«Ádildik joly» qoǵamdyq birlestiginiń atqarýshy dırektory Dıdar Smaǵulov sybaılas jemqorlyqqa qarsy is-qımyl salasyndaǵy jetistikteri úshin AQSh memlekettik departamentiniń joǵary halyqaralyq marapatyna ıe boldy, dep habarlaıdy “Adyrna” ulttyq portaly.
Syılyqty AQSh-tyń memlekettik hatshysy Entonı Blınken tabystady. Bul týraly Smaǵulov jeke paraqshasynda jazdy.
Bul marapat Dıdar Smaǵulovqa Qazaqstandaǵy sybaılas jemqorlyq deńgeıin tómendetý jáne júıeli reformalar júrgizý salasyndaǵy jumystary úshin berildi. Ol bul jetistikti «Ádildik joly» komandasynyń orasan zor eńbeginiń nátıjesi dep atap ótti.
“Men úshin bul - ujymdyq marapat. Bizdiń komandamyzdyń Qazaqstanda sybaılas jemqorlyqqa qarsy tıimdi reformalar engizý jáne quqyq buzýshylyqqa jol bergen tulǵalardy jaýapkershilikke tartý jolyndaǵy eńbegi halyqaralyq deńgeıde moıyndalǵanyna qýanyshtymyn”, – dedi ol.
Sondaı-aq, Dıdar Smaǵulov otbasyna, dostaryna jáne áriptesterine qoldaý kórsetkeni úshin alǵysyn bildirdi.
“Bizdiń elimizdiń jemqorlyqqa qarsy kúres salasyndaǵy jetistikteriniń osyndaı joǵary deńgeıde moıyndalǵany kóńil qýantady”, – dep jazdy ol óz paraqshasynda.
