«حالىققا قىزمەت – ابىرويلى مىندەت». قازىرگى كوپشىلىكتىڭ ۇرانى وسى. ءسوز بەن ءىس ءبىر جەردەن شىقسا، بۇل ۇرانىنا ۇران. بالكي، ءاليحاننىڭ «ءتىرى تۇرسام، قازاققا قىزمەت قىلماي قويمايمىن» دەگەن جالىندى سوزىنەن كەيىنگى ۇرانعا اينالعانى قاشان. شىنىندا ەلىمىزدىڭ ءاربىر اتقامىنەرى ەلگە، ۇلتقا، حالىققا قىزمەت ەتۋى ءتيىس. قىزمەت قىلىپ جۇرگەنىن دە كوز كورىپ، قۇلاق ەستىپ ءجۇر. سولاردىڭ قاتارىندا بۇقارانىڭ ءۇنىن، حالىقتىڭ جىرىن بيلىككە جەتكىزىپ، قولدان كەلگەنىنشە ەلدىڭ جايىنا بولىسىپ جۇرگەندەردىڭ قاتارىندا ۇستىمىزدەگى جىلدىڭ قاڭتارىندا «حالىق قالاۋلىسى» دەگەن بەيرەسمي اتاۋعا يە بولعان دەپۋتاتتار دا بار. ادەتتە ءىستىڭ باستالعانىن ەمەس، اياقتالعانىندا سىن ايتار جۇرتتىڭ ادەتى ەمەس پە؟ جىل باسىندا الەمدى جۇمسا جۇدىرىعىندا، اشسا الاقانىندا ۇستاعان پاندەمياعا قاراماي سايلاۋ وتكىزدىك. ەل پارلامەنتىنە، وبلىستىق ءھام اۋداندىق ماسليحاتتارعا دەپۋتاتتاردى سايلادىق. ىندەتتەن كەلەر قاۋىپ پەن قاتەرگە قارامادىق. سەبەبى دە تۇسىنىكتى، ەل دامۋى كەرەك، قوعام ىلگەرىلەۋى قاجەت. سول قاجەتتىلىكتى وتەۋ ءۇشىن – بۇقارا قالاۋلىلارىن قۇتتى ورىندارىنا جايعاستىردى. مىنە سودان بەرى جىلدىڭ تورتتەن ءبىرى ءوتىپتى. سايلانعاندار تىندىرعان قانداي تىرلىك بار؟ حالىق قالاۋلىلارى شىنىن دا بيلىك پەن بۇقارا اراسىنداعى التىن كوپىرلىك قىزمەتىن اتقاردى ما؟ وسىنداي ماڭىزدى ماسەلەلەردىڭ ءتىنىن تارقاتىپ، جىل باسىنان بەرى جاساعان شارۋالارىن ەلگە تانىستىرماققا «JETISÝ MEDIA» اقپاراتتىق الاڭىنا الماتى وبلىستىق ءماسليحات حاتشىسى جانبولات جورگەنباەۆ تىلشىلەرمەن جۇزدەستى.
جەتىسۋ وڭىرىندە «حالىقتىڭ قالاۋلىسى» بولعان 360 دەپۋتات بار. ونىڭ 45-ءى وبلىستىق ءماسليحاتتىڭ تىزگىنىن تارتقان. وسى دەپۋتاتتاردىڭ 31,1 پايىزى نازىكجاندىلاردان قۇرالسا، ءماسليحات مىنبەرىندە بۇقارانىڭ جايىن ايتىپ جۇرگەن 35 جاسقا دەيىنگى 8 جاس بار. اقش-تىڭ اتاقتى جازۋشىسى م.تۆەن: «سايلاۋعا دەيىن كانديدات سىزدىكى بولعانمەن، سايلاۋدان كەيىن ول كونگرەستىكى» دەگەن ەكەن. بىزدىكىلەر «بۇقارا قىزمەتشىسىمىن» دەپ جۇرگەن سىڭايلى. وعان ءماسليحات حاتشىسىنىڭ ءسوزى كۋا.
– ءماسليحات دەپۋتاتتارىنىڭ نەگىزگى مىندەتى – حالىقتىڭ مۇڭ-مۇقتاجىن بيلىك نازارىنا جەتكىزۋ ارقىلى شەشىلۋىن قامتاماسىز ەتۋ بولعاندىقتان، ولار ۇنەمى جۇرتشىلىق پەن مەملەكەتتىك ورگاندار اراسىنداعى ديالوگتى قامتاماسىز ەتۋدە. وبلىستىق ءماسليحاتتا 6تۇراقتى كوميسسيالارىمىز جۇمىس ىستەيدى. جىل باسىنان بەرى سول كوميسسيالار 12 وتىرىس وتكىزىپ، 24 شەشىم قابىلدادى. مۇنان وزگە، دەپۋتاتتار سايلاۋشىلارمەن كەزدەسۋ، باسقا دا باعىتتار اياسىندا دەپۋتاتتىق ساۋالدار جولداپ، وڭىردەگى ءتۇرلى ماسەلەلەردى كوتەرۋدە. وسى ۋاقىتقا دەيىن وبلىستىق ءماسليحات دەپۋتاتتارى 44 دەپۋتاتتىق ساۋال جولدادى. حالىق قالاۋلىلارى نىساناسىنا ەلدىڭ جايى مەن بۇقارانىڭ ءۇنىن نەگىزگە الدى. ساۋالداردىڭ نەگىزىندە جەرگىلىكتى اتقارۋشى ورگاندار تيىسىنشە جۇمىستار جۇرگىزۋدە. سونداي-اق، جىل باسىنان بەرى وڭىردەگى بارلىق دەڭگەيدەگى ءماسليحات دەپۋتاتتارى قوعامدىق قابىلداۋ نەگىزىندە 693 تۇرعىننىڭ ماسەلەسىن تىڭدادى. تۇرعىندار تاراپىنان تۇسكەن ماسەلەلەردىڭ 56,4 پايىزى ناتيجەلى شەشىلىپ، قالعان 302 ماسەلە قۇزىرلى ورىندار تاراپىنا ۇسىنىلىپ، باقىلاۋعا الىندى، - دەدى ج.جورگەنباەۆ.
ەلدەگى پاندەميالىق جاعدايدا دا ءماسليحات دەپۋتاتتارى قاراپ جاتپاۋعا بەل بۋعانداي. حالىق قالاۋلىلارىنىڭ 95 پايىزدان استامى الەۋمەتتىك جەلىمەن جۇمىس ىستەۋگە كوشكەن. ەلدىڭ جايىن الەم جەلى ارقىلى باقىلاپ تا وتىرادى ەكەن. بۇقارانىڭ جايىنا بولىسۋعا ونىڭ دا ءوز پايداسى ءتيىپ جاتقان سىڭايلى. ماسەلەن، وبلىستىق ءماسليحات دەپۋتاتتارى جىل باسىنان بەرى 87,5 ميلليون تەڭگەدەن استام قايىرىمدىلىق باعىتتا قارجىلىق قىزمەت كورسەتكەن. ارينە، جەكە ەسەبىنەن. وسىنىڭ ناتيجەسىندە 3003 ءوڭىر تۇرعىنى قاجەتىنە قول جەتكىزىپتى. ناقتى ايتقاندا حالىق قالاۋلىسى ر.قوجاسباەۆ پەن س.قابىشەۆا 2 مۇقتاج وتباسىنا باسپانا اپەرگەن. سونداي-اق، س.سارسەكوۆ ءوز ەسەبىنەن باسپاناسى كۇردەلى جوندەۋدى قاجەت ەتەتىن تۇرعىنعا 600 مىڭ تەڭگە بەرگەن. وقىرماننىڭ ەسىندە بولار، ەڭبەكشىقازاق اۋدانىنداعى نۇرا اۋىلىندا باسپاناسى ورتەنگەن وتباسىنىڭ بالالارى قاشىقتىقتان وقۋ ۋاقىتىندا وقۋ ۇلگەرىمى ناشارلاماسىن ويلاپ دەپۋتات ە.ابيتوۆ 470 مىڭ تەڭگەگە سمارتفوندار الىپ بەرگەن. پاندەميا كەزىندە ناۋقاستاردى ەمدەۋگە س.اقسۋباەۆ 10 ملن. تەڭگە، ە.ۇشكەمپىروۆ 365 مىڭ تەڭگە قاراجات بولگەن. تىزبەكتەي بەرسەك، حالىق قالاۋلىلارى ەلدىڭ جوعىن تۇگەندەۋگە ءبىرشاما جەكە قارجىسىن اۋدارىپتى. بۇل دا «دەپۋتات بولدىم، مىنەكەي» دەگەن تىرلىك ەمەس، بۇقاراعا بولىسۋدىڭ سيپاتى. ايتپاقشى، ءماسليحات دەپۋتاتتارى قاسيەتتى ايدا 200-دەن استام تۇرعىنعا اۋىزاشار بەرگەن.
دەپۋتاتتاردى ەل تەگىننەن تەگىن حالىق قالاۋلىسى دەمەيدى. ولار بۇقارانىڭ جوعىن جوقتاۋشىسى، ەلدىڭ كەم-كەتىگىن تۇزەۋشى. جەتىسۋ ءوڭىرىنىڭ دەپۋتاتتارى سول مىندەتىنەن تانباعانىن اڭعارتىپ تا ءجۇر. باستىسى، ەلگە بولسىن دەگەن بيلىك پەن حالىق اراسىن جالعاعان قالاۋلى ازاماتتارعا قاي كەزدە دە ساتتىلىك سەرىك بولسىن. تىلەۋلەسكە تىلەكتەستىك ءبىلدىرۋ كەرەك تە شىعار.
داستانبەك سادىق
