اۋعانستانداعى احۋالعا بايلانىستى اۋعان قازاقتارىن ەلگە اكەلۋدىڭ ءوز قيىندىقتارى بار ەكەنىن “وتانداستار” قورىنىڭ ۆيتسە-پرەزيدەنتى ماعاۋيا سارباسوۆ مىنا پوستىندا ايتتى:
ارداقتى اعايىن!
اۋعانستانداعى احۋالعا بايلانىستى ءوز پىكىرىمدى بىلدىرگىم كەلەدى.
قازىرگى ۋاقىتتا شەتەلدىك جانە وتاندىق بۇقارالىق اقپارات قۇرالدارى مەن الەۋمەتتىك جەلىلەر ارقىلى اۋعانستان ەلىندەگى اسا اۋىر جاعدايدى كورىپ-ءبىلىپ وتىرمىز. بۇل دۇربەلەڭ بەيبىت ءومىردى اڭساپ، ءوز وتانىندا تۇرىپ جاتقان حالىق ءۇشىن وتە وكىنىشتى جاعداي دەپ بىلەمىن. تىنىشى بۇزىلىپ، وق پەن وتتان كوز اشپاعان مەملەكەتتىڭ بۇگىنگى بەت-بەينەسى، جالپاق جۇرتتىڭ جاي-كۇيى جان اۋىرتىپ، جۇرەك سىزداتادى.
شارتاراپقا تارىداي شاشىلعان قانداستارىمىزدىڭ ات توبەلىندەي ءبىر شوعىرى اۋعان ەلىندە ەكەنىن بىلەمىز. وسىنداي اۋمالى-توكپەلى توڭكەرىستى باسىنان وتكەرىپ جاتقان ەلدەگى باۋىرلارىمىزدىڭ احۋالى ءبىزدى دە الاڭداتپاي قويمايدى.
بۇل رەتتە مەملەكەتتىك ورگانداردىڭ، اسىرەسە سىرتقى ىستەر مينيسترلىگىنىڭ جۇمىسىن ايرىقشا اتاپ ءوتۋ كەرەك.
بۇگىندە، كابۋلداعى قازاقستان ەلشىلىگىنىڭ رەسمي مالىمەتىنشە ۇلتى قازاق 200-گە جۋىق ازامات بار ەكەنى راستالدى. بۇل اقپارات رەسمي بولعاندىقتان، وسىنى نەگىزگە العان ءجون.
الايدا، «وتانداستار قورى» كەاق بارلىق ايماقتارداعى فرونت-كەڭسەلەرى مەن قانداستارعا قولداۋ كورسەتۋ ورتالىعى ارقىلى جۇمىستار جۇرگىزۋدى جەدەل قولعا الدى.
بۇعان دەيىن اۋعانستاننان اتاجۇرتقا كوشىپ كەلگەن جانە قازاقستان رەسپۋبليكاسىنىڭ ازاماتى اتانعان قانداستارىمىزدان اۋعانستان اۋماعىندا قالعان تۋعان-تۋىستارىنىڭ ءتىزىمىن جيناقتاۋ جۇمىستارى ءجۇرىپ جاتىر. تاپ قازىرگى ساتكە دەيىن 450-گە جۋىق ادامنىڭ ەسىمى تىزىمگە ەنگىزىلدى. الايدا، بۇل ءتىزىم ءالى دە تەكسەرىستى قاجەت ەتەدى. اتالعان ءتىزىم تولىق جيناقتالعان سوڭ ءتيىستى مەملەكەتتىك ورگاندارعا جولدانادى.
الايدا، وتقا ورانعان ەلدە قالعان قانداستارىمىزدى كوشىرىپ اكەلۋ – وڭاي ەمەس جانە ءبىر كۇندە بىتپەيتىن شارۋا. بۇل شارا قۇزىرلى مەملەكەتتىك ورگاندار تاراپىنان اۋعان ەلىندە ورىن العان كۇردەلى جاعدايدا قاۋىپسىزدىك شارالارىن قاتاڭ قامتاماسىز ەتە وتىرىپ، ءتيىستى ديپلوماتيالىق جولدارمەن كەلىسسوزدەر جۇرگىزۋ ارقىلى ولشەمدى جانە ناقتى شەشىمدەر قابىلداۋدى تالاپ ەتەتىنىن ەسكەرۋىمىز كەرەك.
بۇعان قوسا، قازاقستانعا كەلۋگە نيەت بىلدىرگەن ءاربىر ازاماتتىڭ قازاق ۇلتىنا سايكەستىگىن مۇقيات زەرتتەپ-زەردەلەپ، ابدەن ەلەكتەن وتكىزۋ قاجەت. سەبەبى، اۋمالى-توكپەلى الاساپىراندى پايدالانىپ، ەلىمىزگە نەبىر كۇماندى ادامداردىڭ، سونىڭ ىشىندە سودىرلار مەن ەكسترەميستتەردىڭ كىرىپ كەتپەۋىنە كەپىلدىك جوق.
بۇنىڭ ءبارى ۋاقىتتى تالاپ ەتەدى. سوندىقتان، «سابىر ءتۇبى – سارى التىن» دەمەكشى، بارشامىزعا ۇستامدىلىق تانىتىپ، سابىر ساقتاعان ابزال.
وسى ءبىر قىسىلتاياڭ ۋاقىتتا، مەملەكەتتىك ورگاندار دا، «وتانداستار قورى» كەاق-دا قول قۋسىرىپ قاراپ وتىرعان جوق.
«ءار قازاق مەنىڭ جالعىزىم» دەگەندەي، ءبىز اركەز الىستاعى اعايىننىڭ اماندىعىن تىلەيمىز!
جازبا ماعاۋيا سارباسوۆتىڭ facebook پاراقشاسىنان
