Bügın Almatydaǧy Äl-Farabi daŋǧylynda bolǧan adam ölımıne äkelgen jol apaty boiynşa sot otyrysynda qaza tapqan qyzdyŋ anasy kuälık berdı, dep habarlaidy «Adyrna» tılşısı.
Anasynyŋ aituynşa, apat bolatyn künı qyzy öz kölıgımen taksi qyzmetın atqaryp jürgen. Ol üige az uaqytqa kelıp, tamaqtanyp ketken.
«Oǧan tamaq berdım. Sol künı nesiesınıŋ tölemın jasauy kerek edı. Qalǧan somany tabu üşın taǧy jūmys ıstep keletının aitty. Tamaqtanyp bolǧan soŋ, aqşany tauyp, qaita oralatynyn aityp ketıp qaldy»,– dedı jäbırlenuşı.
Keşkı saǧat 23:00 şamasynda anasy alaŋdap, qyzyna beineqoŋyrau şalǧan. Sol kezde qyzdyŋ kölıgınde jolauşylar bolǧan.
«Ol qarny aşqanyn aitty. Jolauşylardy jetkızıp tastap, tamaqtanyp alyp, üige qaitatynyn aitty»,– dep eske aldy anasy.
Qyzynyŋ Mercedes kölıgıne qalai otyrǧanyn anasy tüsındırmedı. Onyŋ aituynşa, özı ūiyqtap qalǧan, al kelesı künı taŋǧy saǧat 09:00-de qyzynyŋ köz jūmǧany turaly habar jetken.
«Qyzymnyŋ mäiıthanada jatqanyna senbedım. Ony komada şyǧar dep oiladym»,– dedı äiel közıne jas alyp.
Jäbırlenuşı sottaluşydan eşteŋe talap etpeitının aityp, qyzynyŋ ömırın eşkım qaitara almaitynyn jetkızdı.
Sot barysynda qorǧauşy tarap jäbırlenuşınıŋ jazbaşa ötınışın de ūsyndy. Onda onyŋ aiyptaluşymen tolyq tatulasqany, sottaluşynyŋ kınäsın tolyq moiyndap, şyn jürekten ökıngenı jäne keşırım sūraǧany aitylǧan. Osyǧan bailanysty jäbırlenuşı oǧan şartty jaza taǧaiyndaudy sūrady. Sondai-aq advokat qyzmetınen bas tartqanyn mälımdedı.
Eske sala keteiık, bügın sotta Mercedes kölıgındegı jolauşy retınde qaza tapqan er adamnyŋ tuystary da söz söiledı. Olar da sottaluşymen tatulasqanyn aityp, ony bas bostandyǧynan aiyrmaudy nemese şartty jaza taǧaiyndaudy ötındı.
Aita keteiık, 28 mamyr künı Zeekr kölıgınıŋ jürgızuşısı sot aldyna kelıp, qaza bolǧandardyŋ otbasylaryna köŋıl aityp, özın eşqaşan keşıre almaitynyn mälımdegen edı.
Sottaluşy Aleksandr Pak özıne taǧylǧan aiypty tolyq moiyndaitynyn aitqan. Ol Qylmystyq kodekstıŋ 345-1-babynyŋ 4-bölıgı «Alkogoldık masaŋ küide jol jürısı qaǧidalaryn būzu, abaisyzda ekı nemese odan da köp adamnyŋ ölımıne äkep soǧu» boiynşa aiyptalyp otyr.
