"Balalar turatyn jerine jáne oqytý tiline qaramastan sapaly bilim alýy tıis... Óıtkeni olar - memleketimizdiń bolashaǵy. Ákimderdiń jumysyn osy krıterıı boıynsha baǵalaıtyn bolamyz".
Prezıdent Qasym-Jomart Toqaevtyń Qazaqstan halqyna Joldaýynan.
QR Bilim jáne ǵylym mınıstrliginiń sybaılas jemqorlyqqa qarsy is-qımyl jónindegi «ADAL BILIM» jobalyq keńsesiniń basshysy, M.S. Nárikbaev atyndaǵy KAZGUU Ýnıversıtetiniń basqarma tóraǵasy Talǵat Nárikbaev ýnıversıtetterdi oblys ákimdikteriniń qaramaǵyna berý kerek dep sanaıdy. Onyń aıtýynsha, aımaqtardaǵy joǵary oqý oryndarynyń jumysyn qaıta qaraý qajet. Bul týraly ol «ADAL BILIM» paraqshasynyń tikeleı efırinde habarlady.
"Mınıstr óńirlik JOO rektorlaryn tikeleı baqylaı almaıdy. Olar da bilim basqarmasynyń basshylary sııaqty ákimderdiń yqpalynda. Al memlekettik ýnıversıtetter negizinen aımaqtarda ornalasqan. Qazirgi ýaqytta bul ýnıversıtetter Bilim mınıstrligine qaraıdy. Rektorlardy taǵaıyndaıtyn da, tolyǵymen baqylaıtyn da Mınıstr. Eger mınıstrliktiń qaramaǵynan oblys ákimderi men jergilikti atqarýshy organdardyń qaramaǵyna berilse jaǵdaı jaqsy jaǵyna ózgeredi. Máselen Germanııada oqý oryndary ornalasqan jerine, ıaǵnı oblysyna bekitilgen. Osylaısha, joǵary oqý orny úshin jaýapkershilik mınıstrge emes, ákimge júkteledi", - dedi tikeleı efırde basqarma tóraǵasy.
Talǵat Nárikbaev máseleniń sheshimi retinde ákimderge óz óńirindegi eńbek naryǵynyń qajettiligine taldaý júrgizýdi jáne keıinnen alynǵan derekterge sáıkes óz mamandaryn oqytýdy usynady.
«Qazaqstannyń barlyq mektepteri úshin Bilim mınıstrligi qalaı jaýap beredi? Tipti osy maqsattarǵa bıýdjetten orasan zor qarajat bólingenniń ózinde mektep oqýlyqtarynyń bar-joǵyna monıtorıng júrgizý – tym kúrdeli mindet. Meniń oıymsha, óńirdegi bilim sapasyna oblys ákimi jaýap bergen kezde ǵana naqty nátıjege qol jetkizemiz. Jol jóndegennen góri ákimderdiń basty mindeti bilim berý sapasyn jaqsartý bolý kerek. Ákimniń bilim baǵytyndaǵy qyzmeti mektepterdiń qurylysymen ǵana shektelmeýge tıis, ol basqa oblystarmen básekelestik úshin, bilim berý mekemeleriniń materıaldyq-tehnıkalyq bazasyn jaqsartyp, oqytý sapasyn arttyryp, sondaı-aq muǵalimderiniń jalaqysyn kóterip, barynsha jaǵdaı jasaýǵa baǵyttalýy tıis», - dep jalǵastyrdy.
Aıta ketsek, elimizde 7 myńnan astam mektep jáne 10 myńnan astam mektepke deıingi uıym qyzmet etedi. Jańa oqý jylynda 3,3 mln oqýshy tirkelip otyr.
