سۋرەت سالا ءبىلۋ - تابيعاتىنان تالانت دارىعان، ەرەكشە جاندارعا بەرىلەتىن قاسيەت. كەز كەلگەن ادام سۋرەتكە بەيىم ەمەس. الايدا، "ادىرنا" ءتىلشىسى سۇحباتتاسقان ماريام ەسىمدى 15 جاسار جاس تالانت، ەشقانداي كۋرستارعا قاتىسىپ، ارنايى ءبىلىم الماسا دا تالايدى دارىنىمەن تاڭداي قاققىزعان جان.
- ماريام، كوبى سەنىڭ سۋرەتتەرىڭدى جوعارى باعالاپ، تانىعانىمەن ءوزىڭ تۋرالى اقپارات بىلمەيدى. ءوزىڭدى تانىستىرىپ وتسەڭ:
-مەنىڭ تولىق اتى-ءجونىم مۇسا ماريام نارتايقىزى. جاسىم 15-تە. الماتىدا تۋىپ وسكەنمىن. قازىرگى تاڭدا اۋەزوۆ اۋدانىنداعى عابيت مۇسىرەپوۆ اتىنداعى ءنومىرى 86-مەكتەپ گيمنازياسىندا ءبىلىم الۋدامىن. كەلەسى جىلى 10-شى سىنىپقا وتەمىن.
-سۋرەت سالۋعا قاشاننان بەرى قىزىعاسىڭ؟ ارنايى كۋرستارعا قاتىسىپ پا ەدىڭ؟
-نەگىزى سۋرەت ونەرى مەنىڭ ومىرىمدە وسىنشالىقتى ماڭىزدى ءرول اتقارادى دەپ ەش ويلاماپپىن. سۋرەتكە بۇرىننان قىزىعامىن دەپ تە ايتا المايمىن. بۇرىندارى جاي كىشىگىرىم، بولماشى سۋرەتتەر سالاتىنمىن. ال ءدال قازىرگىدەي بەلسەندى سالىپ باستاۋىما دەگەن قىزىعۋشىلىعىم ءۇش جىلداي بۇرىن باستالدى. ەشقانداي كۋرستارعا قاتىسقان ەمەسپىن. ءبارىن ءوزىم ۇيرەندىم.
-سۋرەت ونەرىنىڭ قاي جانرىنا قىزىعاسىڭ؟
مەن بەينەلەۋ ونەرىنىڭ ءبىر عانا جانرىمەن شەكتەلگىم كەلمەيدى. الايدا، ماعان ۇنايتىنى "گرافيكا" دەپ ويلايمىن. سەبەبى، وزىمە كوبىنە ءتۇرلى بوياۋلارمەن جۇمىس ىستەگەنشە، تەك ءبىر ءتۇستى قارىنداشپەن سۋرەت سالعان ۇنايدى.
-بۇرىن- سوڭدى سۋرەتشىلەر جارىسىنا قاتىسىپ كورىپ پا ەدىڭ؟
-جوق قاتىسىپ كورمەپپىن. بىراق الداعى ۋاقىتتا سونداي جارىستارعا قاتىسىپ، سۋرەت سالۋىمدى جەتىلدىرگىم كەلەدى.
-تانىمال تۇلعالاردىڭ پورترەتىن ءجيى سالادى ەكەنسىڭ. تۋىندىڭدى كورگەن جاندار قانداي باعا بەرەدى؟
-ارينە سۋرەت سالعاندىقتان ادامدارعا سۋرەتىڭنىڭ ۇناعانىن قالايسىڭ. سول سەبەپتى دە سۋرەتىڭ ءمىنسىز بولعانشا كوپ وزگەرتۋلەر ەنگىزەسىڭ. سۋرەتتى كورگەن جاندار جاقسى ويلارىن ءبىلدىرىپ، جوعارى باعالايدى. ماسەلەن مەن ەڭ العاش تانىمال بلوگەر يۋسۋپوۆ ارماندى سالعان بولاتىنمىن. ول ماعان وزىنە سۋرەتتىڭ ۇناعاندىعىن ايتتى. ال سابيرا جاراسقىزى (_sabirkin) سول سۋرەتكە توككەن ەڭبەگىمە العىسىن ايتىپ، ىزگى نيەتىن ءبىلدىردى. مەن تاعى گۇلناز جولانوۆانى سالعان بولاتىنمىن. ول كىسى گە دە سۋرەتىم وتە ۇنادى. وسىنداي جىلى سوزدەردى ەستۋ مەن ءۇشىن ۇلكەن قۋانىش.
-سۇيىكتى سۋرەتشىڭ كىم؟ كىمدى ۇلگى تۇتاسىڭ؟
-سۇيىكتى سۋرەتشىم مىنا كىسى، دەپ باسىپ ايتا المايمىن. ءار سۋرەتشىنىڭ بويىندا وزىنشە ەرەكشەلىگى بولادى. بىراق ەندى وسى ساتتە ءابىلحان قاستەەۆ اتامىزدى ايتپاسام بولماس. ويتكەنى ول كىسىنىڭ بەينەلەۋ ونەرىنىڭ قازاقستاندا دامۋىنا قوسقان ۇلەسى زور. مەن دە بولاشاقتا ءوز ەلىمە ءدال سونداي پايدا الىپ كەلگىم كەلەدى.
-ماريام، مەكتەپتە ءسۇيىپ وقيتىن ءپانىڭ بار ما؟
- ماعان ەڭ ءبىر قاتتى ۇنايتىن پاندەرىنىڭ ءبىرى ول - قازاق ادەبيەتى. جالپى كىتاپ وقۋ، سۋرەت سالۋدان كەيىنگى ءحوببيىم. اقىن-جازۋشىلاردىڭ شىعارمالارىن وقىپ ءلاززات الامىن. ءبىزدىڭ ەلىمىزدىڭ بولاشاعى ءۇشىن ەڭبەك ەتكەن، وزىنەن كەيىن سونشا دانا سوزدەرىن قالدىرعان اتا-بابالارىمىزدىڭ اقىل-دانا سوزدەرىن قۇرمەت تۇتىپ وقۋ، ءاربىرىمىزدىڭ پارىزىمىز دەپ بىلەمىن. ال، ۇناتپايتىن ساباعىم حيميا.
- بولاشاقتا كىم بولعىڭ كەلەدى؟
- نەگىزىنەن كيىم ديزاينەرى بولامىن دەگەن وي بار. بۇل سالادا سۋرەت سالا الۋىڭ كوپ ءرول وينايدى. ءوزىم دە كيىم تىگۋگە قىزىعاتىنمىن. سول سەبەپتى دە بولاشاقتا ديزاينەر بولعىم كەلەدى.
-شىعارماشىلىق تابىس تىلەيمىن، ماريام! راقمەت!
سۇحباتتاسقان: دينا ليتپين،
"ادىرنا" ۇلتتىق پورتالى
