Aqtöbe oblysyndaǧy Şalqar qalasynyŋ maŋynda mektep oquşylarynyŋ jol apatyna tüsıp, bır jasöspırım qaza tapty. Būl turaly “Diapazon” basylymy jariialady, dep habarlaidy “Adyrna” ūlttyq portaly.
Mälımet boiynşa, jol-kölık oqiǧasy 4 nauryz künı keşke 20:55 şamasynda Şalqar-Bazoi tas jolynyŋ 4-şı şaqyrymynda bolǧan. 9-synyp oquşysy Toyota Land Cruiser kölıgın jürgızıp kele jatyp, rölge ie bola almai, audarylyp ketken. Oqiǧa saldarynan kämeletke tolmaǧan bır bala oqiǧa ornynda köz jūmdy. Taǧy tört adam jaraqatpen Şalqar audandyq auruhanasyna jetkızıldı.
"16 jasar qyz komada jatyr, diagnozy: bas miynyŋ aşyq jaraqaty, mi ışılık qan qūiylu jäne bas miynyŋ ısınuı. Jaǧdaiy öte auyr. 15 jasar jasöspırımnıŋ jambas süiegınıŋ tömengı bölıgı synǧan. Ekı bala da Aqtöbedegı oblystyq balalar auruhanasyna jıberıldı. Tekseruden keiın 15 jastaǧy taǧy bır bala ambulatoriialyq emdeluge jıberıldı: onyŋ aiaq-qoldary kögerıp, syrylǧan", - dep habarlady oblystyq densaulyq saqtau basqarmasynda.
Basylymnyŋ mälımetınşe, balalar – Şalqar qalasyndaǧy №8 mekteptıŋ oquşylary. Alaida oblystyq bılım basqarmasy äzırge eşqandai tüsınıkteme bergen joq.
Al poliseiler balalardyŋ kölık jürgızuıne rūqsat bermeudı sūraidy.
