19 qyrkúıek kúni Adyrna ulttyq portalynda «SQO-daǵy sport mektebi 19 955 357 teńgege 1 dana «qaraquıryq» satyp almaq» degen maqala jarııalanǵan edi. Sol synı maqalaǵa SQO ákimdiginiń dene shynyqtyrý jáne sport basqarmasynyń basshysy S.Melehov jaýap berdi, - dep habarlaıdy Adyrna tilshisi.
Atalǵan maqalada basqarma «Sport mektebine qaraquıryq satyp alý» degen ataýmen tender jarııalaǵanyn, tehnıkalyq sıpattamada memlekettik tilde bir aýyz sóz de jazylmaǵanyn, taqyryptaǵy «qaraquıryq» degenniń aýdarmasy mıkroavtobýs ekenin, «Taıynsha aýdanynyń balalar men jasóspirimder sport mektebi» 19 955 357 teńgege memlekettik tildi aıaqqa taptap, jańa mıkroavtobýs satyp alǵaly otyrǵanyn synaǵan edik.
Synap qana qoımaı tıisti mekemege tómendegi suraqtardy da joldadyq.
1. Soltústik Qazaqstan oblysynyń Dene shynyqtyrý jáne sport basqarmasynda memlekettik tildi biletin birde-bir maman joq pa?
2. Soltústiktiń sheneýnikteri mıkroavtobýsty qaraquıryq dep aýdaryp, qazaq tilin masqaralamaq pa?
3. Tehnıkalyq sıpattamnyń qazaqsha nusqasy nege joq? Basqarma memlekettik tildi shettetip, til týraly Zańdy óreskel buzyp otyrǵan joq pa?
Bul úsh suraqqa SQO ákimdiginiń dene shynyqtyrý jáne sport basqarmasynyń basshysy S.Melehov:
«2024 jyldyń 11 qańtarynda «Taıynsha aýdanynyń balalar men jasóspirimder sport mektebi» kommýnaldyq memlekettik mekemesi tarapynan memlekettik satyp alý portalynda №11265812-1 «Sport mektebine qaraquıryq satyp alý» jónindegi habarlandyrý jarııalanǵan. Habarlandyrýdy jarııalaý kezinde «Taıynsha aýdanynyń balalar men jasóspirimder sport mektebi» kommýnaldyq memlekettik mekemesi konkýrstyq qujattamaǵa tehnıkalyq sıpattamasynyń memlekettik tildegi nusqasyn tirkemeı, habarlandyrý ataýyn durys kórsetpegen. Osynyń saldarynan áleýetti ónim berýshilerdi jańylystyrdy.
«Taıynsha aýdanynyń balalar men jasóspirimder sport mektebi» kommýnaldyq memlekettik mekemesi zań buzýshylyqtardy joıý boıynsha sharalar qoldanyp, kórsetilen satyp alýdyń kúshi joıyldy.
Alda barlyq eskertýler túzetilip, habarlandyrý memlekettik satyp alý portalynda qaıta jarııalanatyn bolady. Kórsetilgen eskertýler «Soltústik Qazaqstan oblysy ákimdiginiń dene shynyqtyrý jáne sport basqarmasy» kommýnaldyq memlekettik mekemesiniń barlyq baǵynysty uıymdaryna qarastyrý úshin jiberildi, olarmen aldaǵy ýaqytta joǵaryda atalǵan faktilerdiń oryn alýyna jol bermeý jumystary júrgizildi» dep jaýap qatypty.
Mıkroavtobýsty «qaraquıryqpen» shatystyryp, memlekettik tildi masqaralap otyrǵan mekeme qyzmetkerlerine qandaı jaza qoldanylǵany jaýapta jazylmapty. Sóıtse de, qateliktiń túzetilgeni kishkene bolsa da kóńilge medeý...
Qanat Birlikuly
Adyrna ulttyq portaly
