Bügın — Qazaqstannyŋ belgılı saiasi qairatkerı Dınmūhamed Qonaevtyŋ tuǧan künı.
Asa körnektı memleket jäne qoǧam qairatkerı, üş märte Sosialistık eŋbek erı, Qazaq KSR Ǧylym akademiiasynyŋ akademigı, tehnika ǧylymdarynyŋ doktory 1912 jyly 12 qaŋtarda Vernyi (qazırgı Almaty) qalasynda qyzmetkerdıŋ otbasynda ömırge kelgen. 1936 jyly Mäskeu tüstı metaldar jäne altyn institutyn tau-ken injenerı mamandyǧy boiynşa bıtırgen. «Pribalhaşstroi» tresınde jūmys ıstep, ırı önerkäsıptık käsıporyndardy basqardy. Atap aitsaq, Altai, Ridder, Leninogor kenışterınde basşylyq qyzmetterdı atqardy. 1952-1955 jyldary Qazaqstan Ǧylym akademiiasyn basqardy. Onyŋ basşylyǧymen önerkäsıptı de, auyl şaruaşylyǧyn da damytu, Qazaqstannyŋ tabiǧi resurstaryn tiımdı paidalanu maqsatynda ǧylymi zertteuler jürgızıldı. Qonaevtyŋ özı 200-ge juyq ǧylymi eŋbekter jariialady.
1955-1960 jäne 1962-1964 jyldary Qonaev Qazaq KSR Ministrler Keŋesınıŋ töraǧasy boldy. Dınmūhamed Qonaev Qazaqstandy basqarǧan jyldary respublikanyŋ öndırıstık äleuetı 700 paiyzdan astam östı, önerkäsıp kölemı 9 ese, auyl şaruaşylyǧy 6 ese, kürdelı qūrylys 8 ese östı. Dınmūhammed Ahmetūly turaly söz bola qalsa, köpşılık bır auyzdan «Qazaqstandy 40 jyl basqarǧan Qonaev qoi ol» desedı.
Qonaev otstavkaǧa ketkennen keiın Almatyda tūrdy. 1993 jyly 22 tamyzda Almaty oblysy, Alaköl audany, Aqşi auylynda jürek talmasynan qaitys boldy. 1993 jyly 25 tamyzda Keŋsai ziratynda jerlendı.
