ۇيعىر اۋدانىندا شونجى اۋىلىنىڭ ورتالىق كوشەلەرىنە تاريحي تۇلعالاردىڭ ەسىمدەرىن بەرۋگە بايلانىستى سالتاناتتى شارا ءوتتى.
اتاپ ايتقاندا، شونجى اۋىلىنىڭ ورتالىق كوشەلەرىنە ءال-ءفارابيدىڭ، ابايدىڭ، كەنتال يسلاموۆتىڭ جانە مۇقاعالي ماقاتاەۆتىڭ ەسىمدەرىن بەرۋ شاراسى ۇيىمداستىرىلدى. اتالعان شاراعا ۇيعىر اۋدانىنىڭ اكىمى شۋحرات نۋراحۋنوۆ، وبلىستىق تىلدەردى دامىتۋ جونىندەگى باسقارمانىڭ باسشىسى بولات كەرىمبەك، اۋداندىق ءماسليحات حاتشاسى ەسجان نۇراكىم، وبلىستىڭ قۇرمەتتى ازاماتى ىزعاربەك بەكتۇرسىنوۆ، اۋداندىق قوعامدىق كەڭەستىڭ توراعاسى قالاباي مەرەيموۆ، اۋدان دەپۋتاتتارى مەن زيالى قاۋىم قاتىستى.
اعىمداعى جىلى ۇيعىر اۋدانىندا ونوماستيكا سالاسىندا ءبىرشاما جۇمىس اتقارىلىپ، اۋدان ورتالىعى شونجى اۋىلىنداعى كوشەلەر مەن مەكتەپ، كىتاپحانا سەكىلدى نىسان اتاۋلارى تاريحي تۇلعالاردىڭ ەسىمدەرىمەن تولىقتى.
شونجى اۋىلىنا قاراستى كوشەلەرگە اتاۋ بەرۋ جانە ولاردى قايتا اتاۋ ماسەلەسى 2020 جىلى قولعا الىنعان بولاتىن. بۇل باستاما ەلىمىزدەگى ەلەۋلى وقيعالار ءال-فارابي بابامىزدىڭ 1150, ۇلى ابايدىڭ 175, اقيىق اقىن مۇقاعالي ماقاتاەۆتىڭ 90 جىلدىق مەرەيتويىمەن تۇسپا-تۇس كەلدى.
جەرگىلىكتى قوعامداستىق جينالىسىنىڭ داۋىس بەرۋ قورىتىندىسى نەگىزىندە اۋدانداعى كوشەلەردى قايتا اتاۋ جونىندەگى ۇسىنىس وبلىستىق ونوماستيكا كوميسسياسىنىڭ 2021 جىلعى 1 ساۋىردەگى كەزەكتى وتىرىسىندا قارالىپ، وڭ قورىتىندىعا يە بولدى. ناتيجەسىندە، شونجى اۋىلىنا قاراستى بىرنەشە كوشەلەر – ءال-فارابي، اباي، كەنتال يسلاموۆ، مۇقاعالي ماقاتاەۆ كوشەلەرى بولىپ قايتا اتالدى.
ايتا كەتەيىك، بيىلعى قر ۇكىمەتىنىڭ (№66) قاۋلىسىنا سايكەس، ۇيعىر اۋداندىق كىتاپحاناسىنا ءال-ءفارابيدىڭ، №4 شونجى ورتا مەكتەبىنە ابايدىڭ ەسىمدەرى بەرىلگەن.
