Aqtóbede qolóner sheberleri qala kúnine oraı kórpe tikti, dep habarlaıdy "Adyrna" ulttyq portaly.
Aqtóbe qalasynyń 155 jyldyǵy aıasynda qala sheberleri 155 metrlik kórpe tikti. Bári de sý tasqynynan zardap shekkenderge tabystalmaq. Bıylǵy shara «Kúshimiz birlikte» uranymen ótti.
Uıymdastyrylǵan sharanyń bárine sý tasqynynan zardap shekken turǵyndar qatysqan.
"Etnofestıvaldiń bir bólimi Kórpe party dep ataldy. Oǵan Qýraıly mádenıet úıi jaýapty dep bekitildi. Aqtóbe qalasyndaǵy sheberlerdiń basyn qosqan chatqa kirip, qandaı jumys atqara alatynymyzdy talqyladyq. Uzyndyǵy 2 metr 30 sm bolatyn 67 kórpe tigildi. Sheberler arasynda jeke kásipkerler de, mektep muǵalimderi de bar. Barlyǵy 46 sheber qatysty. Kórpeniń bári sý tasqynynan zardap shekken otbasylarǵa taratylady, — dedi Quraıly mádenıet úıiniń kórkemdik jetekshisi Sandýǵash Taýbaeva.
Qala kúnine oraı kórpe tigý týraly usynys túskende aqtóbelik sheberler birden keliskenin aıtady.
"Muny 10 kúndeı ýaqytta tigip shyqtyq. Qyzǵaldaq kóktemniń, Aqtóbeniń de sımvoly. Al Qursaq oıýdy tańdaǵanymyzdyń sebebi Aqtóbemizdiń qoınynda nebir baılyǵymyz bar. Sony kórsetkimiz keldi. Jerimiz kók, molshylyq bolsyn degen nıetpen jasyldy, kóz tımesin dep qyzyldy qoldandyq. Ózim alty kórpe tigip, syıladym. Ár kórpege 3,3-3,6 keli maqta saldyq. Dál osyndaı úlgide alǵash tigip otyrmyz. Bul birneshe sheberdiń ıdeıasy negizinde tigildi", — dedi festıvalge qatysqan Aıgúl esimdi sheber.
