قۇدايعا شۇكىر، ەلىمىزدە سىبايلاس جەمقورلىق شارۋاشىلىعى قارقىندى دامىپ كەلەدى. جەمەيتىندەر جەر استىندا دەگەن ۇرانمەن قارۋلانعان، اۋىزدارى التى قارىس جەمقورلار ەلىمىزدىڭ ماقتانىشى.
ءبىز جەمقورلارىمىزمەن ماقتانا الامىز. ولاردى بەكەر سوتتاپ جاتىرمىز. مىقتىلارىنا استانا مەن الماتىدا ەرەكشەلەتىپ ەسكەرتكىش ورناتۋىمىز كەرەك. ءتىپتى، كەيبىرىنە شىمكەنتتەن، نە تارازدان نەمەسە استانادان كوشە بەرسە دە جاراسادى.
قۇدايعا شۇكىر دەيىك، جەمقورلارىمىز جوق بولسا قايتەر ەدىك؟ قۇداي جوقتان ساقتاسىن! جەمقورلارىمىز بولماسا، قالاي كەدەيلەنىپ كەتەر ەدىك؟ باي مەن كەدەيدى اجىراتا المايتىن جاعدايعا دۋشار بولار ەدىك قوي؟ ماسقارا بولعان دەگەن سول بولار ەدى! جەمقور شەنەۋنىكتەرىمىزدەن اينالايىق! ولارعا العىس حات جاريالاپ، قۇرمەتتەمەسەك، وتىز ەلدىڭ قاتارىنا قالاي كىرەمىز؟ ەكونوميكامىز قالاي داميدى؟ جەمقورلىق - ىندەت دەپ جاتادى. ولاردى ولاي قورلاماۋ كەرەك! جەمقورلىق جاساسىن، جەمقورلىقتى وركەندەتىپ، قوسىمشا ينۆەستيتسيالار تارتۋ كەرەك. شەتەل جەمقورلارىن دەگەندەي. ءتىپتى، جەمقورلار قورىن ۇيىمداستىرساق؟ ارنايى قوردان جەپ وتىراتىن. «اتاۋىڭدى جەگىرلەر» دەپ قارعاي بەرمەۋ كەرەكپىز. اس... جووق، جەمقورلىق - ادامنىڭ ارقاۋى. جاقىندا عانا قورعانىس مينيسترلىگىنىڭ جەتى لاۋازىمدى شەنەۋنىگى سوتتالىپ، كوسەگەمىز كوگەرىپ قالدى. ءتۇرلى-ءتۇستى بولىپ. مۇنداي وقيعا شەتەلدە بولىپ كورىپ پە؟ تەك ءبىزدىڭ ەلدە عانا - وسىنداي! مۇنى ۇلگى ەتۋىمىز كەرەك! جەتەۋىنە جەتى وردەن بەرسەك تە، تاقيامىزعا تارلىق ەتپەيدى. تۇرمەگە توعىتپاي، قۇدالىقتارعا شاقىرۋ كەرەك. استىلارىنا - تاي، اۋىزدارىنا - پىستە ماي.
سىبايلاس جەمقرلىققا قارسى كۇرەس دەپارتامەنتتەرى دەيمىز. ولار نەگە بوز كىلەمگە شىعىپ، كۇرەسە بەرەدى؟ مۇنداي سپورتتى دوعارايىق. ويتكەنى، ولار كۇرەسە، كۇرەسە شارشاپ، وزدەرى دە جەگىشتەر قاتارىنا قوسىلدى.
بۇگىندە ءبىلىم سالاسىنداعى جەمقورلار جارقىراپ كورىنىپ كەلەدى. قۇدايعا شۇكىر. جاستارىمىزدى وسىنداي جەمقورلىققا باۋلۋ ءۇشىن ۋنيۆەرسيتەتتەردە «جالماۋىزدار» فاكۋلتەتىن اشىپ، وندا جەمقور پروفەسسورلار ءدارىس بەرسە، نەتكەن قۋانىش!
قۇرىلىس سالاسىنداعى جەمقورلىقتى دا دامىتا ءتۇسۋ كەرەك. تەندەر دەگەن جەڭدەر دەگەن قاعيدانىڭ سالالارىن دامىتا بەرسەك، ۇيلەرىمىز قۇلاپ، ادامدار سۇلاپ، باقىتتى ءومىر سۇرەر ەدىك. پاراقورلىقتى دەموكراتيالاندىرساق قايتەدى؟ نەگە جاسىرىن بەرەدى، جاسىرىن الادى؟ ارنايى پاراقورلىق دۇڭگىرشەكتەرىن نەگە ۇيىمداستىرماسقا؟ نەمەسە، پارقورلار كوفە ءىشىپ وتىرىپ، بەرەتىڭىن بەرىپ دەگەندەي... كەرەك بولسا، پارا بەرگەنىن نوتاريۋس ارقىلى زاڭداستىرىپ الۋ كەرەك قوي؟ مىسالى، بىلاي: «مەن قۇلقىنباەۆ جەگىشباي، بەرگىشباي الاعانوۆتان ءجۇز ميلليون تەڭگەنى پارا رەتىندە العانىمدى راستايمىن. پارانى وتباسىمدى اسىراي الماعاندىقتان، ميلليونەرلەر قاتارىنا قوسىلۋ ءۇشىن العانمىن. باسقا بوتەن ماقساتقا السام، اۋزىما التى ءجۇز شىبىن كىرىپ كەتسىن، ءتىسىمنىڭ اراسىندا ەت قالىپ، ءشىرىپ كەتسىن!» دەگەندەي. جاسا، جەمقورلىق، قۇدايعا شۇكىر، جەمقورلىق پالەكەت دەگەندەرىڭ جەرگە تۇكىر!
مۇحتار شەرىمنىڭ قىشقىل ساتيراسى،
«ادىرنا» ۇلتتىق پورتالى
