Qazaqstan Prezıdenti Qasym-Jomart Toqaevtyń Mońǵolııaǵa memlekettik sapary Ortalyq Azııa men Mońǵolııa arasyndaǵy strategııalyq áriptestiktiń jańa kezeńin aıqyndap otyr, dep habarlaıdy "Adyrna" ulttyq portaly.
Mońǵolııa Prezıdenti Ýhnaagıın Húrelsúhtiń shaqyrýymen júzege asqan bul sapar barysynda eki el arasyndaǵy yntymaqtastyqty «strategııalyq áriptestik» deńgeıine kóterýge arnalǵan birqatar mańyzdy kelisimderge qol qoıyldy.
Folklortanýshy ǵalym, fılologııa ǵylymdarynyń kandıdaty Aqedil Toıshanuly jelidegi paraqshasynda jazba jarııalady.
"Qazaqstan Respýblıkasynyń Prezıdenti Qasym-Jomart Toqaev «Mońǵolııa eline memlekettik sapar Joshy ulysynyń 800 jyldyǵyna tuspa-tus kelýi úlken sımvolıkalyq mánge ıe» dep tamyrly tarıhymyz, baýyrlastyq baılanysymyz tereńde ekenine mańyz berdi.
Prezıdent Shyńǵyshan mýzeıine arnaıy baryp, qurmetti qonaqtar kitabyna:
«Shyńǵys han ulttyq mýzeıi – uly tulǵanyń jáne tutas memlekettiń shejiresi. Rýhanııat ordasy el ıgiligine qyzmet ete bersin. Mońǵolııa halqynyń mereıi ústem bolsyn!» dep jyly lebizin qaldyrdy. Bul mýzeı – Móde Táńirqut, Bilge qaǵan, Kúltegin, Shyńǵys han qurǵan kóshpeli ımperııalardyń qazynalary toptastyrylǵan biregeı keshen. Mýzeıdiń Altyn Orda memleketina arnalǵan saraıynyń tórinde Túrki akademııasynyń Shyńǵyshan mýzeıine tartý etken Joshy han kúmbeziniń maketi jaıǵasqan. Bul týraly Moname agenttigi taratqan habarda «Mýzeı dırektory, akademık S.Chýlýýn Prezıdentke memlekettik dástúr, tarıh, mádenı qazynalardy tamashalatty.2021 jyly Halyqaralyq Túrki akademııasy basshysy Darhan Qydyráli uıymdastyrýymen syıǵa tartqan Joshy han mazarynyń maketi tanystyryldy» dep habarlady Moname agenttigi.
Kóshpeli, kórshi eki eldiń dostyǵy nyǵaıyp, keregesi keńigenin kórgende abyz aqyn Maǵjan Jumabaevtyń myna óleńi oıǵa orala beredi:
Týmaıdy adamzatta Shyńǵystaı er,
Danyshpan, tuńǵıyq oı, bolat jiger.
Shyńǵystaı arystannyń qur aty da
Adamnyń júregine jiger berer", - delingen jazbada.
Басқалармен бөлісе отырыңыз
