"بالالار تۇراتىن جەرىنە جانە وقىتۋ تىلىنە قاراماستان ساپالى ءبىلىم الۋى ءتيىس... ويتكەنى ولار - مەملەكەتىمىزدىڭ بولاشاعى. اكىمدەردىڭ جۇمىسىن وسى كريتەري بويىنشا باعالايتىن بولامىز".
پرەزيدەنت قاسىم-جومارت توقاەۆتىڭ قازاقستان حالقىنا جولداۋىنان.
قر بىلىم جانە عىلىم مينيسترلىگىنىڭ سىبايلاس جەمقورلىققا قارسى ىس-قيمىل جونىندەگى «ADAL BILIM» جوبالىق كەڭسەسىنىڭ باسشىسى، م.س. نارىكباەۆ اتىنداعى KAZGUU ۋنيۆەرسيتەتىنىڭ باسقارما توراعاسى تالعات نارىكباەۆ ۋنيۆەرسيتەتتەردى وبلىس اكىمدىكتەرىنىڭ قاراماعىنا بەرۋ كەرەك دەپ سانايدى. ونىڭ ايتۋىنشا، ايماقتارداعى جوعارى وقۋ ورىندارىنىڭ جۇمىسىن قايتا قاراۋ قاجەت. بۇل تۋرالى ول «ADAL BILIM» پاراقشاسىنىڭ تىكەلەي ەفيرىندە حابارلادى.
"مينيستر وڭىرلىك جوو رەكتورلارىن تىكەلەي باقىلاي المايدى. ولار دا ءبىلىم باسقارماسىنىڭ باسشىلارى سياقتى اكىمدەردىڭ ىقپالىندا. ال مەملەكەتتىك ۋنيۆەرسيتەتتەر نەگىزىنەن ايماقتاردا ورنالاسقان. قازىرگى ۋاقىتتا بۇل ۋنيۆەرسيتەتتەر ءبىلىم مينيسترلىگىنە قارايدى. رەكتورلاردى تاعايىندايتىن دا، تولىعىمەن باقىلايتىن دا مينيستر. ەگەر مينيسترلىكتىڭ قاراماعىنان وبلىس اكىمدەرى مەن جەرگىلىكتى اتقارۋشى ورگانداردىڭ قاراماعىنا بەرىلسە جاعداي جاقسى جاعىنا وزگەرەدى. ماسەلەن گەرمانيادا وقۋ ورىندارى ورنالاسقان جەرىنە، ياعني وبلىسىنا بەكىتىلگەن. وسىلايشا، جوعارى وقۋ ورنى ءۇشىن جاۋاپكەرشىلىك مينيسترگە ەمەس، اكىمگە جۇكتەلەدى", - دەدى تىكەلەي ەفيردە باسقارما توراعاسى.
تالعات نارىكباەۆ ماسەلەنىڭ شەشىمى رەتىندە اكىمدەرگە ءوز وڭىرىندەگى ەڭبەك نارىعىنىڭ قاجەتتىلىگىنە تالداۋ جۇرگىزۋدى جانە كەيىننەن الىنعان دەرەكتەرگە سايكەس ءوز ماماندارىن وقىتۋدى ۇسىنادى.
«قازاقستاننىڭ بارلىق مەكتەپتەرى ءۇشىن ءبىلىم مينيسترلىگى قالاي جاۋاپ بەرەدى؟ ءتىپتى وسى ماقساتتارعا بيۋدجەتتەن وراسان زور قاراجات بولىنگەننىڭ وزىندە مەكتەپ وقۋلىقتارىنىڭ بار-جوعىنا مونيتورينگ جۇرگىزۋ – تىم كۇردەلى مىندەت. مەنىڭ ويىمشا، وڭىردەگى ءبىلىم ساپاسىنا وبلىس اكىمى جاۋاپ بەرگەن كەزدە عانا ناقتى ناتيجەگە قول جەتكىزەمىز. جول جوندەگەننەن گورى اكىمدەردىڭ باستى مىندەتى ءبىلىم بەرۋ ساپاسىن جاقسارتۋ بولۋ كەرەك. اكىمنىڭ ءبىلىم باعىتىنداعى قىزمەتى مەكتەپتەردىڭ قۇرىلىسىمەن عانا شەكتەلمەۋگە ءتيىس، ول باسقا وبلىستارمەن باسەكەلەستىك ءۇشىن، ءبىلىم بەرۋ مەكەمەلەرىنىڭ ماتەريالدىق-تەحنيكالىق بازاسىن جاقسارتىپ، وقىتۋ ساپاسىن ارتتىرىپ، سونداي-اق مۇعالىمدەرىنىڭ جالاقىسىن كوتەرىپ، بارىنشا جاعداي جاساۋعا باعىتتالۋى ءتيىس»، - دەپ جالعاستىردى.
ايتا كەتسەك، ەلىمىزدە 7 مىڭنان استام مەكتەپ جانە 10 مىڭنان استام مەكتەپكە دەيىنگى ۇيىم قىزمەت ەتەدى. جاڭا وقۋ جىلىندا 3,3 ملن وقۋشى تىركەلىپ وتىر.
