Eltaŋba avtory Jandarbek Mälıbekov Toqaevtyŋ mälımdemesıne qatysty pıkır bıldırdı. Būl turaly ol «Azattyq» radiosyna bergen pıkırınde aitty, dep habarlaidy “Adyrna” ūlttyq portaly.
Ūlttyq qūryltaida Qasym-Jomart Toqaev eltaŋbany özgertudı ūsynyp, «Qazaqstannyŋ jaŋa eltaŋbasynyŋ jobasyn jasauǧa aşyq baiqau jariialanady» degen bolatyn.
Jelıde būl ūsynysty qoldamaityndar qarasy köp boldy. Al jaqtaǧandar eltaŋbadaǧy jūldyzdy "Keŋes odaǧynyŋ qaldyǧy» dep jazdy.
Osy synǧa eltaŋba avtorlarynyŋ bırı Jandarbek Mälıbekov «Qazaqtyŋ öz jūldyzdary bolǧan» dep jauap berdı.
“Sovet ökımetınen būryn da qazaqtyŋ öz jūldyzdary bolǧan. Mysaly, Temırqazyq bar. Qazaq halqynyŋ tüsınıgı boiynşa ärbır adamnyŋ öz jūldyzy bar. Özbekstan tuynda, mysaly, 12 jūldyz bar. AQŞ tuynda 50-den astam jūldyz bar. Şyn mänınde saraptama kerek. Bärın talqylau kerek”, — dedı ol «Azattyq» radiosyna bergen pıkırınde.
Resmi türde eltaŋba avtory bolyp Jandarbek Mälıbekovke qosa, bügınde baqilyq bolǧan Şota Uälihanov ta bekıtılgen. Osydan bıraz būryn «Adyrna» "Jaŋa adamdar" jastar qozǧalysy 500 adamǧa saualnama jürıgızıp, olardyŋ 70 paiyzy eltaŋbany tanymady dep jariialaǧanyn habarlaǧan. Ile - şala äleumettık jelıde qazırgı eltaŋbaǧa köŋılı tolmaityn azamattar arnaiy post jaza bastaǧan. Sonda deputat Amanjol Ältaev bylai degen. - Ärine, jastarymyzdyŋ memleketımızdıŋ ülken boitūmary eltaŋbany tanymauy, bılmeuı qabyrǧamyzǧa batatyn jaǧdai. Endı eltaŋbany özgertu kerek degen mäselege özım qosylmaimyn. Öitkenı būl äbden saraptalyp, taianaqtalyp, aiqyndalǧan memleketmızdıŋ eltaŋbasy. Sondyqtan da ony özgertudıŋ qajetı joq dep esepteimın. Kerısınşe, memlekettık rämızderdı bügıngı jas ūrpaqtyŋ sanasyna sıŋıru baǧytynda balabaqşadan bastap, mektep, kolledj jäne universitette jastardy aqparattandyru jūmystaryn jüielı jürgızuımız kerek. Sonymen qatar aqparat qūraldary telearna, radioda memlekettık rämıztanuǧa baǧyttalǧan habar bolu kerek. Mysaly, öz basyma eltaŋba ūnaidy. Eltaŋba halyqaralyq deŋgeidegı memleketımızdıŋ beinesın körsetetın öte joǧary deŋgeide daiyndalǧan. Sondyqtan oǧan qazır aiaq astynan qozǧau saludyŋ özı dūrys emes. Jalpy menıŋ bügıngı eltaŋbaǧa köŋılım toiady, – degen edı deputat Amanjol Ältaev. Al taǧy bır deputat Rinat Zaiytov eltaŋba men tudy özgertuge tübegeilı qarsy ekenın aitqan. - Sebebı bızdıŋ eltaŋbamyz ben tuymyz 1991 jylǧy Täuelsızdıgımızdıŋ iaǧni, eŋ bırınşı jeŋısımızdıŋ simvolikasy. Eltaŋbany köp adamnyŋ tanymaǧanymen de kelısemın. Sebebı nasihat joq. Mysaly, tuymyzdy Türkiianyŋ deŋgeiınde nasihattai almaimyz. Eltaŋbamyzdy mülde nasihattamaimyz. Bızde tıptı memlekettık rämızderdıŋ avtorlaryn bılmeitın tūlǧalarymyz bar. Kerısınşe, bız barymyzdy nasihattauymyz kerek. Eltaŋba men tu Qazaqstannyŋ 1991 jyldan berı paida bolǧan tūlqūjaty sekıldı dünie. Men ony özgertuge qarsymyn. Elımızde eltaŋbany özgertuden de maŋyzdy şarua bar, - degen edı deputat Rinat Zaiytov.
