«Aq jol» partııasynyń depýtattary tórt jyl buryn aqysy tólense de Túrkistan oblysynyń aýyldaryna búgingi kúnge deıin kógildir otynnyń jetpegineni ashýly. Frakııanyń tıisti depýtattyq saýalyn Májilis depýtaty Berik Dúısembınov joldady. Osy depýtattyq saýaldyń tolyq nusqasyn usynyp otyrmyz.
Qazaqstan Respýblıkasynyń
Indýstrııa jáne ınfraqurylymdyq
damý mınıstri
B. B. Atamqulovqa
Qazaqstan Respýblıkasynyń
Energetıka mınıstri
N. A. Noǵaevqa
DEPÝTATTYQ SAÝAL
Qurmetti Beıbit Bákiruly!
Qurmetti Nurlan Asqaruly!
Elbasy N.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda, ómir súrýge jaıly orta qalyptastyrý máselesin erekshe alǵa qoıǵan bolatyn. Osy Joldaýda, eń aldymen, tirshilikke jáne jumys isteýge qolaıly eldi mekenniń jáne sapaly ınfraqurylymnyń bolý qajettiligi atap ótilgen.
Elbasy budan bylaı halyqtyń tabysy men ómir súrý sapasy memleket tıimdiliginiń basty ólshemi bolatynyn jáne árbir mınıstr men ákimniń jumysy dál osy parametrler boıynsha baǵalanatynyn erekshe eskertti.
Osy oraıda, búginde as-sýyn aǵash jaǵyp ázirlep, úıin kómirmen jylytyp otyrǵan halqymyz úshin gaz qoljetimdiligi óte ózekti, turmys sapasynyń mańyzdy kórsetkishi dep sanaımyz.
Alaıda ótken aptada «Aq jol» frakııasy depýtattarynyń Túrkistan oblysynyń turǵyndarymen kezdesý barysynda, bul máseleniń áli de tolyǵymen sheshimi tabylmaı otyrǵandyǵynan habardar boldyq. Aýyl azamattary gazben qamtý máselesin taǵy da qaıtalaı kóterip, ákimderdiń ásem esepteriniń shyndyqtan alys ekenin jarysa aıtyp, janaıqaıyn jetkizdi.
Árıne, rýhanı astanamyz Túrkistan búginde kúnnen-kúnge ózgerip, qala kelbeti oblys ortalyǵynyń mártebesine laıyq, gúldenip kele jatqandyǵyn kórip otyrmyz. Degenmen, sham jaryǵy túbine túspes dep atam qazaq eskertkendeı, qazaqtyń qara shańyraǵy – ońtústik aımaq, ınfraqurylymdyq damý, sapaly ómir súrý turǵysynan tek Túrkistan qalasymen ǵana shektelip qalmaýy kerek dep esepteımiz. Onyń ústine qudaıǵa shúkir elimiz kúnin kóre almaı qol qýsyryp otyrǵan joq, álemdegi 30 damyǵan memlekettiń qataryna kiremiz dep bıik maqsat qoıǵan el. Biraq, jylyna 50mlrd sharshy metr gaz óndiretin Qazaqstannyń halqy sol gazben úıin jylyta almasa biz qandaı ómir sapasy týraly aıta alamyz, ondaı álemdik reıtıngtiń quny bes tıyn.
Mysaly, Túrkistan oblysy Keles aýdany 17 myńǵa jýyq halqy bar «Birtilek» aýyldyq okrýgynyń, «Eńbekshi» jáne «Oraz ata» eldi mekenderiniń turǵyndarynyń aıtýynsha, osydan 4 jyl buryn atalmysh aýyldarǵa gaz qubyry salynyp, turǵyndar óz aqshalary esebinen úılerine qubyr tartyp, gaz peshterine deıin qoıyp alǵan. Osyndaı jaǵdaı Jetisaı aýdanynyń Kóktóbe aýylynda, Saıram aýdanynyń jeti aýylynda, Ordabasy, Qazyǵurt aýdany aýyldarynda oryn alǵan.
Ókinishke oraı búgingi kúnge deıin osy aýyldarǵa kógildir otyn áli jetpegen. Eger gaz bolmasa, turǵyndardan nege 4 jyl buryn qarjy jınalǵan?
Turǵyndarmen kezdesý kezindegi shaǵymdarǵa súıensek Jetisaı aýdanyndaǵy 72 mekteptiń 39 áli de kómir qyzýymen jylynady. Mysaly:
M. Mámetova atyndaǵy №33-shi;
№35 Qaraózek;
№69 Maqtashy;
№30 I.Jansúgirov;
№32 Sh.Qudaıberdıev atyndaǵy mektepter ornalasqan eldi mekenderge gaz sonaý 2014 jyly berilipti, biraq sol ýaqyttan beri attaı alty jyl ótse de bul mektepterdiń gazǵa qoly jetpeı otyr.
Gazdyń qosylmaý sebebin jergilikti ákimshilikte, ókiletti organdar ártúrli tehnıkalyq sebeptermen túsindirýde. Biraq, mardymdy,naqty jaýap ala almadyq.
Árıne, syltaýdyń túri kóp, qaǵaz bárin kóteredi. Osy aýyl azamattary men mektepterge gazdyń jetpeýine sebep bolyp otyrǵan sheneýnikter men gaz qubyrynyń basynda otyrǵan ókiletti organnyń basshylaryna tórt jyl boıy kógildir otynsyz otyrǵan aýyldarǵa kóship, balalaryn sýyq mektepte oqytyp, kele jatqan qystyń qarsańynda tezekpen jylynyp ómir súrýge keńes beremiz. Sonda múmkin, bul másele jyldam sheshiler.
Joǵaryda aıtylǵandardy eskere otyryp, «Aq jol» frakııasy:
- Túrkistan oblysyndaǵy atalǵan aýyldar men mektepterge búgingi kúnge deıin gaz kelmeý sebebi, oǵan jaýapty laýazymdy,zańdy tulǵalardy anyqtap, olardyń qandaı jaýapkershilikke tartylǵandyǵy jóninde jáne bul másele óz sheshimin qashan tabatyny týraly aqparat suraıdy .
Qurmetpen,
«Aq jol» QDP frakııasynyń depýtattary
