Qudaıǵa shúkir, elimizde sybaılas jemqorlyq sharýashylyǵy qarqyndy damyp keledi. Jemeıtinder jer astynda degen uranmen qarýlanǵan, aýyzdary alty qarys jemqorlar elimizdiń maqtanyshy.
Biz jemqorlarymyzmen maqtana alamyz. Olardy beker sottap jatyrmyz. Myqtylaryna Astana men Almatyda ereksheletip eskertkish ornatýymyz kerek. Tipti, keıbirine Shymkentten, ne Tarazdan nemese Astanadan kóshe berse de jarasady.
Qudaıǵa shúkir deıik, jemqorlarymyz joq bolsa qaıter edik? Qudaı joqtan saqtasyn! Jemqorlarymyz bolmasa, qalaı kedeılenip keter edik? Baı men kedeıdi ajyrata almaıtyn jaǵdaıǵa dýshar bolar edik qoı? Masqara bolǵan degen sol bolar edi! Jemqor sheneýnikterimizden aınalaıyq! Olarǵa alǵys hat jarııalap, qurmettemesek, otyz eldiń qataryna qalaı kiremiz? Ekonomıkamyz qalaı damıdy? Jemqorlyq - indet dep jatady. Olardy olaı qorlamaý kerek! Jemqorlyq jasasyn, jemqorlyqty órkendetip, qosymsha ınvestıııalar tartý kerek. Shetel jemqorlaryn degendeı. Tipti, jemqorlar qoryn uıymdastyrsaq? Arnaıy qordan jep otyratyn. «Ataýyńdy jegirler» dep qarǵaı bermeý kerekpiz. As... Jooq, jemqorlyq - adamnyń arqaýy. Jaqynda ǵana qorǵanys mınıstrliginiń jeti laýazymdy sheneýnigi sottalyp, kósegemiz kógerip qaldy. Túrli-tústi bolyp. Mundaı oqıǵa shetelde bolyp kórip pe? Tek bizdiń elde ǵana - osyndaı! Muny úlgi etýimiz kerek! Jeteýine jeti orden bersek te, taqııamyzǵa tarlyq etpeıdi. Túrmege toǵytpaı, qudalyqtarǵa shaqyrý kerek. Astylaryna - taı, aýyzdaryna - piste maı.
Sybaılas jemqrlyqqa qarsy kúres departamentteri deımiz. Olar nege boz kilemge shyǵyp, kúrese beredi? Mundaı sportty doǵaraıyq. Óıtkeni, olar kúrese, kúrese sharshap, ózderi de jegishter qataryna qosyldy.
Búginde bilim salasyndaǵy jemqorlar jarqyrap kórinip keledi. Qudaıǵa shúkir. Jastarymyzdy osyndaı jemqorlyqqa baýlý úshin ýnıversıtetterde «Jalmaýyzdar» fakýltetin ashyp, onda jemqor professorlar dáris berse, netken qýanysh!
Qurylys salasyndaǵy jemqorlyqty da damyta túsý kerek. Tender degen jeńder degen qaǵıdanyń salalaryn damyta bersek, úılerimiz qulap, adamdar sulap, baqytty ómir súrer edik. Paraqorlyqty demokratııalandyrsaq qaıtedi? Nege jasyryn beredi, jasyryn alady? Arnaıy paraqorlyq dúńgirshekterin nege uıymdastyrmasqa? Nemese, parqorlar kofe iship otyryp, beretińin berip degendeı... Kerek bolsa, para bergenin notarıýs arqyly zańdastyryp alý kerek qoı? Mysaly, bylaı: «Men Qulqynbaev Jegishbaı, Bergishbaı Alaǵanovtan júz mıllıon teńgeni para retinde alǵanymdy rastaımyn. Parany otbasymdy asyraı almaǵandyqtan, mıllıonerler qataryna qosylý úshin alǵanmyn. Basqa bóten maqsatqa alsam, aýzyma alty júz shybyn kirip ketsin, tisimniń arasynda et qalyp, shirip ketsin!» degendeı. Jasa, jemqorlyq, qudaıǵa shúkir, jemqorlyq páleket degenderiń jerge túkir!
Muhtar Sherimniń qyshqyl satırasy,
«Adyrna» ulttyq portaly
