Uıǵyr aýdanynda Shonjy aýylynyń ortalyq kóshelerine tarıhı tulǵalardyń esimderin berýge baılanysty saltanatty shara ótti.
Atap aıtqanda, Shonjy aýylynyń ortalyq kóshelerine ál-Farabıdiń, Abaıdyń, Kental Islamovtyń jáne Muqaǵalı Maqataevtyń esimderin berý sharasy uıymdastyryldy. Atalǵan sharaǵa Uıǵyr aýdanynyń ákimi Shýhrat Nýrahýnov, oblystyq tilderdi damytý jónindegi basqarmanyń basshysy Bolat Kerimbek, aýdandyq máslıhat hatshasy Esjan Nurákim, oblystyń Qurmetti azamaty Yzǵarbek Bektursynov, aýdandyq qoǵamdyq keńestiń tóraǵasy Qalabaı Mereımov, aýdan depýtattary men zııaly qaýym qatysty.
Aǵymdaǵy jyly Uıǵyr aýdanynda onomastıka salasynda birshama jumys atqarylyp, aýdan ortalyǵy Shonjy aýylyndaǵy kósheler men mektep, kitaphana sekildi nysan ataýlary tarıhı tulǵalardyń esimderimen tolyqty.
Shonjy aýylyna qarasty kóshelerge ataý berý jáne olardy qaıta ataý máselesi 2020 jyly qolǵa alynǵan bolatyn. Bul bastama elimizdegi eleýli oqıǵalar ál-Farabı babamyzdyń 1150, uly Abaıdyń 175, aqıyq aqyn Muqaǵalı Maqataevtyń 90 jyldyq mereıtoıymen tuspa-tus keldi.
Jergilikti qoǵamdastyq jınalysynyń daýys berý qorytyndysy negizinde aýdandaǵy kóshelerdi qaıta ataý jónindegi usynys oblystyq onomastıka komıssııasynyń 2021 jylǵy 1 sáýirdegi kezekti otyrysynda qaralyp, oń qorytyndyǵa ıe boldy. Nátıjesinde, Shonjy aýylyna qarasty birneshe kósheler – Ál-Farabı, Abaı, Kental Islamov, Muqaǵalı Maqataev kósheleri bolyp qaıta ataldy.
Aıta keteıik, bıylǵy QR Úkimetiniń (№66) Qaýlysyna sáıkes, Uıǵyr aýdandyq kitaphanasyna ál-Farabıdiń, №4 Shonjy orta mektebine Abaıdyń esimderi berilgen.
