AQSh prezıdenttigine saılanǵan Djo Baıdendi quttyqtaǵandardyń arasynda Reseı prezıdenti Vladımır Pýtın joq. Esesine ol keshe Kavkazdaǵy mazasyz aımaq – Taýly Qarabaq máselesine kóp kóńil bóldi dep habarlaıdy «Adyrna» ulttyq portaly Azattyqqa silteme jasap.
Pýtın Franııanyń jáne Túrkııanyń basshylarymen Taýly Qarabaqtaǵy qaqtyǵysty telefon arqyly talqylady. Al Armenııa ótken túni daýly aımaqtaǵy negizgi qala mańynda "keskilesken urys" júrdi dep habarlady.
7 qarashadaǵy telefonmen bolǵan suhbatta Reseı prezıdenti Vladımır Pýtın men Franııa prezıdenti Emmanýel Makron Taýly Qarabaq aımaǵyndaǵy etnıkalyq armıandar men Ázerbaıjan kúshteri arasynda soǵys júrip jatqanyna jáne urysqa Sırııa men Lıvııadan kelgen jasaqtardyń aralasqanyna alańdaýshylyq bildirdi. Kreml taratqan málimdemede osylaı delingen.
Prezıdentter Eýropadaǵy qaýipsizdik jáne yntymaqtastyq uıymynyń (EQYU) Mınsk toby arqyly jáne basqa joldarmen eki tarapqa araaǵaıyn bolý áreketin jalǵastyratynyn aıtty. Mınsk toby Taýly Qarabaq daýyn sheshý maqsatynda 1992 jyly qurylǵan, ony Reseı, Franııa jáne AQSh birlesip basqarady.
Sol kúni Pýtın Túrkııa prezıdenti Rejep Taıyp Erdoǵanmen sóılesti. Erdoǵan Reseı basshysyna Armenııa Ázerbaıjan jerinen shyǵyp, "kelissóz ústeline otyrýy tıis" degen pikir aıtqan. Bul málimdemeni resmı Ankara taratty.
1990 jyldary Ázerbaıjannan bólinip shyqtyq dep jarııalaǵan Taýly Qarabaq aımaǵynda bıylǵy qyrkúıektiń sońynda qaqtyǵys qaıta bastaldy. Sodan beri Ázerbaıjan kúshteri men Armenııanyń qoldaýyna súıenetin jasaqtar aımaqty baqylaý úshin soǵysyp jatyr.
Alty aptaǵa jýyq atys saldarynan keminde 1 myń adam qaza boldy. Qurbandar sany budan da kóp bolýy múmkin. Bul – shırek ǵasyrdan beri sheshilmeı kele jatqan konflıktiniń eń qandy kezeńi bolyp otyr. Birneshe ret ýaqytsha bitimge talpynys jasalǵanymen, olar nátıje bermedi.
Túrkııa separatıstermen kúreste Ázerbaıjanǵa kómektesý úshin Qarabaqqa jaldamaly ásker jiberip otyr dep aıyptalady. Sarapshylardyń aıtýynsha, Ankara uzaqtan beri Máskeý ústemdik etip kele jatqan kelissóz ústeline otyrǵysy keledi.
Máskeý ústemdik etetin Ujymdyq qaýipsizdik sharty uıymyna jáne Eýrazııa ekonomıkalyq odaǵyna múshe Armenııa dástúrli odaqtasty – Reseıden kómek surady.
Sol kúni Armenııa Ázerbaıjan kúshteriniń Taýly Qarabaqtaǵy basty eldimekenderdiń biri Shýshıdi (ázerbaıjan tilinde Shýsha) atqylaǵanyn, olarǵa toıtarys berilgenin habarlady.
Ázerbaıjan qorǵanys mınıstri Shýshaǵa shabýyl jasaldy degen aqparat "múlde shyndyqqa janaspaıdy" dedi.
Tóbede ornalasqan Shýsha bólingendik dep jarııalaǵan aımaq ortalyǵy – Stepanakertti Armenııa aýmaǵymen jalǵap jatqan kúre jolda ornalasqan. Armenııa aımaqtyń táýelsizdigin moıyndamaǵanymen, Qarabaqtaǵy separatısterdiń táýelsizdik jolyndaǵy kúresin qoldaıdy.
