جەتىسۋ وڭىرىندە مەملەكەت قولداۋىنىڭ ارقاسىندا جىل سايىن ەگىس القاپتارىنىڭ كولەمى ۇلعايتىلىپ، اۋىلشارۋاشىلىعى تەحنيكالارىمەن قامتۋ دەڭگەيى ارتىپ كەلەدى. بۇل ءوڭىردىڭ دامۋىنا، حالىقتىڭ تۇرمىس ساپاسىن جاقسارتۋعا ىقپال ەتۋدە. ماسەلەن، وتكەن جىلى سارقان اۋدانىندا 1 ملرد. 220 ملن. تەڭگەگە ەگىس جۇمىستارىنا ارنالعان زامانعا ساي تەحنيكالار ساتىپ الىنعان.
سارقان اۋداندىق اكىمدىگىنىڭ مالىمەتىنە قاراعاندا، تەحنيكانىڭ 37 داناسى «قازاگروقارجى» اق ارقىلى، بەسەۋى باسقا ليزينگتىك كومپانيالار ارقىلى الىنعان. قالعان تەحنيكالار شارۋاشىلىقتاردىڭ ءوز قاراجاتى ەسەبىنەن ساتىپ العان. اتاپ ايتساق، كومباين، تراكتور، تۇقىم سەپكىش، ءشوپ جينايتىن، جۇك تيەيتىن، جۇگەرى وراتىن تىركەمەلەر، تۇقىم تازالاعىش، دارىلەگىش تەحنيكالار اگرارلىق سالا ماماندارىنىڭ يگىلىگىنە پايدالانىلۋدا. 
– 2008 جىلى شارۋا قوجالىعىن جالعىز تراكتورمەن جانە 7 جۇمىسشىمەن باستاعان ەدىم. ارينە، باستاپقى كەزدە وتە قيىن بولعانىن جاسىرمايمىن. جەردى يگەرۋ، جىرتۋ، سەبۋ، ءونىمدى جيناۋ بارىسىندا تەحنيكا تاپشىلىعى قاتتى بىلىنەتىن. تاباندى ەڭبەكتىڭ جانە مەملەكەتتەن جاسالاتىن جەڭىلدىك پەن قولداۋلاردىڭ ارقاسىندا بۇگىنگى كۇنى شارۋاشىلىقتا 100-دەن استام ءارتۇرلى اۋىلشارۋاشىلىق تەحنيكالارى بار، 70-تەن اسا ادام ەڭبەك ەتەدى. ماۋسىمدىق كەزەڭدە جۇمىسشىلاردىڭ سانى بۇدان دا ارتادى. كوبىنە ارپا، بيداي، جۇگەرى، سويا بۇرشاعى جانە قانت قىزىلشاسىن سەبەمىز. مەملەكەت تاراپىنان قولداۋ بولعاندىقتان اگرارلىق سالادا العا جىلجىپ كەلەمىز. وتكەن جىلدىڭ وزىندە ءار مال باسىنا جانە ساتىپ العان تەحنيكامنىڭ جارتى باعاسىنا سۋبسيديا تولەنىپ، قاراجات جاعىنان كوپ جەڭىلدىكتەر بەرىلدى، – دەيدى «حۋساينوۆ ح.ن» شارۋا قوجالىعىنىڭ باسشىسى ءحاسانالى حۋساينوۆ.
جىل باسىنان بەرى سارقان اۋدانى 209,2 ملن. تەڭگەگە 16 دانا ءارتۇرلى اۋىلشارۋشىلىق تەحنيكاسىن ساتىپ الىپ ۇلگەرگەن. جالپى وبلىستا 7 باعىت بويىنشا 51 سەرۆيستىك دايىنداۋ ورتالىعى قۇرىلىپ، «جەتىسۋ» اكك ارقىلى ساتىپ الىنعان 1204 دانا تەحنيكا جەڭىلدەتىلگەن شارتتارمەن قارجىلىق ليزينگىگە بەرىلدى. بۇل رەتتە وبلىسىمىز سدو-لار تابىستى جۇمىس ىستەپ جاتقان وڭىرلەردىڭ ءبىرى.
سارقان ايماعىندا ەگىستىكتى سۋمەن قامتاماسىز ەتۋدى جاقسارتۋ ءۇشىن ۇزىندىعى 21,7 كم بولاتىن تاۋكە كانالىنىڭ 10,5 كم، اششىلى – وزەك كانالىنىڭ 10,87 كم كۇردەلى جوندەۋدەن وتپەك. جوندەۋ جۇمىستارىنا 888,7 ملن.تەڭگە قاراجات قاراستىرىلىپ، وبلىستىق اۋىلشارۋاشىلىعى باسقارماسى تاراپىنان كونكۋرس جاريالاندى. 
سارقان اۋداندىق اۋىلشارۋاشىلىعى ءبولىمىنىڭ باسشىسى جاندوس ومىرسادىقتىڭ ايتۋىنشا، بيىل ەگىس القابىنىڭ كولەمى 97 641 گەكتاردى قۇراپ وتىر.
– جىل سايىن قانت قىزىلشاسى القابىنىڭ كولەمى دە ارتىپ كەلەدى. وسى جىلى اۋدان بويىنشا 3315 گەكتار قىزىلشا سەبىلەدى دەپ جوسپارلاپ وتىرمىز. بۇگىنگى كۇنى كوكتەمگى دالا جۇمىستارىنا ءوڭىر شارۋالارى تولىق دايىن. اۋىلشارۋاشىلىعى تەحنيكالارىنىڭ 93% جۇمىس باستاۋعا ساقاداي-ساي. دالا جۇمىستارىن مەرزىمىندە اياقتاۋ ءۇشىن جەڭىلدەتىلگەن جاعار-جانارمايدىڭ ءار ءليترىن 168 تەڭگەدەن الدىق, – دەيدى ج.ومىرسادىق.
جالپى الماتى وبلىسىندا بيىلعى جىلى اۋىلشارۋاشىلىعى داقىلدارىنىڭ القابى 2 مىڭ گەكتارعا ۇلعايىپ، 970,5 مىڭ گەكتارعا جەتتى. كوكتەمگى ەگىس جۇمىستارى بيىل 10 ناۋرىزدا باستالدى. قازىرگە دەيىن 3,7 مىڭ گەكتار جەر جىرتىلدى، 0,6 مىڭ گەكتار جەرگە ءداندى داقىلدار سەبىلدى. سول سياقتى، وسى جىلى جەتىسۋ وڭىرىندەگى القاپتاردىڭ ىلعال ساقتاۋ تەحنولوگياسىمەن قامتىلۋ دەڭگەيىن 150,6 مىڭ گەكتارعا جەتكىزۋ جوسپارلانعان.
