Osydan týra 70 jyl buryn, 1955 jyly Baıqońyr ǵarysh aılaǵyn salý týraly sheshim qabyldandy.
Alǵashqy qurylysshylar Tóretam stanııasyna 1955 jyldyń qańtarynda kelgen. Biraq tek qyrkúıekte birinshi startqa arnalǵan shuńqyr qazý jumystary bastalǵan.
Halyq tyǵyzdyǵy az, qaýipsizdik talaptaryna saı kelgendikten osy aımaq tańdap alynǵan. Nebári bir jyl ishinde alǵashqy nysandar salynyp, paıdalanýǵa berilgen.
Baıqońyr ǵarysh aılaǵynda Gagarın atyndaǵy start alańyn salý kezinde kútpegen arheologııalyq olja tabylǵan. Qazý jumystary barysynda qurylysshylar 35 metr tereńdikte ejelgi oshaqtyń izderin jáne tuz baılanǵan aǵash otyn qaldyqtaryn anyqtap, arheologtardy shaqyrǵan. Alaıda belgisiz sebeptermen olar kele almaǵan. Osyǵan baılanysty tabylǵan oshaq pen otyn qaldyqtary arnaıy jáshikke salynyp, zertteý úshin elordaǵa jiberilgen.
Úsh aıǵa sozylǵan zertteý nátıjesinde tabylǵan zattyń jasy 10-30 myń jyldyq aralyǵyn qamtıtyny anyqtalǵan. .
6717 sharshy shaqyrym aýmaqty alyp jatqan ǵarysh aılaǵynan 1961 jyly alǵashqy jasandy spýtnık jáne tuńǵysh ǵaryshker Iýrıı Gagarın ushyryldy. Onyń ushýy 108 mınýtqa sozylǵan.
Baıqońyrdan 1960 jyldardan bastap 1500-den astam ǵarysh kemesi ushyrylǵan.
1991 jyly Qazaqstan táýelsizdik alǵannan keıin, Baıqońyr ǵarysh aılaǵy Qazaqstan Respýblıkasynyń menshigine ótti. Alaıda, Reseımen kelisimge sáıkes, 1994 jyly ǵarysh aılaǵy 2050 jylǵa deıin Reseıge jalǵa berildi.
Qazirgi tańda Týrızm jáne sport mınıstrligi aımaqty týrızmdi damytý tujyrymdamasyn ázirleýde. Bul joba aıasynda qala men ǵarysh aılaǵyna kirýge arnalǵan ruqsatnamalardy elektrondy formatta rásimdeý jáne týrıstik obektilerge kirýge ótinimdi berý merzimin qysqartý máselesi qarastyrylýda. Osy ózgerister engizilse, týrısterge Baıqońyrdaǵy 1-alań men murajaı aımaǵyna barý jeńildeıdi.
Buǵan deıin týrıster Baıqońyrǵa jetý úshin Qyzylordaǵa ushyp kelip, odan ári poıyz nemese avtokólikpen barýǵa májbúr bolǵan. Osy máseleni sheshý maqsatynda Qazaqstan men Reseı áýe tasymaldaýshylaryna Baıqońyrǵa turaqty reıster oryndaý quqy berildi. Aldaǵy ýaqytta Astana – Baıqońyr, Almaty – Baıqońyr jáne keri baǵytta turaqty áýe qatynasy iske qosylýy múmkin.
