İrannyŋ qazaqtar tūratyn aimaǧy Golestan provinsiiasynda tärtıpsızdıkterdı ūiymdastyruşylardyŋ bırqatary ūstaldy, qalǧandary tergeude jäne jaqyn arada qamauǧa alynady. Būl turaly Golestan provinsiiasynyŋ sot bilıgı basqarmasy mälımdedı, dep habarlaidy “Adyrna” ūlttyq portaly Report agenttıgıne sıltep.
Mälımetke säikes, provinsiia ortalyǧy Gorgan qalasynda bolǧan tärtıpsızdıkter barysynda tört banktıŋ ǧimaraty qiraǧan, taǧy ekı banktıŋ ǧimaratyna 50 paiyz kölemınde zalal keltırılgen.
Sonymen qatar, Gorganda äkımşılık ǧimaraty örtengen.
Aita ketsek, İran qazaqtarynyŋ bır bölıgı 1995 jyly tarihi otanyna oraldy. Olardyŋ bırazy Maŋǧystau oblysyna qonystandy. Sol jyly İrandaǧy qazaqtardyŋ şamamen jartysy Qazaqstanǧa köşıp keldı delınedı. İranda qalǧan qazaq diasporasy qazır negızınen būrynǧy Mazendaran, qazırgı Golestan provinsiiasyndaǧy Gorgan, Bändär-Türkımen jäne Gümbäd-Qabus qalalarynda tūrady.
İranda jarty aiǧa juyq uaqyttan berı narazylyq jalǧasyp jatyr. Soŋǧy künderı küşeie tüsken narazylyqta bilık küşterımen qaqtyǧys bolyp, jüzdegen adam qaza tapqan. Jaralanǧandar myŋdap sanalady. Elde soŋǧy 3-4 künde internet jäne telefon bailanysy tolyqtai öşırılgen. Ūlttyq valiuta baǧamynyŋ ösıp, baǧanyŋ qymbattauynan tuyndaǧan narazylyq soŋy saiasi talaptarǧa ūlasty. Adamdar bilık basyndaǧy dın adamdary oryndarynan ketkenşe narazylyqty jalǧastyratynyn aityp, ūrandap jür. Narazylyqty AQŞ prezidentı Donald Tramp jäne özge de batys elderı qoldaitynyn bıldırgen. Bilık soŋǧy 2-3 täulıkte şeruge şyqqandardy aiausyz basyp-janyştauǧa kırısken. Bıraq narazylyqqa şyqqandar da köşege jinaluyn odan saiyn üdetıp keledı. Arada arandatuşylardyŋ bolǧany jaiynda da aitylady.
