Osydan birneshe kún buryn Qonaev shaharynda ıgi bir shara ótti. Almaty oblysynyń ortalyǵynda el men jahannyń jampoz jýrnalısteri men týrıstik operatorlary bas qosty. Aıtýly sharaǵa adyrna.kz tilshisi de qatysyp, óńirdiń týrızm salasyndaǵy bastamalyrana kýá boldy.
Almaty oblysy Týrızm basqarmasynyń uıymdastyrýymen ótken «IZ tour» jáne «Welcome to Konaev» atty týrıstik-aqparattyq týr, «Alatau Hike» atty forým basqalardan erekshelene bildi. Oblys týrızmin damytý ári áleýetin kórsetý maqsatynda sheteldik onyń ishinde Ulybrıtanııa, Italııa, BAÁ jáne Nıderland elderinen mamandardy tartý úlken jetistik. Jáne olardyń árbiri oblystyń negizgi týrıstik nysandaryn aralap, óz usynystaryn aıtqany kóńil kónshitti. Demek, damý, progress bar degen sóz.
Jańadan qurylyp jatqan oblys ortalyǵynyń ıdeologııalyq sıpatyn jan-jaqty ashý úshin Dımash Ahmetulynyń Almaty qalasyndaǵy mýzeıinen týr baǵdarlamasyn bastaý strategııalyq turǵydan óte jaqsy sheshim ispetti. Osy azamattyń aty berilgen jańa ortalyqqa joly túsken týrıster eń áýeli Qonaevtyń kim bolǵanyn, onyń qanshalyqty memleketshil tulǵa retinde el jadynda qalǵanyn tereń ańǵarýy kerek. Sondyqtan da jýrnalıster men týrıstik operatorlar týr baǵdarlamasy aıasynda Dımash Ahmetulynyń mýzeıine bas suqty.
Qazaqstandy órkendetýge atsalysqan tarıhı tulǵanyń mýzeıindegi ár jabdyq týrıster tanymyn oıatyp, qyzyǵýshylyǵyn arttyratyny sózsiz. Bul osy týrǵa shaqyrtý alǵan ár eksperttiń ózinen aq baıqaldy.
Oblys týrızmi týraly súbeli oı aıtady dep attaı qalap shaqyrtqan mamandar Qonaev qalasyna bettedi. Jergilikti tabıǵat tamashalaryn kórip, shabyttanǵandar da tabylyp jatty.
Ekinshi kúni tarıhı jádigerler, atap aıtqanda, KSRO shaǵynda keń qoldanysta bolǵan buıymdar men retro-kólikter kórmesi de erekshe áser qaldyrdy.
Al, tús aýa uıymdastyrylǵan «Alatau Hike» forýmynda oblys týrızmin ilgeriletýge baǵyttalǵan tamasha usynystar aıtyldy.
Alǵash sóz alǵan Almaty oblysy Týrızm basqarmasynyń basshysy Aıbar Talǵatuly aldaǵy ýaqytta josparlanyp otyrǵan irgeli jobalar jaıly tarqatyp, atqarylǵan ıgi isterge toqtalyp ótti. Sondaı-aq, oblys týrızminiń áleýetin arttyrý úshin kez kelgen usynysty tyńdap, jaqsy sharalardy birlesip atqarýǵa shaqyrdy.
Atalǵan forýmǵa týrızm salasynyń maıtalmandarymen qatar sheteldik qonaqtar qatysty. Olardyń arasynan alǵash sóz alǵan «Avruoa Media Group» basshysy Vatan Óz Almaty oblysynyń tabıǵatyna tánti bolǵanyn, sondaı-aq, osy arqyly eýropalyqtardy qyzyqtyrýǵa bolatynyn aıtyp ótti.
Ózge qonaqtar týrızm salasyndaǵy marketıng, maman daıarlaý, servıstik qyzmetter jaıly baıandamalar oqyp, olardy úzdikter qataryna qosý úshin arnaıy usynystaryn jetkizdi.
Kásibı mamandar arasyndaǵy mundaı basqosýlar bir Almaty oblysynda ǵana emes, ár óńirde ótkizilýi kerek. Sonda el týrızmi oń baǵytqa ózgerer edi. Týrızmdi tórge shyǵarsaq utarymyz da kóp bolmaq.
