Aıtysker aqyn, «Altyn dombyra» ıegeri, Halyqaralyq aıtys aqyndary men jyrshy-termeshiler odaǵy Pavlodar oblystyq fılıalynyń tóraǵasy Aspanbek Shuǵataıdyń «Umytpa, qazaq!» áni jaryqqa shyqty.
Umytpa, qazaq!
Ótkizdik talaı sábı tańdardy,
Qarı taýlardy, Tarıh aýdardy.
Atameken dep atylyp ketken
Umytpa, qazaq, Álıhandardy!
Máńgilik deısiń qaı tirshilikti,
Kún kúńirense, aı kúrsúnipti.
«Qazaq» gazetin qanymen jazǵan,
Umytpa, qazaq, Baıtursynovty!
Jurtyma jetpeı bir baqyt qaldy,
Kim ustap turar bul ýaqyttardy?!
«Oıan, qazaq!» dep uıqyǵa ketken,
Umytpa, qazaq, Mirjaqyptardy!
Shańyraǵyńdy ýyqqa qajap,
Táýelsiz boldyń, quryqtan azat,
Arystaryńdy, Arystanyńdy,
Umytpa, qazaq! Ulyqta, qazaq!
Saqtardan qalǵan saqtaıyq qandy,
Ketpesin bastan baq taıyp máńgi.
Ǵylymnyń alǵash ǵalamyn ashqan,
Umytpa, qazaq, Sátbaevtardy!
Jasadyq talaı qatelikterdi,
Azattyqty kim ákelip berdi?
Bes obylysty jatqa bermegen
Umytpa, qazaq, Táshenovterdi!
Aspandy da anaý qus kirletipti,
Qara jerdiń kim ústinde myqty?!
Azattyǵymnyń óshpes alaýy,
Umytpa, qazaq, Rysqulbekovty!
Shańyraǵyńdy ýyqqa qajap,
Táýelsiz boldyń, quryqtan azat.
Arystaryńdy, Arystanyńdy,
Umytpa, qazaq! Ulyqta, qazaq!
