Foto: Aqorda
Qazaqstan Prezidentı Qasym-Jomart Toqaev Konstitusiia talaptaryn būzǧandarǧa qatysty qataŋ şara qoldanylatynyn mälımdedı. Memleket basşysy memlekettık kompaniialardaǧy sybailas jemqorlyq mäselesın köterıp, Ükımet pen baqylauşy organdarǧa tiıstı şaralar äzırleudı tapsyrdy. Būl turaly Aqorda jazdy, dep habarlaidy “Adyrna".
Bügın Prezidenttıŋ töraǧalyǧymen Qazaqstan Respublikasy Qauıpsızdık Keŋesınıŋ kölık-logistika salasyn damytu mäselelerıne arnalǧan şūǧyl otyrysy öttı.
Jiynda söz söilegen Qasym-Jomart Toqaev Konstitusiianyŋ memlekettıŋ qūqyqtyq negızı retındegı maŋyzyn atap öttı. Onyŋ aituynşa, Ata zaŋnyŋ negızgı talaptaryn elemeu eldıŋ abyroiyna jäne qoǧamnyŋ memlekettık instituttarǧa degen senımıne nūqsan keltıredı.
"Konstitusiia – memleketımızdıŋ negızgı zaŋy, būl – halqymyzdyŋ qūqyqtyq tölqūjaty. Sondyqtan Konstitusiiany külkı qylu, onyŋ negızgı erejelerın mensınbeu halqymyzdy kemsıtumen bırdei. Ondai äreket jasaǧandar "Zaŋ men Tärtıp" qaǧidatyna säikes qataŋ türde jazaǧa tartylady. Mäsele memleketımızdıŋ abyroiy, qoǧamnyŋ ūlttyq instituttarǧa degen senımı, Qazaqstannyŋ halyqaralyq bedelı turaly bolǧanda bız, halyq bilık etu ökıldıgın bergen tūlǧalar, ūlt müddesın qorǧau jolynda aianbai eŋbek etuımız kerek, sol üşın qolymyzdan kelgennıŋ bärın jasauymyz kerek. Būl – azamattyq jäne saiasi boryşymyz", - dedı Toqaev.
Prezident «Samūryq-Qazyna» qorynyŋ jauapkerşılıgıne de toqtaldy. Onyŋ aituynşa, qor elımızdıŋ strategiialyq aktivterın basqaryp, ırı investisiialyq jobalardy jüzege asyrady. Sonymen qatar şeteldık ırı kompaniialarmen jäne halyqaralyq qarjy instituttarymen ärıptestık ornatqan.
"Tüptep kelgende, kez kelgen kelısımnıŋ, serıktestıktıŋ artynda ūzaq jyldar boiy jasalatyn köptegen kelıssözder, sonyŋ ışınde halyqaralyq qauymdastyqtyŋ elımızge degen ülken senımı men memleketımızge jüktelgen naqty mındetter tūrady", - dedı Memleket basşysy.
Qasym-Jomart Toqaev joǧary lauazym ielerınıŋ jauapkerşılıgıne erekşe nazar audardy. Onyŋ pıkırınşe, qyzmetı men tanystyq bailanystaryna qaramastan, barlyq azamat zaŋ talaptaryn saqtauy kerek.
"Joǧary lauazymǧa ie bolu – ärqaşan jäne ärdaiym jükteletın joǧary jauapkerşılıktı dūrys tüsınu degen söz. Qoǧamymyzda atqaratyn lauazymyna, sıŋırgen eŋbegıne ne bolmasa tamyr-tanystaryna, sonyŋ ışınde tuystyq bailanystaryna qaramastan, eşkım de zaŋnan attap kete almaidy. Būl – men üşın myzǧymaityn, iaǧni özgermeitın ūstanym. Soŋǧy kezde bız keibır kelısımder men şarttardy qaita qaradyq. Menıŋşe, olarǧa qol qoiu qate şeşım bolǧan", - dedı Prezident.
Sonymen bırge Memleket basşysy käsıpkerlerge qatysty memlekettık saiasat özgermeitının jetkızdı. Onyŋ sözınşe, bilık bizneske kedergı keltırudı emes, kerısınşe, qoldau körsetudı közdeidı.
"Kerısınşe, bız olarǧa ärdaiym jan-jaqty qoldau körsetıp jatyrmyz jäne aldaǧy uaqytta da solai bolady. Bärıŋız de bılesızder, men kelesı jyldyŋ 1 qaŋtarynan bastap şaǧyn käsıpkerlıktı tekseruge arnalǧan taǧy bır üş jyldyq moratorii jariialau turaly tapsyrmamdy berdım. Elımızde bırtındep ornyǧyp jatqan "Zaŋ men Tärtıp" qūqyqtyq strategiiasynyŋ tüpkı mänı de – osy: ädılettılık qaǧidatyna jäne zaŋ talaptaryna sai kömekke mūqtaj adamdarǧa, sondai-aq käsıporyndarǧa qoldau körsetu.
Jaǧdai qanşalyqty kürdelı bolsa da "Samūryq-Qazyna" ūlttyq äl-auqat qorynyŋ apparaty men memlekettık kompaniialardyŋ, sonyŋ ışınde "Qazaqstan temır jolynyŋ" jūmysy toqtap qalmaidy, üzdıksız jüre beredı. Memlekettık kompaniialarǧa qarasty barlyq mekemeler qalypty tärtıppen jūmys ıstep jatyr.
Jalpy, būǧan eşqandai sebep te joq. Kerısınşe, jemqorlyqqa qarsy jürgızılıp jatqan küres investorlar men nesie beruşılerdıŋ atalǧan institutqa degen senımın arttyryp, olardyŋ meilınşe tiımdı, aşyq jäne jemıstı jūmys ısteuıne mümkındık beredı dep sanaimyn", - dedı Memleket basşysy.
Prezident Bas prokuraturanyŋ zaŋsyz iemdenılgen aktivterdı qaitaru jūmysyna da toqtaldy. Onyŋ mälımetınşe, memleketke jalpy somasy 1,3 trillion teŋgeden asatyn qarajat qaitarylǧan.
Būl qarjyǧa 466 äleumettık jäne infraqūrylymdyq nysan salu josparlanǧan. Qazırgı uaqytta olardyŋ 383-ınıŋ qūrylysy aiaqtalǧan. Atap aitqanda, medisinalyq mekemeler, sumen jabdyqtau jelılerı, mektepter men sport keşenderı paidalanuǧa berılgen.
Alaida Prezident keibır nysandardyŋ, sonyŋ ışınde joldardyŋ sapasyna qatysty mäseleler bar ekenın atap öttı. Sondyqtan qūrylys jūmystarynyŋ oryndaluyn tekseru qajettıgın aitty.
"Qalyptasqan jaǧdaiǧa qaraǧanda, nysandar qanşalyqty sapaly salynǧanyn tekseruge sebep bar siiaqty. Öitkenı nysandardyŋ, sonyŋ ışınde joldardyŋ sapasy talapqa sai bolmaityn jaǧdai jiı kezdesedı. Degenmen osy oqiǧanyŋ özı jemqorlyqqa qatysty qūqyq būzuşylyqtar memlekettık kompaniialardyŋ eŋ osal tūsy, iaǧni, basty dertı ekenın aiqyn körsetıp otyr.
Osy oraida, Ükımet pen baqylauşy organdar biyl 24 qaraşaǧa deiın sybailas jemqorlyqqa qatysty qūqyqbūzuşylyqtardy barynşa azaitu, kvazimemlekettık sektordaǧy kompaniialar men olardyŋ qyzmetkerlerınıŋ jūmys sapasyn aitarlyqtai jaqsartu jönınde maǧan ūsynys bersın", - dedı Toqaev.
Eske salaiyq, 12 qaraşada Ūlttyq qauıpsızdık komitetı Sybailas jemqorlyqqa qarsy ıs-qimyl qyzmetınıŋ «Samūryq-Qazyna» AQ basqarma töraǧasy Nūrlan Jaqypovty, «Qazaqstan temır joly» ŪK» AQ basşysy Eljas Otynşievtı jäne basqa da tūlǧalardy ūstaǧanyn resmi türde rastady.
ŪQK mälımetınşe, ūstalǧandar sybailas jemqorlyq qylmystaryn jasady degen küdıkke ılıngen. Qazır oqiǧanyŋ män-jaiyn anyqtau maqsatynda sotqa deiıngı tergeu amaldary jürgızılıp jatyr.
Vedomstvo Qylmystyq-prosestık kodekstıŋ 201-babyna säikes tergeu barysy turaly qosymşa aqparat taratudan bas tartty.
Aita keteiık, Eljas Otynşiev «Qazaqstan temır joly» ūlttyq kompaniiasynyŋ basşysy qyzmetıne taǧaiyndalǧannan keiın tört aiǧa jetpei ūstalǧan.
12 qaraşada äleumettık jelılerde Astanadaǧy Qonaev köşesınde ornalasqan tūrǧyn üi keşenınıŋ maŋynda şaşylyp jatqan dollarlar tüsırılgen video tarady. Jazbada AQŞ valiutasynyŋ bırneşe bumasy jerde jatqanyn köruge bolady.
Äleumettık jelı qoldanuşylary būl aqşany «Samūryq-Qazyna» men QTJ basşylarynyŋ ūstaluymen bailanystyruy mümkın degen boljam jasady.
Sondai-aq tıntu kezınde ūstalǧandardyŋ bırınıŋ jūbaiy aqşa salynǧan sömkeler men chemodandardy päter terezesınen laqtyryp jıbergenı turaly aqparat tarady.
Alaida būl mälımetter äzırge resmi türde rastalǧan joq. Köşeden tabylǧan banknottardyŋ tergeu ısıne qatysy bary jönınde de qūzyrly organdar naqty aqparat bergen joq.
Būdan bölek, äleumettık jelılerde «Samūryq-Qazyna» jäne QTJ basşylarynyŋ ūstalu sätı boluy mümkın beinejazbalar jariialandy. Onyŋ män-jaiy da äzırge resmi naqtylanbaǧan.
