Bizdiń súıikti fılolog

2947
Adyrna.kz Telegram

(Búgin – kýáliksiz kandıdat, dıplomsyz doktor, ataqsyz akademık Pazyl dosymyzdyń týǵan kúni)

Qaı ǵylymda da, ataq-dárejesinen at úrketin áıgili ǵalymdardyń ózi attan túsip, arnaıy sálem beretin asa abyroıly adamdar bolady. Ol adamnyń tipti ǵylymı ataǵy bolmaýy da múmkin. Bolǵan kúnniń ózinde sonyń eń joǵary deńgeıi emes... Biraq soǵan jurttyń bári shetinen quldyq uryp turady. Nege? Sebebi ol ǵylymnyń óz ókili ekenin ózgelerge baıaǵyda-aq moıyndatyp qoıǵan. Sen de, ol da, men de, bárimiz de onyń myqty ekenin sezemiz. Sezemiz de súısinemiz. Súısinemiz de sonyń tóńireginen shyrq úıirilip shyqpaımyz.

Ondaı ǵıbratty ǵalymdar barshylyq. Alysqa uzamaı-aq, til men ádebıettiń, tanym men tarıhtyń aınalasyn túgeldep kóreıikshi. Muhtar Maǵaýın men Qulmat Ómirálıevti, Qaıym Muhamethanov pen Qabıbolla Sydıyqovty, Aıqyn Nurqatov pen Búrkit Ysqaqovty, Ásilhan Ospanuly men Balamer Saharıevti, Seıdildá Ordalıev pen Úshkiltaı Subhanberdınany, Serikqalı Sharabasov pen Serikqazy Qorabaevty, Zeınolla Serikqalıev pen Tursynjan Shapaıdy, Sultanhan Aqqulyuly men Berik Júsipovti qaı ǵylym doktorynan kem kórer edińiz?! Ádebıettanýdyń jańa tynysyn ashqan Mıhaıl Bahtın men kóne jazýdyń tórkinine tereń úńilgen Sergeı Klıashtornyıdy qaıda qoıasyz! Ekeýi de kúlli jurtqa keń tanylǵanyna qaramastan, kandıdattyq dıplomdy ǵana maldanyp ómirden ótti. Al tipti sol ǵylym kandıdatynyń dıplomyn da ıelenip kórmegen, biraq esimderi jalpaq elge máshhúr bolǵan Islám Jarylǵapov pen Mardan Baıdildaev she? Sol Islám men Mardannyń jıyp-tergen termınderi men termeleri talaı zertteýshige kúni búginge deıin azyq bop kele jatqan joq pa?!

Mundaı turqy bólek tulǵalar bizdiń býynymyzda da bar. Sonyń biri de biregeıi – sońǵy otyz jylda KazGÝ-diń fılologııa fakýltetinde oqyǵan qyz-jigitterdiń ulaǵatty ustazy, oıly oqymysty, ǵıbratty ǵalym, zııaly azamat Pazylbek Bısenbaev. Ol Pazyl deseń de, Fazyl deseń de, jalt qaraıdy. Onyń esesine, sóılep ketse boldy, búkil eldi ózine jalt qaratady. Óz pánin tereń biledi. Stýdentterge jeke basyn syılata alady. Óıtkeni onyń ǵylymı ataǵy joq bolǵanymen, ón-boıynda naǵyz ǵalymnyń belgisi bar. Bitimi ǵalym, bolmysy ǵalym, tulǵasy ǵalym, turpaty ǵalym. Pazyl ósken shańyraqta ǵylym doktory da, ǵylym kandıdaty da jetkilikti. Tipti arasynda Ulttyq Ǵylym akademııasynyń akademıgi de bar. Kıevte oqyǵandar da, Pıterde oqyǵandar da sol úıde. Ony az deseńiz, óz bosaǵasynda zertteýshilikke beıimi bar órimdeı eki qyzy ósip, qazirden-aq ǵylymǵa talasy bar ekenin dáleldeı bastady. Endeshe, aǵalary abyroıly, inileri izetti, perzentteri parasatty Pazyldyń ǵalym bolmaýǵa qandaı quqy bar?! Ol óz salasyndaǵy tanymal ǵalymdardyń qaı-qaısysymen de dúbirli dodaǵa túsip, qyzý pikir talastyra alady. Olar da bizdiń «mıy qulaǵynan aǵyp júrgen» ǵulama dosymyzben únemi sanasady.

Já, ony qoıshy, ataqtyń bir-jóni bolar. Eń bastysy, ony búkil stýdent jaqsy kóredi. «Bizdiń súıikti dáriger» fılminde sanatorııdiń bas shıpageri Anatolıı Lavrovtyń alpys jasqa tolǵan toıyna kileń belgili kisilerdiń jan-jaqtan jappaı aǵylyp keletini esterińizde me? Qudaı biledi, endi bir úsh jyldan keıin Pazyl alpysqa tolǵanda búkil stýdent ardaqty aǵaılarynyń shýaqty shańyraǵyn betke alatyn shyǵar. Soǵan jetýge jazsyn!

Al ázirge ol erdiń jasy – elý jetige toldy! Búgin! Týǵan kúniń qutty bolsyn, bizdiń súıikti fılolog!

Baýyrjan OMARULY

Pikirler