Ekibastuz qalalyq «Aqsaqaldar ádil qazylyǵy» qoǵamdyq birlestiginiń tóraǵasy, aqyn, jýrnalıst Jumaǵalı Qoǵabaev óziniń Feısbýk paraqshasynda Ekibastuz qalalyq bilim bóliminiń basshysy Jazıra Hamzabaevaǵa ashyq hatyn jarııalady. Jumaǵalı Qoǵabaevtyń hatyn esh ózgerissiz nazarlaryńyzǵa usynamyz:
«Osy kúni «ne shyqsa da Ekibastuzdan shyǵady» degen sóz turaqty sóz tirkesine aınalyp kete me degen qorqynyshym bar. Bári sol burynǵy qala ákiminiń áleýmettik sala boıynsha orynbasary N. V. Nefedovanyń «Adyrna» portalyna jazylǵan qara basyna eki bólmeli páterdi jekeshelendirýi, odan soń 2019 jyly Solnechnyı qalashyǵynda jańa qazaq mektebiniń ashylýyna oraı ǵylymı konferenııa ótkizip, ár muǵalimnen 15000 teńge aqsha jınaýynan bastaldy dese bolady. Áıtse de Nefedova qaryndasymyz osylaı shýlatyp ketkenimen sol shýdyń jańǵyryǵy jartasqa soǵylyp, qaıta qaıta aınalyp soǵyp jatqandaı...
Keshe kósheden Ekibastuz qalalyq bilim bóliminiń bilikti mamany Gúlnar Iskakovany kórdim. Jumysqa bilek sybanyp kirisip, úlken is-sharalardyń uıymdastyrýshysy bolyp, jaıdary júretin Gúlnárdiń eńsesi túsip ketken eken.
- Ne boldy, Gúlnár, aýyryp qalǵan joqsyń ba? - dep amandyq suradym.
Jylaǵandaı bolyp qysqasha jaǵdaıyn aıtty. Bilim bóliminiń basshysy Hamzabaeva Jazıra Amankeldıevnamen kelise almaı júrgenin, basshynyń qyzmetin paıdalanyp, qysymshylyq jasaıtynyn, basshynyń bedelin túsiretin hat jazdyń dep sebepsiz jumystan shyq dep jatqanyn jalpy jumys ótili 29 jyl, 1998 jyldan osy kúnge deıin 22 jyl qalalyq bilim bóliminde qyzmet atqaryp kele jatqanyn, osy jyldardyń 8 jylyn tólemnen negizsiz alyp tastaǵan qatty qynjyla jetkizdi. Bilýimshe, basshylyq daýly isti sotqa da beripti. Sonan soń Sh.J. Moldasheva degen sarapshynyń qorytyndysyn oqyp berdi. Ol qorytyndyda bylaı dep jazylypty: V ıssledýemyh tekstah ne ımeıýtsıa prıznakı oskorblenııa chestı dostoınstva Hamzabaevoı J.A ...
Qurmetti Jazıra Amankeldıevna, qalalyq «Aqsaqaldar ádil qazylyǵy» qoǵamdyq birlestiginiń tóraǵasy retinde aıtarym, karantınge baılanysty sizben jolyǵa almaımyn. Men Gúlnára Iskakova degen qyzmetkerińizdi kóp jyldan bilemin. Jumysqa tııanaqty, ári óte bilimdi maman. Sol sebepti daýly máseleni emoııaǵa berilmeı, ashýǵa jeńdirmeı ádil sheshýińizdi suraımyn».
Kópshiliktiń pikirinshe, Gúlnár Ysqaqova Ekibastuz jurtshylyǵyna bedeldi, isine adal maman kórinedi. Onyń qýdalaný sebebine kelsek, Ysqaqovaǵa basshylyq túrli qosymsha mindetter, atap aıtqanda, ótinish, shaǵymdardy qarastyryp, merziminde jaýap berýdi júktepti. Biraq hattardyń túpnusqasy qolyna ýaqytyly tımeı (bireýdiń qasaqana bermeýinen), Ysqaqovanyń jumysy qoldan jasalǵan kedergige ushyraǵan. Mundaı qysastyqqa narazylyǵyn G.Ysqaqova birneshe quzyrly organǵa bildirip hat joldaǵan kórinedi ("Nur Otan" partııasynyń Ekibastuz qalalyq fılıaly, pedagog mamandardyń Pavlodar oblystyq kásipodaq uıymy, Ekibastuz qalasynyń ákimdigi). Hat jazǵan organdarynyń birde-bireýi, ókinishke oraı, tájirıbeli pedagogqa arasha túspeı únsizdik tanytqan. Bylaısha aıtqanda, "kúl bolmasań, búl bol" degen ustanymda qalǵan. Ysqaqovanyń jan-jaqqa hat jazǵanyna shamdanǵan Hamzabaeva hanym ony sotqa berip, «ar-namysyma nuqsan keltirdi» dep aıyptaǵan. Búgingi tańda sot sheshimi túbegeıli shyǵyp úlgergen joq, degenmen sot sarapshysynyń saraptamasy shyǵyp, onda Ysqaqovanyń hattarynda Hamzabaevanyń ar-namysyna nuqsan keltirerlikteı sózder bolmaǵandyǵy anyqtalypty.
Buǵan deıin qazaqtildi portaldarda Hamzabaeva hanym basqarǵan salaǵa qatysty kóptegen syn maqala jaryq kórgeninen qalyń jurtshylyq habardar. Ol maqalalarda ekibastuzdyq ustazdardyń zeınetaqy aýdarymdarynyń, demalys aqylarynyń durys eseptelmeı júrgeni sóz boldy. Ustazdardyń jalaqysyn durys esepteı almaı júrý sebebi Hamzabaeva hanymnyń sottan qoly tımeı júrgeninen be eken degen oıǵa qaldyq...
Hamzabaeva hanymnyń Ekibastuzdyń bilim salasyna eńbegi sińgen maıtalman mamandy atasynyń quny qalǵandaı qýdalaýynyń sebebin bile almadyq. Bir bilerimiz: bul bólimde tolyq jumys kúnine saı istemese de, tolyq aılyq kóleminde eńbekaqy alyp júrgen syrttan kelip-ketip júretin mamandar bar. Bul, bile bilsek, qarjylyq zań buzýshylyq! Muny quzyrly organdar qaperine alýy tıis!
Jalpy, Hamzabaeva hanym basqarǵaly Ekibastuz qalalyq bilim bólimi kim kóringen kirip-shyǵa beretin keń dálizge aınalǵandaı. Bólimde bilikti maman joqtyń qasy, mamandardyń birazy – Hamzabaevanyń óz týystary men tanystary. Solardyń biri – esep-qısap bólimindegi Araı hanym birde jumystan shyqpaqshy bolyp bólim qyzmetkerlerimen qoshtasyp ketip, eki-úsh kúnnen soń jumysqa qaıtyp kelipti. Qaıtyp kelý sebebi – kúıeýimen ajyrasatyn bolyp, ózge qalany betke alyp, jumystan shyǵýǵa aryz bergen eken. Kóp uzamaı kúıeýimen tatýlasyp, túk bolmaǵandaı bólimge jumysqa qaıta kirgen. Qazir ol jumysqa kelgisi kelse keledi, kelgisi kelmese kelmeıdi.
Baıanaýyl aýdanynan kelgen Toǵjan Temirhanova bólimniń burynǵy maıtalman mamany Sánııa Býgýmbaevanyń ornyna qyzmetke alynǵan. Sánııa Muhtarbekqyzyn uıyqtap jatqanda oıatyp alsań, olımpıada, UBT-ǵa qatysty kórsetkishterdi jatqa aıtyp beretin-di. Myqty maman edi. Zeınetke ketti. Baıanaýyl aýdanynan kelgen Temirhanovany túk bilmeıdi desedi áriptesteri, esesine Hamzabaevanyń jaqsy tanysy eken. Biraq eshbir qujatqa, eshbir derekke ıe bola almaı, áriptesterin áýre-sarsańǵa salyp júrgen jaıy bar. Oǵan tipti janyndaǵydar «Odarenka» dep laqap at ta qoıyp úlgeripti. Jumysyn durys atqara almaǵandyqtan ol qyzmetten úsh-tórt aı istep bosatylǵan eken, biraq keıin Hamzabaeva ony qaıta qabyldapty. Eldiń bári «Odarenka qaıtyp eldi!» - dep bir daýryǵysty. Qaıtyp kelmek túgil, sol «Odarenkańyz» Hamzabaevadan Ysqaqovanyń izin ańdý týraly tapsyrma da alyp alypty. Sebebi Ysqaqova Ekibastuz qalalyq sotynyń otyrysyna shaqyrylǵan kúni ol «Ysqaqova jumysta bolǵan joq» dep akt jasapty. Biliksiz maman eldi ańdyǵannan basqa ne bitirsin endi?! Qazir Temirhanova Ysqaqovanyń kóleńkesi sekildi, qaıda barsa da izin ańdyp vıdeoǵa túsirýmen shuǵyldanady. Osyǵan qarap bilim bóliminde "vıdeooperator" degen jańa laýazym ashylyp qalýy ǵajap emes-aý degen oıǵa qaldyq.
Ekibastuzdyń bilim salasynda bolyp jatqan bylyqtar, mine, osyndaı...
Asýan Taıjan,
Pavlodar oblysy
