Sýret sala bilý - tabıǵatynan talant daryǵan, erekshe jandarǵa beriletin qasıet. Kez kelgen adam sýretke beıim emes. Alaıda, "Adyrna" tilshisi suhbattasqan Marııam esimdi 15 jasar jas talant, eshqandaı kýrstarǵa qatysyp, arnaıy bilim almasa da talaıdy darynymen tańdaı qaqqyzǵan jan.
- Marııam, kóbi seniń sýretterińdi joǵary baǵalap, tanyǵanymen óziń týraly aqparat bilmeıdi. Ózińdi tanystyryp ótseń:
-Meniń tolyq aty-jónim Musa Marııam Nartaıqyzy. Jasym 15-te. Almatyda týyp óskenmin. Qazirgi tańda Áýezov aýdanyndaǵy Ǵabıt Músirepov atyndaǵy nómiri 86-mektep gımnazııasynda bilim alýdamyn. Kelesi jyly 10-shy synypqa ótemin.
-Sýret salýǵa qashannan beri qyzyǵasyń? Arnaıy kýrstarǵa qatysyp pa ediń?
-Negizi sýret óneri meniń ómirimde osynshalyqty mańyzdy ról atqarady dep esh oılamappyn. Sýretke burynnan qyzyǵamyn dep te aıta almaımyn. Buryndary jaı kishigirim, bolmashy sýretter salatynmyn. Al dál qazirgideı belsendi salyp bastaýyma degen qyzyǵýshylyǵym úsh jyldaı buryn bastaldy. Eshqandaı kýrstarǵa qatysqan emespin. Bárin ózim úırendim.
-Sýret óneriniń qaı janryna qyzyǵasyń?
Men beıneleý óneriniń bir ǵana janrymen shektelgim kelmeıdi. Alaıda, maǵan unaıtyny "grafıka" dep oılaımyn. Sebebi, ózime kóbine túrli boıaýlarmen jumys istegenshe, tek bir tústi qaryndashpen sýret salǵan unaıdy.
-Buryn- sońdy sýretshiler jarysyna qatysyp kórip pa ediń?
-Joq qatysyp kórmeppin. Biraq aldaǵy ýaqytta sondaı jarystarǵa qatysyp, sýret salýymdy jetildirgim keledi.
-Tanymal tulǵalardyń portretin jıi salady ekensiń. Týyndyńdy kórgen jandar qandaı baǵa beredi?
-Árıne sýret salǵandyqtan adamdarǵa sýretińniń unaǵanyn qalaısyń. Sol sebepti de sýretiń minsiz bolǵansha kóp ózgertýler engizesiń. Sýretti kórgen jandar jaqsy oılaryn bildirip, joǵary baǵalaıdy. Máselen men eń alǵash tanymal bloger Iýsýpov Armandy salǵan bolatynmyn. Ol maǵan ózine sýrettiń unaǵandyǵyn aıtty. Al Sabıra Jarasqyzy (_sabirkin) sol sýretke tókken eńbegime alǵysyn aıtyp, izgi nıetin bildirdi. Men taǵy Gúlnaz Jolanovany salǵan bolatynmyn. Ol kisi ge de sýretim óte unady. Osyndaı jyly sózderdi estý men úshin úlken qýanysh.
-Súıikti sýretshiń kim? Kimdi úlgi tutasyń?
-Súıikti sýretshim myna kisi, dep basyp aıta almaımyn. Ár sýretshiniń boıynda ózinshe ereksheligi bolady. Biraq endi osy sátte Ábilhan Qasteev atamyzdy aıtpasam bolmas. Óıtkeni ol kisiniń beıneleý óneriniń Qazaqstanda damýyna qosqan úlesi zor. Men de bolashaqta óz elime dál sondaı paıda alyp kelgim keledi.
-Marııam, mektepte súıip oqıtyn pániń bar ma?
- Maǵan eń bir qatty unaıtyn pánderiniń biri ol - qazaq ádebıeti. Jalpy kitap oqý, sýret salýdan keıingi hobbıim. Aqyn-jazýshylardyń shyǵarmalaryn oqyp lázzat alamyn. Bizdiń elimizdiń bolashaǵy úshin eńbek etken, ózinen keıin sonsha dana sózderin qaldyrǵan ata-babalarymyzdyń aqyl-dana sózderin qurmet tutyp oqý, árbirimizdiń paryzymyz dep bilemin. Al, unatpaıtyn sabaǵym hımııa.
- Bolashaqta kim bolǵyń keledi?
- Negizinen kıim dızaıneri bolamyn degen oı bar. Bul salada sýret sala alýyń kóp ról oınaıdy. Ózim de kıim tigýge qyzyǵatynmyn. Sol sebepti de bolashaqta dızaıner bolǵym keledi.
-Shyǵarmashylyq tabys tileımin, Marııam! Raqmet!
Suhbattasqan: Dına LITPIN,
"Adyrna" ulttyq portaly
