Batys Qazaqstan oblysynda máslıhat depýtattary men olardyń ıeligindegi kompanııalar memlekettik satyp alýlar arqyly 83,1 mıllıard teńge jeńip alǵan. Bul týraly ProTenge Telegram-arnasy jarııalady, dep habarlaıdy “Adyrna” ulttyq portaly.
Málimet boıynsha, memlekettik satyp alýlar arqyly tabys taýyp otyrǵan depýtattardyń kópshiligi AMANAT partııasynyń quramynda eken.
“Munda zańǵa qaıshy eshteńe joq. Depýtattarǵa memlekettik satyp alýlarǵa qatysýǵa tyıym salynbaǵan. Onyń ústine olar máslıhat depýtaty bolǵany úshin jalaqy da almaıdy. Degenmen múddeler qaıshylyǵy bar ekeni sózsiz. Ózderińiz salystyryp kórińizder”, - delingen jazbada.
Sonymen qatar, onda 2021-2022 jyldary memlekettik satyp alýlarǵa qatysyp, bıýdjetten eń kóp qarjy alǵan depýtattardyń úshtigi kórsetilgen.
Birinshi orynda Nurǵazy Sátbaev tur. Onyń ıelegindegi «Uniserv» JShS jol jóndeý jumystaryn júrgizip, bıýdjetten 64,4 mıllıard teńge alǵan.
Ekinshi orynda AMANAT partııasynyń taǵy bir múshesi Ivan Enıýtın tur. Onyń ıelegindegi «ASFA» fırmasy jol salýǵa qatysty memlekettik tenderdi jeńip alǵan. Memlekettik satyp alýdyń quny – 5,7 mıllıard teńge.
Bul úshtikti Nurlan Serǵalıev túıindep otyr. Ol da AMANAT partııasyna múshe jáne M.Ótemisov atyndaǵy Batys Qazaqstan ýnıversıtetiniń rektory. Ýnıversıtet 2021-2022 jyldary bıýdjetten 3,1 mıllıard teńgege qarjylandyrylǵan.
«Ákimdikpen jumys istep, olardan aqsha alatyn depýtattar bıýdjetti qorǵap, halyqtyń erkin jetkize otyryp, ákimdikti halyqtyń qajetine qaraı baǵyttaı ala ma?» - delingen jazbada.
