Mır esimdi sottalýshy óziniń Tergeý ızolıatoryndaǵy jumysy týraly aıtty.
Tanys emes adamǵa syrty tikenek symmen qorshalǵan «túrmeden» qorqynyshty oryn joq sııaqty. Biz túrme dep aıtyp júrgen bul oryndy olaı atamasa da bolady. Sebebi jasaǵan qylmystaryna qaraı qaýipsiz bolý úshin kolonııalar men sottalǵandardy ustaý tártibi ártúrli. Tirshiliktiń túzý jolynan aýytqyp bas bostandyǵynan aıyrylǵan adamdardy qaıtadan qalypty ómirge qaıtarýdyń birden bir tásili – tárbıe jumysy. Bul oraıda sottalǵandarmen túrli baǵytta jumystar júrgiziledi. Bir sózben aıtqanda óz taǵdyryn óz qolyna alyp, adam bolamyn degen adamǵa múmkindik mol. Mysaly bizdiń búgingi áńgimemizge arqaý bolyp otyrǵan Mır esimdi azamat Almaty qalasyndaǵy LA-155/18 túzeý mekemesinde jazasyn ótep jatyr. Atalǵan túzeý mekemesi tergeý ızolıatory bolǵandyqtan tutqyndar sottyń úkimin kameralarda jatyp kútedi. Mır da sondaı jandardyń biri. Tek sottyń sheshimimen shyqqan jazasyn tergeý ızolıatorynda kitaphanashy bolyp ótkerýde. Búginde ol kameradaǵy tutqyndardyń asyǵa kútetin adamy.
Mırdiń ózi asa kólemde alaıaqtyq jasaǵany úshin sottalǵan. Ol jábirlenýshige Almaty qalasynda naryqtaǵy baǵadan tómen páter alyp beremin dep usynys jasaǵan. Sodan soń satyp alýshylarǵa ózi jalǵa alǵan páterdi kórsetip, olardan aldyn ala kepil aqsha alǵan.
– Meniń jumysym bekitilgen kestege saı ár beketke kitap tasýdan bastalady. Búgin mysaly keste boıynsha №8 jáne №9-shy beketterdegi tutqyndarǵa kitap aparamyn, biraq kesteden tys №18-shi beketke de baramyn. Sebebi onda meniń turaqty oqyrmanym beket kezekshisi arqyly jańa kitapqa tapsyrys berip jiberipti. Iaǵnı Master ı Margarıtany oqyp bitken bolýy kerek. Keıde oqyrmandar suraǵan kitaptyń bir ǵana danasy bolady da, olardyń kezek kútýine týra keledi. Men tapsyrys berýshige sol kitapty ákelgende jaýdyrǵan alǵystaryn kórseńiz, týra solarǵa syıaqy ákelgendeı sezinemin – deıdi Mır.
Kitapty oqý úshin emes, kerisinshe kitap betterin jyrtyp alyp, temeki oraıtyn «oqyrmandar» da bolady eken.
– Árıne, ondaı júreksiz adamdarǵa ursamyn, ekinshi ret ol kameraǵa kitap aparmaımyn. Maǵan ózimniń osy jumysym unaıdy. Ózim de sottyń úkimi shyqqansha bir jyldan asa kamerada otyrǵanda, 100-den asa kitap oqydym. Aı saıyn 50 000 teńge eńbekaqy alamyn – deıdi túzeý mekemesiniń kitaphanashysy.
Kameralarǵa kitap taratý barysynda eki aıdyń ishinde 15 kitap oqyǵan tutqynmen áńgimelesýdiń sáti tústi. Osy joly da oǵan Mır jańa kitaptar ákelipti.
Tergeý ızolıatorynda ınternetke qosylǵan smartfon joq. Sondyqtan tutqynyndaǵylar munda ýaqytsha jatqanymen eski kezdi eske túsirip, nebir avtorlardyń shyǵarmalaryn kitaptan oqıdy.Búgingi tańda kitaphana qory 5000 kitaptan asady.
Qazir Almaty qalasyndaǵy LA-155/18 tergeý ızolıatorynda 1300-den astam adam bar, onyń 8 paıyzy áıelder. Jyl basynan beri Tergeý ızolıatorynan 1500-den astam adam bosatyldy.Statıstıka kórsetip otyrǵandaı, tergeý ızolıatorynda jatqandardyń 22 paıyzy urlyq jasaǵandar, 13 paıyzy alaıaqtyq, 6 paıyzy esirtki zattaryna qatysty qylmys jasaǵandar. Qalǵandary basqa da ártúrli baptar boıynsha tutqynǵa alynǵandar.
Almaty qalasy boıynsha QAJD
