«Halyqqa qyzmet – abyroily mındet». Qazırgı köpşılıktıŋ ūrany osy. Söz ben ıs bır jerden şyqsa, būl ūranyna ūran. Bälki, Älihannyŋ «Tırı tūrsam, qazaqqa qyzmet qylmai qoimaimyn» degen jalyndy sözınen keiıngı ūranǧa ainalǧany qaşan. Şynynda elımızdıŋ ärbır atqamınerı elge, ūltqa, halyqqa qyzmet etuı tiıs. Qyzmet qylyp jürgenın de köz körıp, qūlaq estıp jür. Solardyŋ qatarynda būqaranyŋ ünın, halyqtyŋ jyryn bilıkke jetkızıp, qoldan kelgenınşe eldıŋ jaiyna bolysyp jürgenderdıŋ qatarynda üstımızdegı jyldyŋ qaŋtarynda «halyq qalaulysy» degen beiresmi atauǧa ie bolǧan deputattar da bar. Ädette ıstıŋ bastalǧanyn emes, aiaqtalǧanynda syn aitar jūrttyŋ ädetı emes pe? Jyl basynda älemdı jūmsa jūdyryǧynda, aşsa alaqanynda ūstaǧan pandemiiaǧa qaramai sailau ötkızdık. El parlamentıne, oblystyq häm audandyq mäslihattarǧa deputattardy sailadyq. Indetten keler qauıp pen qaterge qaramadyq. Sebebı de tüsınıktı, el damuy kerek, qoǧam ılgerıleuı qajet. Sol qajettılıktı öteu üşın – būqara qalaulylaryn qūtty oryndaryna jaiǧastyrdy. Mıne sodan berı jyldyŋ törtten bırı ötıptı. Sailanǧandar tyndyrǧan qandai tırlık bar? Halyq qalaulylary şynyn da bilık pen būqara arasyndaǧy altyn köpırlık qyzmetın atqardy ma? Osyndai maŋyzdy mäselelerdıŋ tının tarqatyp, jyl basynan berı jasaǧan şarualaryn elge tanystyrmaqqa «JETISÝ MEDIA» aqparattyq alaŋyna Almaty oblystyq mäslihat hatşysy Janbolat Jörgenbaev tılşılermen jüzdestı.
Jetısu öŋırınde «halyqtyŋ qalaulysy» bolǧan 360 deputat bar. Onyŋ 45-ı oblystyq mäslihattyŋ tızgının tartqan. Osy deputattardyŋ 31,1 paiyzy näzıkjandylardan qūralsa, mäslihat mınberınde būqaranyŋ jaiyn aityp jürgen 35 jasqa deiıngı 8 jas bar. AQŞ-tyŋ ataqty jazuşysy M.Tven: «Sailauǧa deiın kandidat sızdıkı bolǧanmen, sailaudan keiın ol Kongrestıkı» degen eken. Bızdıkıler «būqara qyzmetşısımın» dep jürgen syŋaily. Oǧan mäslihat hatşysynyŋ sözı kuä.
– Mäslihat deputattarynyŋ negızgı mındetı – halyqtyŋ mūŋ-mūqtajyn bilık nazaryna jetkızu arqyly şeşıluın qamtamasyz etu bolǧandyqtan, olar ünemı jūrtşylyq pen memlekettık organdar arasyndaǧy dialogty qamtamasyz etude. Oblystyq mäslihatta 6tūraqty komissiialarymyz jūmys ısteidı. Jyl basynan berı sol komissiialar 12 otyrys ötkızıp, 24 şeşım qabyldady. Mūnan özge, deputattar sailauşylarmen kezdesu, basqa da baǧyttar aiasynda deputattyq saualdar joldap, öŋırdegı türlı mäselelerdı köterude. Osy uaqytqa deiın oblystyq mäslihat deputattary 44 deputattyq saual joldady. Halyq qalaulylary nysanasyna eldıŋ jaiy men būqaranyŋ ünın negızge aldy. Saualdardyŋ negızınde jergılıktı atqaruşy organdar tiısınşe jūmystar jürgızude. Sondai-aq, jyl basynan berı öŋırdegı barlyq deŋgeidegı mäslihat deputattary qoǧamdyq qabyldau negızınde 693 tūrǧynnyŋ mäselesın tyŋdady. Tūrǧyndar tarapynan tüsken mäselelerdıŋ 56,4 paiyzy nätijelı şeşılıp, qalǧan 302 mäsele qūzyrly oryndar tarapyna ūsynylyp, baqylauǧa alyndy, - dedı J.Jörgenbaev.
Eldegı pandemiialyq jaǧdaida da mäslihat deputattary qarap jatpauǧa bel buǧandai. Halyq qalaulylarynyŋ 95 paiyzdan astamy äleumettık jelımen jūmys ısteuge köşken. Eldıŋ jaiyn älem jelı arqyly baqylap ta otyrady eken. Būqaranyŋ jaiyna bolysuǧa onyŋ da öz paidasy tiıp jatqan syŋaily. Mäselen, oblystyq mäslihat deputattary jyl basynan berı 87,5 million teŋgeden astam qaiyrymdylyq baǧytta qarjylyq qyzmet körsetken. Ärine, jeke esebınen. Osynyŋ nätijesınde 3003 öŋır tūrǧyny qajetıne qol jetkızıptı. Naqty aitqanda halyq qalaulysy R.Qojasbaev pen S.Qabyşeva 2 mūqtaj otbasyna baspana äpergen. Sondai-aq, S.Särsekov öz esebınen baspanasy kürdelı jöndeudı qajet etetın tūrǧynǧa 600 myŋ teŋge bergen. Oqyrmannyŋ esınde bolar, Eŋbekşıqazaq audanyndaǧy Nūra auylynda baspanasy örtengen otbasynyŋ balalary qaşyqtyqtan oqu uaqytynda oqu ülgerımı naşarlamasyn oilap deputat E.Abitov 470 myŋ teŋgege smartfondar alyp bergen. Pandemiia kezınde nauqastardy emdeuge S.Aqsubaev 10 mln. Teŋge, E.Üşkempırov 365 myŋ teŋge qarajat bölgen. Tızbektei bersek, halyq qalaulylary eldıŋ joǧyn tügendeuge bırşama jeke qarjysyn audarypty. Būl da «deputat boldym, mınekei» degen tırlık emes, būqaraǧa bolysudyŋ sipaty. Aitpaqşy, mäslihat deputattary qasiettı aida 200-den astam tūrǧynǧa auyzaşar bergen.
Deputattardy el tegınnen tegın halyq qalaulysy demeidı. Olar būqaranyŋ joǧyn joqtauşysy, eldıŋ kem-ketıgın tüzeuşı. Jetısu öŋırınıŋ deputattary sol mındetınen tanbaǧanyn aŋǧartyp ta jür. Bastysy, elge bolsyn degen bilık pen halyq arasyn jalǧaǧan qalauly azamattarǧa qai kezde de sättılık serık bolsyn. Tıleuleske tılektestık bıldıru kerek te şyǧar.
Dastanbek Sadyq
Ūqsas jaŋalyqtar
