Qazaqstanda Prezident Qasym-Jomart Toqaevtyŋ töraǧalyǧymen ötken Qauıpsızdık Keŋesınıŋ otyrysynda maqūldanǧan Äskeri reforma josparyn jüzege asyru bastaldy.
Özgerıster Qaruly küşterdıŋ qūrylymyn, äskeri basqaru jüiesın, äskerlerdıŋ daiarlyǧyn, äskeri qyzmet ötkeru tärtıbın jäne äskeri qyzmetşılerdıŋ qūqyǧyn qorǧau mäselelerın qamtidy.
Memleket basşysy zamanaui, ūtqyr ärı tehnologiialyq tūrǧydan damyǧan armiia qalyptastyru mındetın qoidy. Būl rette äskeri qyzmettıŋ qauıpsızdıgıne, komandirlık mädenietke jäne memlekettık resurstardy tiımdı paidalanuǧa erekşe nazar audarylady.
Qaruly küşterdıŋ qūrylymy men qūramy, qorǧanysty josparlau, jūmyldyru daiyndyǧy jäne rezervtı qalyptastyru jüiesı syndy armiianyŋ negızgı qūramdas bölıkterın jetıldıru josparlanyp otyr.
Tehnologiialyq qaita jaraqtandyru otandyq qorǧanys önerkäsıbın damytumen, onyŋ ışınde ūşqyşsyz qūraldarǧa qarsy ıs-qimyl qūraldaryn öndırumen, sondai-aq jasandy intellekt pen sifrlyq şeşımderdı engızumen qatar jüzege asyrylmaq.
Äskerlerdıŋ daiyndyq sapasyn arttyru jäne äskeri oqu-jattyǧulardy ötkızuge jūmsalatyn şyǧyndardy azaitu maqsatynda ūrys qimyldaryn modeldeuge mümkındık beretın simuliasiialyq baǧdarlamalardy engızu közdelıp otyr. Endı äskeri qyzmetşılerdıŋ jaŋa taktikany meŋgeruın, zamanaui qaru-jaraq ülgılerın qoldanuyn eskere otyryp, olardyŋ öz betınşe de, bölımşeler qūramynda da senımdı äreket etu daǧdylaryn qalyptastyruǧa erekşe nazar audarylady.
Negızgı özgerısterdıŋ bırı – merzımdı äskeri qyzmettıŋ ekı kezeŋdı modelıne köşu. Alǧaşqy alty aida bır şaqyrylymdaǧy sarbazdar oqu ortalyqtarynda bolyp, äskeri qyzmetke beiımdeledı, bastapqy äskeri bılım alady jäne dene daiyndyǧyn şyŋdaidy. Oqu üderısı aiasynda sarbazdar tıl üirenıp, jasandy intellektını paidalanu daǧdylaryn damyta alady. Sonymen qatar äskeri qyzmetşıler äskeri mamandyqtarmen qatar, eŋbek naryǧynda sūranysqa ie azamattyq jūmysşy käsıpterın de meŋgere alady.
Kelesı alty aida äskeri qyzmetşıler äskeri bölımderde qyzmet atqaryp, jauyngerlık daiarlyǧyn jetıldırıp, bölımşe qūramynda qoiylǧan mındetterdı oryndaidy. Jaŋa modeldıŋ jekelegen elementterı «Sarbaz+» jobasy aiasynda synaqtan ötkızıldı. Ekı kezeŋdı merzımdı äskeri qyzmet modelınıŋ pilottyq jobasyn 2027 jyly ıske qosu josparlanǧan.
Äskeri qyzmet ötkeru jaǧdailaryn jaqsartuǧa jäne äskeri qyzmetşılerdı äleumettık qorǧauǧa erekşe köŋıl bölınedı. Sondai-aq äskeri bölımderdıŋ qolbasşylyǧyna täuelsız äskeri keŋesşıler institutyn qūru közdelıp otyr. Olar äskeri qyzmetşılerge qoldau körsetıp, qūqyq būzuşylyqtardy anyqtauǧa jäne olardyŋ zaŋdy müddelerın qorǧauǧa kömektesedı.
Basym mındetterdıŋ bırı – äskeri qyzmetşılerdı sapaly tamaqpen jäne äskeri kiım-keşekpen qamtamasyz etu. Sonymen qatar kazarmalar qoryn, oqu nysandary men äskeri poligondardy jöndeu jäne qalpyna keltıru de josparlanuda.
Özgerıster jastardy daiarlau jüiesın de qamtidy. 2027 jyldan bastap «Jas qyran», «Jas ūlan» jäne «Jas sarbaz» kezeŋderın bırıktıretın «Jas aibyn» bıryŋǧai äskeri-patriottyq daiarlau jüiesın qūru közdelgen. Qauıpsız mınez-qūlyq daǧdylaryn qalyptastyru, alǧaşqy kömek körsetu men tötenşe jaǧdailar kezınde äreket etuge üiretu mektepten basialmaq.
Äkımdıktermen bırlesıp, jalpy bılım beretın oqu oryndarynda alǧaşqy äskeri daiyndyqtyŋ sapaly jürgızıluın qamtamasyz etu, sondai-aq mamandandyrylǧan äskeri mektepter jelısın damytu jūmystary jalǧasady.
Jospardyŋ ūiymdastyruşylyq ıs-şaralaryn jyl soŋyna deiın jüzege asyru közdelgen, al negızgı tūjyrymdamalyq özgerıster orta merzımdı perspektivada ıske asyrylady. Qorǧanys ministrlıgı äskeri reformanyŋ jüzege asyrylu barysy turaly qoǧamdy tūraqty türde habardar etıp otyrady.
