19 قىركۇيەك كۇنى ادىرنا ۇلتتىق پورتالىندا «سقو-داعى سپورت مەكتەبى 19 955 357 تەڭگەگە 1 دانا «قاراقۇيرىق» ساتىپ الماق» دەگەن ماقالا جاريالانعان ەدى. سول سىني ماقالاعا سقو اكىمدىگىنىڭ دەنە شىنىقتىرۋ جانە سپورت باسقارماسىنىڭ باسشىسى س.مەلەحوۆ جاۋاپ بەردى، - دەپ حابارلايدى ادىرنا ءتىلشىسى.
اتالعان ماقالادا باسقارما «سپورت مەكتەبىنە قاراقۇيرىق ساتىپ الۋ» دەگەن اتاۋمەن تەندەر جاريالاعانىن، تەحنيكالىق سيپاتتامادا مەملەكەتتىك تىلدە ءبىر اۋىز ءسوز دە جازىلماعانىن، تاقىرىپتاعى «قاراقۇيرىق» دەگەننىڭ اۋدارماسى ميكرواۆتوبۋس ەكەنىن، «تايىنشا اۋدانىنىڭ بالالار مەن جاسوسپىرىمدەر سپورت مەكتەبى» 19 955 357 تەڭگەگە مەملەكەتتىك ءتىلدى اياققا تاپتاپ، جاڭا ميكرواۆتوبۋس ساتىپ العالى وتىرعانىن سىناعان ەدىك.
سىناپ قانا قويماي ءتيىستى مەكەمەگە تومەندەگى سۇراقتاردى دا جولدادىق.
1. سولتۇستىك قازاقستان وبلىسىنىڭ دەنە شىنىقتىرۋ جانە سپورت باسقارماسىندا مەملەكەتتىك ءتىلدى بىلەتىن بىردە-ءبىر مامان جوق پا؟
2. سولتۇستىكتىڭ شەنەۋنىكتەرى ميكرواۆتوبۋستى قاراقۇيرىق دەپ اۋدارىپ، قازاق ءتىلىن ماسقارالاماق پا؟
3. تەحنيكالىق سيپاتتامنىڭ قازاقشا نۇسقاسى نەگە جوق؟ باسقارما مەملەكەتتىك ءتىلدى شەتتەتىپ، ءتىل تۋرالى زاڭدى ورەسكەل بۇزىپ وتىرعان جوق پا؟
بۇل ءۇش سۇراققا سقو اكىمدىگىنىڭ دەنە شىنىقتىرۋ جانە سپورت باسقارماسىنىڭ باسشىسى س.مەلەحوۆ:
«2024 جىلدىڭ 11 قاڭتارىندا «تايىنشا اۋدانىنىڭ بالالار مەن جاسوسپىرىمدەر سپورت مەكتەبى» كوممۋنالدىق مەملەكەتتىك مەكەمەسى تاراپىنان مەملەكەتتىك ساتىپ الۋ پورتالىندا №11265812-1 «سپورت مەكتەبىنە قاراقۇيرىق ساتىپ الۋ» جونىندەگى حابارلاندىرۋ جاريالانعان. حابارلاندىرۋدى جاريالاۋ كەزىندە «تايىنشا اۋدانىنىڭ بالالار مەن جاسوسپىرىمدەر سپورت مەكتەبى» كوممۋنالدىق مەملەكەتتىك مەكەمەسى كونكۋرستىق قۇجاتتاماعا تەحنيكالىق سيپاتتاماسىنىڭ مەملەكەتتىك تىلدەگى نۇسقاسىن تىركەمەي، حابارلاندىرۋ اتاۋىن دۇرىس كورسەتپەگەن. وسىنىڭ سالدارىنان الەۋەتتى ءونىم بەرۋشىلەردى جاڭىلىستىردى.
«تايىنشا اۋدانىنىڭ بالالار مەن جاسوسپىرىمدەر سپورت مەكتەبى» كوممۋنالدىق مەملەكەتتىك مەكەمەسى زاڭ بۇزۋشىلىقتاردى جويۋ بويىنشا شارالار قولدانىپ، كورسەتىلەن ساتىپ الۋدىڭ كۇشى جويىلدى.
الدا بارلىق ەسكەرتۋلەر تۇزەتىلىپ، حابارلاندىرۋ مەملەكەتتىك ساتىپ الۋ پورتالىندا قايتا جاريالاناتىن بولادى. كورسەتىلگەن ەسكەرتۋلەر «سولتۇستىك قازاقستان وبلىسى اكىمدىگىنىڭ دەنە شىنىقتىرۋ جانە سپورت باسقارماسى» كوممۋنالدىق مەملەكەتتىك مەكەمەسىنىڭ بارلىق باعىنىستى ۇيىمدارىنا قاراستىرۋ ءۇشىن جىبەرىلدى، ولارمەن الداعى ۋاقىتتا جوعارىدا اتالعان فاكتىلەردىڭ ورىن الۋىنا جول بەرمەۋ جۇمىستارى جۇرگىزىلدى» دەپ جاۋاپ قاتىپتى.
ميكرواۆتوبۋستى «قاراقۇيرىقپەن» شاتىستىرىپ، مەملەكەتتىك ءتىلدى ماسقارالاپ وتىرعان مەكەمە قىزمەتكەرلەرىنە قانداي جازا قولدانىلعانى جاۋاپتا جازىلماپتى. سويتسە دە، قاتەلىكتىڭ تۇزەتىلگەنى كىشكەنە بولسا دا كوڭىلگە مەدەۋ...
قانات بىرلىكۇلى
ادىرنا ۇلتتىق پورتالى
