Aqtóbe oblysy Kókbulaq aýylynyń turǵyndary kóktemgi sý tasqynynan keıin jol qatynasynyń úziletinin aıtyp, dabyl qaǵýda.
Aýylǵa kiretin jalǵyz joldy sý basyp, halyq birneshe kún boıy qatynassyz qalady. Bul másele jyl saıyn qaıtalanyp kele jatqanymen, jergilikti bılikten áli kúnge naqty kómek bolmaı turǵan kórinedi.
«QAIYQ SENDERGE TAKSI EMES...»
Kókbulaq turǵyndary tasqyn kezinde jaǵaǵa arqan baılap, ózennen ótetinin aıtady. Aýyl turǵyny Jaqsybergen Bolatulynyń aıtýynsha, birneshe ákim aýyssa da, jaǵdaı esh ózgermegen.
"Jylda osy, sý alyp ketedi. Ákim keshe kelip, ýaqytsha kópir saldy. 5 kún aýylymyzda qatynas bolmaı qaldy. Ákimdik aýylda turǵyn sany az bolǵandyqtan kópirge aqsha bólinbeıdi dep jyl saıyn máseleni jyly jabady. Biraq, bilmeımin. Tym bolmasa aýdanǵa qarasty aýmaqta búlinip jatqan asfaltty da jóndep jatqan joq. Bólingen asfaltty satyp jiberip jatyr, kózimiz kórip otyr ǵoı. Tym bolmasa jolymyzdy jóndep berse. Mysaly, 22 naýryzdy biz toılamadyq. Sebebi qatynas bolmady. Jol azabynan aýyl azyq-túlikti de ala almaı otyr»,- deıdi aýyl turǵyny.
Bul aýylda ótkel máselesi kóptegen qıyndyq týdyrýda. Tipti apatty jaǵdaılar bolǵan.
"Jeńil kólikter óte almaıdy, batpaqqa batyp qalady. Adamdar jaıaý júrýge májbúr. Qazir damyǵan zamanda 18 km jerge aqsha bólinbeıdi deý qate sııaqty, menińshe. Ótkende adamdardyń ótýi úshin qaıyq suradyq. Ákimdik "qaıyq senderge taksı emes" dedi. Tótenshe jaǵdaı (TJ) qyzmetkerleri kelip, úlken kisilerdi sýdan ótkizýge kómektesti. TJ adamdary da sýǵa túsip ketken sátter boldy. Qashanǵy shydaımyz? Kóktemde taǵy da bul kópirin aǵyzyp ketedi. Bul jyl saıynǵy másele. Eki aptalap máselege aınalǵan kezderi de boldy. Sońǵy 5 jyldyqta aýylda shamamen 2-3 ákim aýysty. Eshqaısysy máseleni sheshpedi",- dep qynjylady turǵyn Jaqsybergen.
Kókbulaq turǵyndary aýylǵa kópir salý úshin birneshe ret ákimdikke hat joldaǵan. Olar qol jınap, ótinishterin bekitkenin aıtyp sýretin de joldady. Alaıda Kókbulaq aýyldyq okrýgi men Baıǵanın aýdandyq ákimdiginiń óńir máselesin qashan sheship beretini ázirge beımálim. Ashyq derekkózge súıensek, 1999 jyly aýylda 462 adam tursa, 2021 jylǵy sanaqta bul kórsetkish 242 adamǵa deıin tómendegen.
GAZDYŃ JANYNDA GAZSYZ OTYR
Aýylda tek jol máselesi ǵana emes, basqa da ınfraqurylymdyq túıtkilder bar. Gaz qubyry aýyldyń ústinen ótkenmen, turǵyndar kógildir otynǵa qosyla almaı otyr.
"Ákim jınalys jasaıdy. Kileń mektep qyzmetkerleri ǵana barady. Úlken kisiler barýdy qoıǵan. Sebebi kóńil qalǵan. Belgili ǵoı, «baıaǵy jartas, sol jartas». Adamdar sharshap ketken. Bizde gaz da joq. Aýyl ústimen gaz qubyryn ótkizgenimen, aýylymyzǵa gaz kelmeıdi. Nege deseńiz, ákimdiktiń jaýaby bir. "Senderde turǵyn az" dep qaıtarady", – deıdi aýyl turǵyny.
Qazaqstanda kóktemgi sý tasqyny ózge óńirlerde de úlken problemaǵa aınalyp otyr. Ótken jyly Qazaqstanda kóktemgi sý tasqyny saldarynan 10 oblysta tótenshe jaǵdaı jarııalandy. Bul sý tasqyny el tarıhyndaǵy eń iri tabıǵı apattardyń biri bolyp sanalǵan edi. Bıyl da keı aımaqty sý basqan.
Jyldyń alǵashqy toqsany, 3 naýryz kúni Qostanaı oblysynda aınalma kanaldyń bitelýi saldarynan sý tasyp, zıratty basyp qaldy. Qarasý aýdanyna qarasty Novoselovka aýylynyń turǵyndary kóktem kele sala sýdyń deńgeıi kóterilip, aýyldaryn sý basyp qala ma dep alańdaýly.
Al 16 naýryzda Qostanaı oblysynda respýblıkalyq mańyzy bar KZ 10-05 "Marınovka aýylyna kireberis" avtojolyn sý basty. Keıinnen BAQ-ta 25 naýryz kúni tolassyz jaýyn-shashynnyń saldarynan Qotyrabulaq ózeni arnasynan shyǵyp, Talǵar aýdany, Besaǵash aýylynda jeti aýla aýmaǵy men medıınalyq ortalyqty sý basqany týraly aqparat tarady.
