Qazaqstanǧa Qytaidan äkelınetın kiım kölemı biyl aitarlyqtai azaidy. Bırınşı kredittık biuronyŋ mälımetınşe, 2024 jyldyŋ qaŋtar-qyrküiek ailarynda elge 35,6 myŋ tonna kiım importtalǧan, dep habarlaidy "Adyrna".
Būl ötken jyldyŋ säikes kezeŋımen salystyrǧanda 49%-ǧa tömen körsetkış. Būdan da tömen deŋgei soŋǧy ret 2020 jyly tırkelgen.
Sarapşylar Qytaidan keletın kiım importynyŋ ekınşı jyl qatarynan qysqaryp jatqanyn atap öttı. Al oǧan deiıngı bes jylda – 2019–2023 jyldar aralyǧynda – būl körsetkış tūraqty ösıp otyrǧan.
Soǧan qaramastan, Qytai Qazaqstanǧa kiım jetkızetın eŋ ırı şeteldık serıktes märtebesın saqtap keledı. Jalpy importtyŋ 39%-y osy eldıŋ ülesınde.
İmport kölemınıŋ tömendeuı Türkiia tarapynan da baiqalady. Būl elden äkelınetın kiım mölşerı bır jyl ışınde 31%-ǧa azaiyp, 8,2 myŋ tonnaǧa tüsken.
Sonymen bırge, keibır baǧyttar boiynşa ösım tırkeldı. Atap aitqanda, Reseiden keletın kiım importy 13%-ǧa, Bangladeşten jetkızılımder 20%-ǧa artqan.
Mamandardyŋ aituynşa, naryqtaǧy būl özgerıster syrtqy ekonomikalyq jaǧdailar men logistikalyq faktorlar äserınen qalyptasyp otyr.
