Aktóbe oblysynda depo bastyǵy 1,5 mıllıon teńge para alǵany úshin sottaldy, dep habarlaıdy "Adyrna" ulttyq portaly Dıapazon saıtyna silteme jasap.
Embi qalasynyń turǵyny jumysqa ornalasý úshin Jem stansasyndaǵy eksplýataııalyq lokomotıv deposynda kómekshi mashınıst bolyp jumys istegen tanysyna júgingen. Ol óz kezeginde deponyń kadrlar jónindegi menedjerimen baılanysyp, jetekshisine para berýdi usynǵan.
Depo bastyǵy kandıdattyń jumysqa qabyldanýyna paramen kelisip, oǵan suhbatqa arnalǵan suraqtar men jaýaptardy berýdi tapsyrǵan. Kandıdat testileýden qajetti ball jınap, suhbattan sátti ótken. Alaıda ol qajetti somany taba almaı, jubaıynan 4 mıllıon teńge nesıe alýdy suraǵan. Sonyń 1,5 mıllıon teńgesin ol dosyna berip, ol menedjer arqyly depo bastyǵyna jetizilgen. 300 myń teńge osy somadan kadrlar menedjerine deldaldyq qyzmeti úshin berilgen.
Sotta para berýshi aıypker, 1,5 mıllıon teńgeni bergennen keıin eki kúnnen soń jumysqa qabyldanǵanyn moıyndady. Ol tek alty aı ǵana jumys istep, keıin jumystan bosatylǵan. Para alǵan depo bastyǵy Daýletqalı Jalmuhambetov te kinásin moıyndady.
«Alǵan aqshany depo ǵımaratynyń jóndeýine jumsadym, sebebi bólingen qarajat jetpedi», – dedi sotta burynǵy depo bastyǵy Jalmuhambetov.
Sot barlyq tórt aıypkerdi kináli dep tanydy. Depo bastyǵy Daýletqalı Jalmuhambetov úsh jarym jylǵa bas bostandyǵynan aıyryldy. Para berýshi, onyń dosy jáne deldal retinde aıyptalǵan adam úsh jylǵa sottalsa, kadrlar menedjeri bir jarym jylǵa bas bostandyǵynan aıyryldy. Barlyq tórt aıypkerge ómir boıy memlekettik qyzmette jumys isteýge tyıym salyndy.
