بۇگىن — قازاقستاننىڭ بەلگىلى ساياسي قايراتكەرى دىنمۇحامەد قوناەۆتىڭ تۋعان كۇنى.
اسا كورنەكتى مەملەكەت جانە قوعام قايراتكەرى، ءۇش مارتە سوتسياليستىك ەڭبەك ەرى، قازاق كسر عىلىم اكادەمياسىنىڭ اكادەميگى، تەحنيكا عىلىمدارىنىڭ دوكتورى 1912 جىلى 12 قاڭتاردا ۆەرنىي (قازىرگى الماتى) قالاسىندا قىزمەتكەردىڭ وتباسىندا ومىرگە كەلگەن. 1936 جىلى ماسكەۋ ءتۇستى مەتالدار جانە التىن ينستيتۋتىن تاۋ-كەن ينجەنەرى ماماندىعى بويىنشا بىتىرگەن. «پريبالحاشستروي» ترەسىندە جۇمىس ىستەپ، ءىرى ونەركاسىپتىك كاسىپورىنداردى باسقاردى. اتاپ ايتساق، التاي، ريددەر، لەنينوگور كەنىشتەرىندە باسشىلىق قىزمەتتەردى اتقاردى. 1952-1955 جىلدارى قازاقستان عىلىم اكادەمياسىن باسقاردى. ونىڭ باسشىلىعىمەن ونەركاسىپتى دە، اۋىل شارۋاشىلىعىن دا دامىتۋ، قازاقستاننىڭ تابيعي رەسۋرستارىن ءتيىمدى پايدالانۋ ماقساتىندا عىلىمي زەرتتەۋلەر جۇرگىزىلدى. قوناەۆتىڭ ءوزى 200-گە جۋىق عىلىمي ەڭبەكتەر جاريالادى.
1955-1960 جانە 1962-1964 جىلدارى قوناەۆ قازاق كسر مينيسترلەر كەڭەسىنىڭ توراعاسى بولدى. دىنمۇحامەد قوناەۆ قازاقستاندى باسقارعان جىلدارى رەسپۋبليكانىڭ وندىرىستىك الەۋەتى 700 پايىزدان استام ءوستى، ونەركاسىپ كولەمى 9 ەسە، اۋىل شارۋاشىلىعى 6 ەسە، كۇردەلى قۇرىلىس 8 ەسە ءوستى. دىنمۇحاممەد احمەتۇلى تۋرالى ءسوز بولا قالسا، كوپشىلىك ءبىر اۋىزدان «قازاقستاندى 40 جىل باسقارعان قوناەۆ قوي ول» دەسەدى.
قوناەۆ وتستاۆكاعا كەتكەننەن كەيىن الماتىدا تۇردى. 1993 جىلى 22 تامىزدا الماتى وبلىسى، الاكول اۋدانى، اقشي اۋىلىندا جۇرەك تالماسىنان قايتىس بولدى. 1993 جىلى 25 تامىزدا كەڭساي زيراتىندا جەرلەندى.
