aýysqany týraly aıtylǵan. Belgili bolǵandaı, bul Aqtaýdaǵy 25/744 áskerı bóliminde bolyp otyrǵan birinshi jaǵdaı emes.
“Adyrna” ulttyq portaly
