ەلتاڭبا اۆتورى جانداربەك مالىبەكوۆ توقاەۆتىڭ مالىمدەمەسىنە قاتىستى پىكىر ءبىلدىردى. بۇل تۋرالى ول «ازاتتىق» راديوسىنا بەرگەن پىكىرىندە ايتتى، دەپ حابارلايدى “ادىرنا” ۇلتتىق پورتالى.
ۇلتتىق قۇرىلتايدا قاسىم-جومارت توقاەۆ ەلتاڭبانى وزگەرتۋدى ۇسىنىپ، «قازاقستاننىڭ جاڭا ەلتاڭباسىنىڭ جوباسىن جاساۋعا اشىق بايقاۋ جاريالانادى» دەگەن بولاتىن.
جەلىدە بۇل ۇسىنىستى قولدامايتىندار قاراسى كوپ بولدى. ال جاقتاعاندار ەلتاڭباداعى جۇلدىزدى "كەڭەس وداعىنىڭ قالدىعى» دەپ جازدى.
وسى سىنعا ەلتاڭبا اۆتورلارىنىڭ ءبىرى جانداربەك مالىبەكوۆ «قازاقتىڭ ءوز جۇلدىزدارى بولعان» دەپ جاۋاپ بەردى.
“سوۆەت وكىمەتىنەن بۇرىن دا قازاقتىڭ ءوز جۇلدىزدارى بولعان. مىسالى، تەمىرقازىق بار. قازاق حالقىنىڭ تۇسىنىگى بويىنشا ءاربىر ادامنىڭ ءوز جۇلدىزى بار. وزبەكستان تۋىندا، مىسالى، 12 جۇلدىز بار. اقش تۋىندا 50-دەن استام جۇلدىز بار. شىن مانىندە ساراپتاما كەرەك. ءبارىن تالقىلاۋ كەرەك”، — دەدى ول «ازاتتىق» راديوسىنا بەرگەن پىكىرىندە.
رەسمي تۇردە ەلتاڭبا اۆتورى بولىپ جانداربەك مالىبەكوۆكە قوسا، بۇگىندە باقيلىق بولعان شوتا ءۋاليحانوۆ تا بەكىتىلگەن.
وسىدان ءبىراز بۇرىن «ادىرنا» "جاڭا ادامدار" جاستار قوزعالىسى 500 ادامعا ساۋالناما جۇرىگىزىپ، ولاردىڭ 70 پايىزى ەلتاڭبانى تانىمادى دەپ جاريالاعانىن حابارلاعان. ىلە - شالا الەۋمەتتىك جەلىدە قازىرگى ەلتاڭباعا كوڭىلى تولمايتىن ازاماتتار ارنايى پوست جازا باستاعان.
سوندا دەپۋتات امانجول التاەۆ بىلاي دەگەن.
- ارينە، جاستارىمىزدىڭ مەملەكەتىمىزدىڭ ۇلكەن بويتۇمارى ەلتاڭبانى تانىماۋى، بىلمەۋى قابىرعامىزعا باتاتىن جاعداي. ەندى ەلتاڭبانى وزگەرتۋ كەرەك دەگەن ماسەلەگە ءوزىم قوسىلمايمىن. ويتكەنى بۇل ابدەن ساراپتالىپ، تاياناقتالىپ، ايقىندالعان مەملەكەتمىزدىڭ ەلتاڭباسى. سوندىقتان دا ونى وزگەرتۋدىڭ قاجەتى جوق دەپ ەسەپتەيمىن. كەرىسىنشە، مەملەكەتتىك رامىزدەردى بۇگىنگى جاس ۇرپاقتىڭ ساناسىنا ءسىڭىرۋ باعىتىندا بالاباقشادان باستاپ، مەكتەپ، كوللەدج جانە ۋنيۆەرسيتەتتە جاستاردى اقپاراتتاندىرۋ جۇمىستارىن جۇيەلى جۇرگىزۋىمىز كەرەك. سونىمەن قاتار اقپارات قۇرالدارى تەلەارنا، راديودا مەملەكەتتىك رامىزتانۋعا باعىتتالعان حابار بولۋ كەرەك. مىسالى، ءوز باسىما ەلتاڭبا ۇنايدى. ەلتاڭبا حالىقارالىق دەڭگەيدەگى مەملەكەتىمىزدىڭ بەينەسىن كورسەتەتىن وتە جوعارى دەڭگەيدە دايىندالعان. سوندىقتان وعان قازىر اياق استىنان قوزعاۋ سالۋدىڭ ءوزى دۇرىس ەمەس. جالپى مەنىڭ بۇگىنگى ەلتاڭباعا كوڭىلىم تويادى، – دەگەن ەدى دەپۋتات امانجول التاەۆ.
ال تاعى ءبىر دەپۋتات رينات زايىتوۆ ەلتاڭبا مەن تۋدى وزگەرتۋگە تۇبەگەيلى قارسى ەكەنىن ايتقان.
- سەبەبى ءبىزدىڭ ەلتاڭبامىز بەن تۋىمىز 1991 جىلعى تاۋەلسىزدىگىمىزدىڭ ياعني، ەڭ ءبىرىنشى جەڭىسىمىزدىڭ سيمۆوليكاسى. ەلتاڭبانى كوپ ادامنىڭ تانىماعانىمەن دە كەلىسەمىن. سەبەبى ناسيحات جوق. مىسالى، تۋىمىزدى تۇركيانىڭ دەڭگەيىندە ناسيحاتتاي المايمىز. ەلتاڭبامىزدى مۇلدە ناسيحاتتامايمىز. بىزدە ءتىپتى مەملەكەتتىك رامىزدەردىڭ اۆتورلارىن بىلمەيتىن تۇلعالارىمىز بار. كەرىسىنشە، ءبىز بارىمىزدى ناسيحاتتاۋىمىز كەرەك. ەلتاڭبا مەن تۋ قازاقستاننىڭ 1991 جىلدان بەرى پايدا بولعان تۇلقۇجاتى سەكىلدى دۇنيە. مەن ونى وزگەرتۋگە قارسىمىن. ەلىمىزدە ەلتاڭبانى وزگەرتۋدەن دە ماڭىزدى شارۋا بار، - دەگەن ەدى دەپۋتات رينات زايىتوۆ.
