«اق جول» پارتياسىنىڭ دەپۋتاتتارى ءتورت جىل بۇرىن اقىسى تولەنسە دە تۇركىستان وبلىسىنىڭ اۋىلدارىنا بۇگىنگى كۇنگە دەيىن كوگىلدىر وتىننىڭ جەتپەگىنەنى اشۋلى. فراكتسيانىڭ ءتيىستى دەپۋتاتتىق ساۋالىن ءماجىلىس دەپۋتاتى بەرىك دۇيسەمبينوۆ جولدادى. وسى دەپۋتاتتىق ساۋالدىڭ تولىق نۇسقاسىن ۇسىنىپ وتىرمىز.
قازاقستان رەسپۋبليكاسىنىڭ
يندۋستريا جانە ينفراقۇرىلىمدىق
دامۋ ءمينيسترى
ب. ب. اتامقۇلوۆقا
قازاقستان رەسپۋبليكاسىنىڭ
ەنەرگەتيكا ءمينيسترى
ن. ا. نوعاەۆقا
دەپۋتاتتىق ساۋال
قۇرمەتتى بەيبىت باكىرۇلى!
قۇرمەتتى نۇرلان اسقارۇلى!
ەلباسى ن.نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا، ومىر سۇرۋگە جايلى ورتا قالىپتاستىرۋ ماسەلەسىن ەرەكشە العا قويعان بولاتىن. وسى جولداۋدا، ەڭ الدىمەن، تىرشىلىككە جانە جۇمىس ىستەۋگە قولايلى ەلدى مەكەننىڭ جانە ساپالى ينفراقۇرىلىمنىڭ بولۋ قاجەتتىلىگى اتاپ وتىلگەن.
ەلباسى بۇدان بىلاي حالىقتىڭ تابىسى مەن ءومىر ءسۇرۋ ساپاسى مەملەكەت تيىمدىلىگىنىڭ باستى ولشەمى بولاتىنىن جانە ءاربىر مينيستر مەن اكىمنىڭ جۇمىسى ءدال وسى پارامەترلەر بويىنشا باعالاناتىنىن ەرەكشە ەسكەرتتى.
وسى ورايدا، بۇگىندە اس-سۋىن اعاش جاعىپ ازىرلەپ، ءۇيىن كومىرمەن جىلىتىپ وتىرعان حالقىمىز ۇشىن گاز قولجەتىمدىلىگى وتە وزەكتى، تۇرمىس ساپاسىنىڭ ماڭىزدى كورسەتكىشى دەپ سانايمىز.
الايدا وتكەن اپتادا «اق جول» فراكتسياسى دەپۋتاتتارىنىڭ تۇركىستان وبلىسىنىڭ تۇرعىندارىمەن كەزدەسۋ بارىسىندا، بۇل ماسەلەنىڭ ءالى دە تولىعىمەن شەشىمى تابىلماي وتىرعاندىعىنان حاباردار بولدىق. اۋىل ازاماتتارى گازبەن قامتۋ ماسەلەسىن تاعى دا قايتالاي كوتەرىپ، اكىمدەردىڭ اسەم ەسەپتەرىنىڭ شىندىقتان الىس ەكەنىن جارىسا ايتىپ، جانايقايىن جەتكىزدى.
ارينە، رۋحاني استانامىز تۇركىستان بۇگىندە كۇننەن-كۇنگە وزگەرىپ، قالا كەلبەتى وبلىس ورتالىعىنىڭ مارتەبەسىنە لايىق، گۇلدەنىپ كەلە جاتقاندىعىن كورىپ وتىرمىز. دەگەنمەن، شام جارىعى تۇبىنە تۇسپەس دەپ اتام قازاق ەسكەرتكەندەي، قازاقتىڭ قارا شاڭىراعى – وڭتۇستىك ايماق، ينفراقۇرىلىمدىق دامۋ، ساپالى ءومىر ءسۇرۋ تۇرعىسىنان تەك تۇركىستان قالاسىمەن عانا شەكتەلىپ قالماۋى كەرەك دەپ ەسەپتەيمىز. ونىڭ ۇستىنە قۇدايعا شۇكىر ەلىمىز كۇنىن كورە الماي قول قۋسىرىپ وتىرعان جوق، الەمدەگى 30 دامىعان مەملەكەتتىڭ قاتارىنا كىرەمىز دەپ بيىك ماقسات قويعان ەل. بىراق، جىلىنا 50ملرد شارشى مەتر گاز وندىرەتىن قازاقستاننىڭ حالقى سول گازبەن ءۇيىن جىلىتا الماسا ءبىز قانداي ءومىر ساپاسى تۋرالى ايتا الامىز، ونداي الەمدىك رەيتينگتىڭ قۇنى بەس تيىن.
مىسالى، تۇركىستان وبلىسى كەلەس اۋدانى 17 مىڭعا جۋىق حالقى بار «بىرتىلەك» اۋىلدىق وكرۋگىنىڭ، «ەڭبەكشى» جانە «وراز اتا» ەلدى مەكەندەرىنىڭ تۇرعىندارىنىڭ ايتۋىنشا، وسىدان 4 جىل بۇرىن اتالمىش اۋىلدارعا گاز قۇبىرى سالىنىپ، تۇرعىندار ءوز اقشالارى ەسەبىنەن ۇيلەرىنە قۇبىر تارتىپ، گاز پەشتەرىنە دەيىن قويىپ العان. وسىنداي جاعداي جەتىساي اۋدانىنىڭ كوكتوبە اۋىلىندا، سايرام اۋدانىنىڭ جەتى اۋىلىندا، ورداباسى، قازىعۇرت اۋدانى اۋىلدارىندا ورىن العان.
وكىنىشكە وراي بۇگىنگى كۇنگە دەيىن وسى اۋىلدارعا كوگىلدىر وتىن الى جەتپەگەن. ەگەر گاز بولماسا، تۇرعىنداردان نەگە 4 جىل بۇرىن قارجى جينالعان؟
تۇرعىندارمەن كەزدەسۋ كەزىندەگى شاعىمدارعا سۇيەنسەك جەتىساي اۋدانىنداعى 72 مەكتەپتىڭ 39 ءالى دە كومىر قىزۋىمەن جىلىنادى. مىسالى:
م. مامەتوۆا اتىنداعى №33-ءشى;
№35 قاراوزەك;
№69 ماقتاشى;
№30 ى.جانسۇگىروۆ;
№32 ش.قۇدايبەرديەۆ اتىنداعى مەكتەپتەر ورنالاسقان ەلدى مەكەندەرگە گاز سوناۋ 2014 جىلى بەرىلىپتى، بىراق سول ۋاقىتتان بەرى اتتاي التى جىل وتسە دە بۇل مەكتەپتەردىڭ گازعا قولى جەتپەي وتىر.
گازدىڭ قوسىلماۋ سەبەبىن جەرگىلىكتى اكىمشىلىكتە، وكىلەتتى ورگاندار ءارتۇرلى تەحنيكالىق سەبەپتەرمەن تۇسىندىرۋدە. بىراق، ماردىمدى،ناقتى جاۋاپ الا المادىق.
ارينە، سىلتاۋدىڭ ءتۇرى كوپ، قاعاز ءبارىن كوتەرەدى. وسى اۋىل ازاماتتارى مەن مەكتەپتەرگە گازدىڭ جەتپەۋىنە سەبەپ بولىپ وتىرعان شەنەۋنىكتەر مەن گاز قۇبىرىنىڭ باسىندا وتىرعان وكىلەتتى ورگاننىڭ باسشىلارىنا ءتورت جىل بويى كوگىلدىر وتىنسىز وتىرعان اۋىلدارعا كوشىپ، بالالارىن سۋىق مەكتەپتە وقىتىپ، كەلە جاتقان قىستىڭ قارساڭىندا تەزەكپەن جىلىنىپ ومىر سۇرۋگە كەڭەس بەرەمىز. سوندا مۇمكىن، بۇل ماسەلە جىلدام شەشىلەر.
جوعارىدا ايتىلعانداردى ەسكەرە وتىرىپ، «اق جول» فراكتسياسى:
- تۇركىستان وبلىسىنداعى اتالعان اۋىلدار مەن مەكتەپتەرگە بۇگىنگى كۇنگە دەيىن گاز كەلمەۋ سەبەبى، وعان جاۋاپتى لاۋازىمدى،زاڭدى تۇلعالاردى انىقتاپ، ولاردىڭ قانداي جاۋاپكەرشىلىككە تارتىلعاندىعى جونىندە جانە بۇل ماسەلە ءوز شەشىمىن قاشان تاباتىنى تۋرالى اقپارات سۇرايدى .
قۇرمەتپەن,
«اق جول» قدپ فراكتسياسىنىڭ دەپۋتاتتارى
