Foto: Baian Şaiǧozovanyŋ Facebook-tegı paraqşasynan
Qazaqstandyq saiahatşy Särsenbai Qotyraşev Fransiia astanasy – Parij qalasyna jaiau jetıp, özınıŋ köpkündık saparynyŋ kezektı kezeŋın sättı aiaqtady. Ol 24 säuır künı Triumf arkasy maŋynda märege jetıp, otandastary men diplomattardyŋ qūrmetıne bölendı.
76 jastaǧy jihankez 3 nauryzda jolǧa şyǧyp, şamamen 3000 şaqyrymdy jaiau eŋsergen. Onyŋ baǧyty Serbiia, Majarstan, Avstriia jäne Germaniia arqyly ötıp, Fransiia aumaǧynda aiaqtaldy. Sapar barysynda türlı logistikalyq jäne tabiǧi qiyndyqtarǧa qaramastan, saiahatşy öz maqsatyna jettı.
Qotyraşev būǧan deiın de auqymdy jaiau saparlarymen tanylǧan. Ol Qazaqstan aumaǧyn tolyq aralap, Kavkaz arqyly Türkiia elıne jetken. Keiın Altai men Moŋǧoliia arqyly Qytai jerıne deiın barǧan. Äleumettık jelılerde ol UlytauMan laqap atymen belgılı.
Europadaǧy baǧyt saiahatşy üşın eŋ kürdelı kezeŋderdıŋ bırı boldy. Jol qozǧalysy talaptaryna bailanysty ol avtobandarmen jüre almai, köbıne velosiped joldary men balama baǧyttardy paidalanuǧa mäjbür bolǧan. Sonymen qatar, jük artqan arbasynyŋ ısten şyqqan sätterı de tırkelgen.
Parijdegı sapary aiasynda saiahatşy IýNESKO ştab-päterıne baryp, halyqaralyq deŋgeide qūrmetke ie boldy. Ūiym ökılderı ony qazaq mädenietın nasihattauşy tūlǧa retınde baǧalady.
"Men älemge qazaq halqynyŋ qaisar, ruhy biık halyq ekenın körsetkım keledı. Bızdıŋ ata-babalarymyz metaldy igergen, ǧylymmen ainalysqan, jylqyny qolǧa üiretken. Men osyny öz jolymmen däleldeudı maqsat ettım", - deidı Särsenbai Qotyraşev.
Qazırgı taŋda Särsenbai Qotyraşevtyŋ jürıp ötken jalpy qaşyqtyǧy şamamen 18 myŋ şaqyrymǧa jetken. Onyŋ basty maqsaty — 75 jastan asqan saiahatşy retınde 40 myŋ şaqyrymnan astam jol jürıp, Ginnestıŋ rekordtar kıtaby tızımıne enu.
Aldaǧy josparlaryna säikes, saiahatşy 2027 jyly AQŞ aumaǧyn Atlant mūhitynan Tynyq mūhityna deiın jaiau kesıp ötudı közdep otyr. Sonymen qatar, elge oralǧan soŋ ūstalyq önerın jalǧastyryp, jaŋa saparlarǧa daiyndalmaq.
