Aqtöbe oblysy Kökbūlaq auylynyŋ tūrǧyndary köktemgı su tasqynynan keiın jol qatynasynyŋ üzıletının aityp, dabyl qaǧuda.
Auylǧa kıretın jalǧyz joldy su basyp, halyq bırneşe kün boiy qatynassyz qalady. Būl mäsele jyl saiyn qaitalanyp kele jatqanymen, jergılıktı bilıkten älı künge naqty kömek bolmai tūrǧan körınedı.
«QAIYQ SENDERGE TAKSİ EMES...»
Kökbūlaq tūrǧyndary tasqyn kezınde jaǧaǧa arqan bailap, özennen ötetının aitady. Auyl tūrǧyny Jaqsybergen Bolatūlynyŋ aituynşa, bırneşe äkım auyssa da, jaǧdai eş özgermegen.
"Jylda osy, su alyp ketedı. Äkım keşe kelıp, uaqytşa köpır saldy. 5 kün auylymyzda qatynas bolmai qaldy. Äkımdık auylda tūrǧyn sany az bolǧandyqtan köpırge aqşa bölınbeidı dep jyl saiyn mäselenı jyly jabady. Bıraq, bılmeimın. Tym bolmasa audanǧa qarasty aumaqta bülınıp jatqan asfaltty da jöndep jatqan joq. Bölıngen asfaltty satyp jıberıp jatyr, közımız körıp otyr ǧoi. Tym bolmasa jolymyzdy jöndep berse. Mysaly, 22 nauryzdy bız toilamadyq. Sebebı qatynas bolmady. Jol azabynan auyl azyq-tülıktı de ala almai otyr»,- deidı auyl tūrǧyny.
Būl auylda ötkel mäselesı köptegen qiyndyq tudyruda. Tıptı apatty jaǧdailar bolǧan.
"Jeŋıl kölıkter öte almaidy, batpaqqa batyp qalady. Adamdar jaiau jüruge mäjbür. Qazır damyǧan zamanda 18 km jerge aqşa bölınbeidı deu qate siiaqty, menıŋşe. Ötkende adamdardyŋ ötuı üşın qaiyq sūradyq. Äkımdık "qaiyq senderge taksi emes" dedı. Tötenşe jaǧdai (TJ) qyzmetkerlerı kelıp, ülken kısılerdı sudan ötkızuge kömektestı. TJ adamdary da suǧa tüsıp ketken sätter boldy. Qaşanǧy şydaimyz? Köktemde taǧy da būl köpırın aǧyzyp ketedı. Būl jyl saiynǧy mäsele. Ekı aptalap mäselege ainalǧan kezderı de boldy. Soŋǧy 5 jyldyqta auylda şamamen 2-3 äkım auysty. Eşqaisysy mäselenı şeşpedı",- dep qynjylady tūrǧyn Jaqsybergen.
Kökbūlaq tūrǧyndary auylǧa köpır salu üşın bırneşe ret äkımdıkke hat joldaǧan. Olar qol jinap, ötınışterın bekıtkenın aityp suretın de joldady. Alaida Kökbūlaq auyldyq okrugı men Baiǧanin audandyq äkımdıgınıŋ öŋır mäselesın qaşan şeşıp beretını äzırge beimälım. Aşyq derekközge süiensek, 1999 jyly auylda 462 adam tūrsa, 2021 jylǧy sanaqta būl körsetkış 242 adamǧa deiın tömendegen.
GAZDYŊ JANYNDA GAZSYZ OTYR
Auylda tek jol mäselesı ǧana emes, basqa da infraqūrylymdyq tüitkılder bar. Gaz qūbyry auyldyŋ üstınen ötkenmen, tūrǧyndar kögıldır otynǧa qosyla almai otyr.
"Äkım jinalys jasaidy. Kıleŋ mektep qyzmetkerlerı ǧana barady. Ülken kısıler barudy qoiǧan. Sebebı köŋıl qalǧan. Belgılı ǧoi, «baiaǧy jartas, sol jartas». Adamdar şarşap ketken. Bızde gaz da joq. Auyl üstımen gaz qūbyryn ötkızgenımen, auylymyzǧa gaz kelmeidı. Nege deseŋız, äkımdıktıŋ jauaby bır. "Senderde tūrǧyn az" dep qaitarady", – deidı auyl tūrǧyny.
Qazaqstanda köktemgı su tasqyny özge öŋırlerde de ülken problemaǧa ainalyp otyr. Ötken jyly Qazaqstanda köktemgı su tasqyny saldarynan 10 oblysta tötenşe jaǧdai jariialandy. Būl su tasqyny el tarihyndaǧy eŋ ırı tabiǧi apattardyŋ bırı bolyp sanalǧan edı. Biyl da kei aimaqty su basqan.
Jyldyŋ alǧaşqy toqsany, 3 nauryz künı Qostanai oblysynda ainalma kanaldyŋ bıteluı saldarynan su tasyp, ziratty basyp qaldy. Qarasu audanyna qarasty Novoselovka auylynyŋ tūrǧyndary köktem kele sala sudyŋ deŋgeiı köterılıp, auyldaryn su basyp qala ma dep alaŋdauly.
Al 16 nauryzda Qostanai oblysynda respublikalyq maŋyzy bar KZ 10-05 "Marinovka auylyna kıreberıs" avtojolyn su basty. Keiınnen BAQ-ta 25 nauryz künı tolassyz jauyn-şaşynnyŋ saldarynan Qotyrabūlaq özenı arnasynan şyǧyp, Talǧar audany, Besaǧaş auylynda jetı aula aumaǧy men medisinalyq ortalyqty su basqany turaly aqparat tarady.
Ūqsas jaŋalyqtar
