Elimizde kópbalaly otbasylarǵa áleýmettik kómek o bastan kórsetilip kele jatyr. Jyldan-jylǵa áleýmettik kómek retinde bólinetin qarajat ta artyp keledi. Kópbalaly analarǵabala dúnıege kelgende beriletin birjolǵy júrgekpuldan bólek, ár balaǵa aı saıyn járdemaqy tólenip, barynsha qoldaý kórsetilip jatyr. 2019 jyly kópbalaly otbasylardy qoldaý maqsatynda 365 mıllıard qarjy tólenip, prezıdent Qasym-Jomart Toqaev kópbalaly jáne turmystyq jaǵdaıy tómen otbasylardy qoldaý jónindegi áleýmettik sharalardy kúsheıtýdi tapsyrǵan bolatyn.
Qazan aıynda ótken úkimet otyrysynyń birinde eńbek jáne halyqty áleýmettik qorǵaý mınıstri Birjan Nurymbetov jańa jyldan bastap tabysy az jáne kópbalaly otbasylardyń 1 jastan 6 jasqa deıingi balalaryna arnalǵan áleýmettik paket jasalatynyn aıtqan bolatyn.
Atalmysh áleýmettik paketke ne kiredi?
Balalardyń tamaqtanýy, gıgıenalyq zattar, balalardyń oı qımyl dúnıesin damytatynquraldar. Al 6 jastan 18 jas aralyǵyndaǵy balalarǵa mektep formasy men jolaqysy tólenip, mektepte tegin tamaq beriledi. Odan bólek tabysy az otbasylardyń 18 jasqa deıingibalalaryna memleket kepil bergen tegin medıınalyq kómek kórsetiledi.
Endi qalaı bolmaq?
Eńbek jáne halyqty qorǵaý mınıstri Birjan Nurymbetov 2020 jyldyń 1 qańtarynan bastap kópbalaly otbasylarǵa memlekettik járdemaqyny tabysyna qaramaı usynǵan bolatyn. Biraq bul járdemaqyny alý úshin kópbalaly otbasylardy ataýly áleýmettik kómek alatyndardyń qatarynan shyǵarý qajet eken.
“Biz kópbalaly analardyń mártebechin kóterip, ál-aýqatyn jaqsartýdy kózdep otyrmyz. Memlekettik járdemaqynyń jańa túri 42500 teńgeden 73370 teńgege deıin saralanǵan mólsherde taǵaıyndalady”,-degen edi mınıstr Nurymbetov.
Mınstrdiń aıtýynsha Qazaqstanda 340 myńnan astam kópbalaly otbasy bar. Al ol otbasylarda bir jarym mıllıonǵa jýyq bala tárbıelenedi eken.
Kópbalaly analarymyz úkimet bólgen qarjyny ıelenip, áleýmettik kómekti kórip jatyr ma?
Gúlmıra JAQYP: kópbalaly ana:
-Bizge memleket qoldaý bildirip jatqanyna qatty qýanyshtymyn. Eger osy úkimet tarapynan kórsetiletin kómek bolmasa balalaryma aqshany jetkize almaı qınalatyn edik. Bala qarap úıde otyrýyma baılanysty jumyssyzbyn. Joldasymnyń tapqan tabysy jaldamaly páterde turǵandyqtan sony tóleýge ketedi. Al aı saıyn túsip otyratyn kómektiń arqasynda tamaq pen dári-dármek alyp otyrmyz. Árıne, asyp-tasyp jatpasaq ta jan saýǵalap, kún kórýge bolady.
Alıma TÓREBEKQYZY: kópbalaly ana:
-Mynandaı qıyn zamanda ómir súrý tipten qıyn. Joldasymnyń tapqany men úkimettiń aı saıynǵy kómegi iship-jemnen artylmaıdy. Aldaǵy oqý jylynda balalarym úıde otyryp oqıtyn boldy. 1 stýdent pen 3 mektep oqýshysyn tehnıkamen qalaı qamtımyn degen ýaıym basym bolyp tur. Bul joly da úkimet bir sheshimin taýyp, ol jaǵynan da kómek kórsetetinine senimdimin. Jyldan jylǵa kórsetiletin qarjylaı kómek qysqarmaı kerisinshe ústine qosylyp jatqany kóńilge qýanysh syılaıdy.
Jaına AMANǴALIEVA: kópbalaly, jalǵyzbasty ana:
Asyraýshymyzdan aıyrylyp, qazir 5 balamen jalǵyzbyn. Úkimet aqshalaı kómek kórsetedi. Balalardyń tamaǵyna jetedi. Keıde eriktiler de kelip azyq-túlik, balalarǵa oıynshyq, táttilerin ákelip qýantyp turady. Sırek, ara-arasynda aýyldyń belsendileri, úlken kisiler de qoldarynan kelgenshe kómekterin aıamaıdy. Barlyǵyna alǵys bildiremin. Memleket bizdi umytpady. Sizder bergen kómek pen qoldaýlaryńyzdyń arqasynda balalarym bilim alyp, qatarynan qalmaı keledi. Bolashaqta elim deıtin azamat bolyp ósetinine senimdimin.
Aqylgúl TEMIRJANOVA: kópbalaly ana:
-Balalaryma olaı da, bylaı da kómek kórsetilip jatyr. Memlekettiń qarjylaı kómeginen basqa da áleýmettik kómekter kórsetilip jatyr. Oqý jylynyń basynda balalaryma oqýlyqtardy qalaı alamyn dep ýaıymdamaımyn. Ár jyl basynda balalarymdy kitappen birinshi kezekte qamtamasyz etip otyrady. Oqý kúnderi úlken úziliste ystyq tamaq ishedi. Bulardyń ózi úlken kómek. Osynyń aıasynda jumys istep jatqan barlyq jandarǵa úlken raqmet!
Laýra TURSYNJAN,
“Adyrna” ulttyq portaly
