Jetisý óńirinde memleket qoldaýynyń arqasynda jyl saıyn egis alqaptarynyń kólemi ulǵaıtylyp, aýylsharýashylyǵy tehnıkalarymen qamtý deńgeıi artyp keledi. Bul óńirdiń damýyna, halyqtyń turmys sapasyn jaqsartýǵa yqpal etýde. Máselen, ótken jyly Sarqan aýdanynda 1 mlrd. 220 mln. teńgege egis jumystaryna arnalǵan zamanǵa saı tehnıkalar satyp alynǵan.
Sarqan aýdandyq ákimdiginiń málimetine qaraǵanda, tehnıkanyń 37 danasy «QazAgroqarjy» AQ arqyly, beseýi basqa lızıngtik kompanııalar arqyly alynǵan. Qalǵan tehnıkalar sharýashylyqtardyń óz qarajaty esebinen satyp alǵan. Atap aıtsaq, kombaın, traktor, tuqym sepkish, shóp jınaıtyn, júk tıeıtin, júgeri oratyn tirkemeler, tuqym tazalaǵysh, dárilegish tehnıkalar agrarlyq sala mamandarynyń ıgiligine paıdalanylýda. 
– 2008 jyly sharýa qojalyǵyn jalǵyz traktormen jáne 7 jumysshymen bastaǵan edim. Árıne, bastapqy kezde óte qıyn bolǵanyn jasyrmaımyn. Jerdi ıgerý, jyrtý, sebý, ónimdi jınaý barysynda tehnıka tapshylyǵy qatty bilinetin. Tabandy eńbektiń jáne memleketten jasalatyn jeńildik pen qoldaýlardyń arqasynda búgingi kúni sharýashylyqta 100-den astam ártúrli aýylsharýashylyq tehnıkalary bar, 70-ten asa adam eńbek etedi. Maýsymdyq kezeńde jumysshylardyń sany budan da artady. Kóbine arpa, bıdaı, júgeri, soıa burshaǵy jáne qant qyzylshasyn sebemiz. Memleket tarapynan qoldaý bolǵandyqtan agrarlyq salada alǵa jyljyp kelemiz. Ótken jyldyń ózinde ár mal basyna jáne satyp alǵan tehnıkamnyń jarty baǵasyna sýbsıdııa tólenip, qarajat jaǵynan kóp jeńildikter berildi, – deıdi «Hýsaınov H.N» sharýa qojalyǵynyń basshysy Hasanáli Hýsaınov.
Jyl basynan beri Sarqan aýdany 209,2 mln. teńgege 16 dana ártúrli aýylsharýshylyq tehnıkasyn satyp alyp úlgergen. Jalpy oblysta 7 baǵyt boıynsha 51 servıstik daıyndaý ortalyǵy qurylyp, «Jetisý» ÁKK arqyly satyp alynǵan 1204 dana tehnıka jeńildetilgen sharttarmen qarjylyq lızıngige berildi. Bul rette oblysymyz SDO-lar tabysty jumys istep jatqan óńirlerdiń biri.
Sarqan aımaǵynda egistikti sýmen qamtamasyz etýdi jaqsartý úshin uzyndyǵy 21,7 km bolatyn Táýke kanalynyń 10,5 km, Ayly – Ózek kanalynyń 10,87 km kúrdeli jóndeýden ótpek. Jóndeý jumystaryna 888,7 mln.teńge qarajat qarastyrylyp, oblystyq aýylsharýashylyǵy basqarmasy tarapynan konkýrs jarııalandy. 
Sarqan aýdandyq aýylsharýashylyǵy bóliminiń basshysy Jandos Ómirsadyqtyń aıtýynsha, bıyl egis alqabynyń kólemi 97 641 gektardy qurap otyr.
– Jyl saıyn qant qyzylshasy alqabynyń kólemi de artyp keledi. Osy jyly aýdan boıynsha 3315 gektar qyzylsha sebiledi dep josparlap otyrmyz. Búgingi kúni kóktemgi dala jumystaryna óńir sharýalary tolyq daıyn. Aýylsharýashylyǵy tehnıkalarynyń 93% jumys bastaýǵa saqadaı-saı. Dala jumystaryn merziminde aıaqtaý úshin jeńildetilgen jaǵar-janarmaıdyń ár lıtrin 168 teńgeden aldyq, – deıdi J.Ómirsadyq.
Jalpy Almaty oblysynda bıylǵy jyly aýylsharýashylyǵy daqyldarynyń alqaby 2 myń gektarǵa ulǵaıyp, 970,5 myń gektarǵa jetti. Kóktemgi egis jumystary bıyl 10 naýryzda bastaldy. Qazirge deıin 3,7 myń gektar jer jyrtyldy, 0,6 myń gektar jerge dándi daqyldar sebildi. Sol sııaqty, osy jyly Jetisý óńirindegi alqaptardyń ylǵal saqtaý tehnologııasymen qamtylý deńgeıin 150,6 myń gektarǵa jetkizý josparlanǵan.
