ايتىسكەر اقىن، «التىن دومبىرا» يەگەرى، حالىقارالىق ايتىس اقىندارى مەن جىرشى-تەرمەشىلەر وداعى پاۆلودار وبلىستىق فيليالىنىڭ توراعاسى اسپانبەك شۇعاتايدىڭ «ۇمىتپا، قازاق!» ءانى جارىققا شىقتى.
ۇمىتپا، قازاق!
وتكىزدىك تالاي ءسابي تاڭداردى،
قاري تاۋلاردى، تاريح اۋداردى.
اتامەكەن دەپ اتىلىپ كەتكەن
ۇمىتپا، قازاق، ءاليحانداردى!
ماڭگىلىك دەيسىڭ قاي تىرشىلىكتى،
كۇن كۇڭىرەنسە، اي كۇرسۇنىپتى.
«قازاق» گازەتىن قانىمەن جازعان،
ۇمىتپا، قازاق، بايتۇرسىنوۆتى!
جۇرتىما جەتپەي ءبىر باقىت قالدى،
كىم ۇستاپ تۇرار بۇل ۋاقىتتاردى؟!
«ويان، قازاق!» دەپ ۇيقىعا كەتكەن،
ۇمىتپا، قازاق، مىرجاقىپتاردى!
شاڭىراعىڭدى ۋىققا قاجاپ،
تاۋەلسىز بولدىڭ، قۇرىقتان ازات،
ارىستارىڭدى، ارىستانىڭدى،
ۇمىتپا، قازاق! ۇلىقتا، قازاق!
ساقتاردان قالعان ساقتايىق قاندى،
كەتپەسىن باستان باق تايىپ ماڭگى.
عىلىمنىڭ العاش عالامىن اشقان،
ۇمىتپا، قازاق، ساتباەۆتاردى!
جاسادىق تالاي قاتەلىكتەردى،
ازاتتىقتى كىم اكەلىپ بەردى؟
بەس وبىلىستى جاتقا بەرمەگەن
ۇمىتپا، قازاق، تاشەنوۆتەردى!
اسپاندى دا اناۋ قۇس كىرلەتىپتى،
قارا جەردىڭ كىم ۇستىندە مىقتى؟!
ازاتتىعىمنىڭ وشپەس الاۋى،
ۇمىتپا، قازاق، رىسقۇلبەكوۆتى!
شاڭىراعىڭدى ۋىققا قاجاپ،
تاۋەلسىز بولدىڭ، قۇرىقتان ازات.
ارىستارىڭدى، ارىستانىڭدى،
ۇمىتپا، قازاق! ۇلىقتا، قازاق!
