Aýǵanstandaǵy ahýalǵa baılanysty aýǵan qazaqtaryn elge ákelýdiń óz qıyndyqtary bar ekenin “Otandastar” qorynyń vıe-prezıdenti Maǵaýııa Sarbasov myna postynda aıtty:
Ardaqty aǵaıyn!
Aýǵanstandaǵy ahýalǵa baılanysty óz pikirimdi bildirgim keledi.
Qazirgi ýaqytta sheteldik jáne otandyq buqaralyq aqparat quraldary men áleýmettik jeliler arqyly Aýǵanstan elindegi asa aýyr jaǵdaıdy kórip-bilip otyrmyz. Bul dúrbeleń beıbit ómirdi ańsap, óz otanynda turyp jatqan halyq úshin óte ókinishti jaǵdaı dep bilemin. Tynyshy buzylyp, oq pen ottan kóz ashpaǵan memlekettiń búgingi bet-beınesi, jalpaq jurttyń jaı-kúıi jan aýyrtyp, júrek syzdatady.
Shartarapqa tarydaı shashylǵan qandastarymyzdyń at tóbelindeı bir shoǵyry aýǵan elinde ekenin bilemiz. Osyndaı aýmaly-tókpeli tóńkeristi basynan ótkerip jatqan eldegi baýyrlarymyzdyń ahýaly bizdi de alańdatpaı qoımaıdy.
Bul rette memlekettik organdardyń, ásirese Syrtqy ister mınıstrliginiń jumysyn aıryqsha atap ótý kerek.
Búginde, Kabýldaǵy Qazaqstan Elshiliginiń resmı málimetinshe ulty qazaq 200-ge jýyq azamat bar ekeni rastaldy. Bul aqparat resmı bolǵandyqtan, osyny negizge alǵan jón.
Alaıda, «Otandastar qory» KEAQ barlyq aımaqtardaǵy front-keńseleri men Qandastarǵa qoldaý kórsetý ortalyǵy arqyly jumystar júrgizýdi jedel qolǵa aldy.
Buǵan deıin Aýǵanstannan atajurtqa kóship kelgen jáne Qazaqstan Respýblıkasynyń azamaty atanǵan qandastarymyzdan Aýǵanstan aýmaǵynda qalǵan týǵan-týystarynyń tizimin jınaqtaý jumystary júrip jatyr. Tap qazirgi sátke deıin 450-ge jýyq adamnyń esimi tizimge engizildi. Alaıda, bul tizim áli de tekseristi qajet etedi. Atalǵan tizim tolyq jınaqtalǵan soń tıisti memlekettik organdarǵa joldanady.
Alaıda, otqa oranǵan elde qalǵan qandastarymyzdy kóshirip ákelý – ońaı emes jáne bir kúnde bitpeıtin sharýa. Bul shara quzyrly memlekettik organdar tarapynan Aýǵan elinde oryn alǵan kúrdeli jaǵdaıda qaýipsizdik sharalaryn qatań qamtamasyz ete otyryp, tıisti dıplomatııalyq joldarmen kelissózder júrgizý arqyly ólshemdi jáne naqty sheshimder qabyldaýdy talap etetinin eskerýimiz kerek.
Buǵan qosa, Qazaqstanǵa kelýge nıet bildirgen árbir azamattyń qazaq ultyna sáıkestigin muqııat zerttep-zerdelep, ábden elekten ótkizý qajet. Sebebi, aýmaly-tókpeli alasapyrandy paıdalanyp, elimizge nebir kúmándi adamdardyń, sonyń ishinde sodyrlar men ekstremıstterdiń kirip ketpeýine kepildik joq.
Bunyń bári ýaqytty talap etedi. Sondyqtan, «sabyr túbi – sary altyn» demekshi, barshamyzǵa ustamdylyq tanytyp, sabyr saqtaǵan abzal.
Osy bir qysyltaıań ýaqytta, memlekettik organdar da, «Otandastar Qory» KEAQ-da qol qýsyryp qarap otyrǵan joq.
«Ár qazaq meniń jalǵyzym» degendeı, biz árkez alystaǵy aǵaıynnyń amandyǵyn tileımiz!
Jazba Maǵaýııa SARBASOVTYŃ facebook paraqshasynan
